درب الحجاز
ايه في منحنى درب الحجـاز اعتـراف | أيه والسالفه تغـري لسـان الكـذوب |
حاصروني من اول سطر بعد الغـلاف | صرت انا حرف يبحث عن مساحة هروب |
أيه وتعطروا دمـي خجـل وانكسـاف | مثلما البحـر يتعطـر بـدم الغـروب |
قوم ترمي عبثها في المسامع هتـاف | يذبحون القصيده فـي سبيـل الذنـوب |
بس ماخذت من وقتي نهايـة مطـاف | دمي اخضر ورماي القفـا مايصـوب |
ترعد قلوبهم لكـن مطرهـا جفـاف | وش يميت القلوب الا .. جفاف القلوب |
من يصدق نهر يغتال حلم الضفاف ..؟! | بين جزر الشمال .. وبين مد الجنـوب |
ماهقيت ان في عشق الرمال انحـراف | لين خانتني الخطوه .. وخنت الـدروب |
بعدها صرت للصفيـن معنـى وقـاف | وابتسامه على ثغر المواجـع تـذوب |
الامانـي سنابـل ينتظرهـا قـطـاف | والمواسم تعاني جوع كـل الشعـوب |