ـ يسعد صباحو عمي أبو عدنان ـ يسعد صباحك خيرو… شمستك عاليه شوي اليوم… يعني صارت الساعة تسعة وجنابك ما شرفت! ـ والله يا عمي أبو عدنان راحت عليي نومة… يخرب بيتهون هدول جماعة الـ ام بي سي كل لحظة فلم جديد وكل فلم أحلى من يللي ئبلو وهيك بتلائي حالك غرئت ومضى الوئت… شو بلائي فاتح المحل؟ ـ والله يا خيرو شفتك تأخرت، وخرمت علـ سيكارة ففتت علـ محل عملت ركوة قهوة صغيرة مشينا فيها الحال. ـ طيب أمري لـ الله مندبر حالنا بلا قهوة ـ أبداً … عليي الحلال بفوت براسي هلئ وبساويلك أحلى فنجان قهوة بيخدم هل شوارب. ـ لا تخججلني عمي أبو عدنان لأنو العين ما بتعلى علـ حاجب
مجتمع البسطات… بقلم : آرا سوفاليان مساهمات القراء
ـ يسعد صباحو عمي أبو عدنان
ـ يسعد صباحك خيرو… شمستك عاليه شوي اليوم… يعني صارت الساعة تسعة وجنابك ما شرفت!
ـ والله يا عمي أبو عدنان راحت عليي نومة… يخرب بيتهون هدول جماعة الـ ام بي سي كل لحظة فلم جديد وكل فلم أحلى من يللي ئبلو وهيك بتلائي حالك غرئت ومضى الوئت… شو بلائي فاتح المحل؟
ـ والله يا خيرو شفتك تأخرت، وخرمت علـ سيكارة ففتت علـ محل عملت ركوة قهوة صغيرة مشينا فيها الحال.
ـ طيب أمري لـ الله مندبر حالنا بلا قهوة
ـ أبداً … عليي الحلال بفوت براسي هلئ وبساويلك أحلى فنجان قهوة بيخدم هل شوارب.
ـ لا تخججلني عمي أبو عدنان لأنو العين ما بتعلى علـ حاجب؟
ـ لا يا خيرو الله وكيلك لولاك لكننا آعدين لليوم بالمحل عم نخصصي عجول… بلا مؤاخذة ضرايب وكشكشة ورشرشة وبخبخة وتبخير وفواتير مي وكهرباء وتلفون و واحد جايي ومعو كتاب بدو حئو 500 ليرة ومعو وحدة عاملة بوز وواقفة على جنب قرفانة من كل هل مشوار…وما بتشوف اللا العواينية والسلبطجية وما بيجيك إلا الزبايين الدكر ، ويا سيدي كننا أبلانين بالزباين الدكر بس المصيبة حتى هدول ما عادو أرجونا وجوههن… الله وكيلك يا خيرو ئبل ما تئنعني بئنو اترك المحل والحق مصلحة البسطة، مضى عليي شهر متل السم ما دخل محللي لا هابوب ولا دابوب وطلبت من ربي انو يفرجها عليي فـ ئجيت انت… وكانت فكرتك ممتازة … حيث انو منخللي المحل مفتوح ورا ضهرنا و وئت بتجي الشرطة مندخخل بسطة السي دي يات علـ محل ومننززل الغلق ومنحضر البازار وعلى تفئيس وضحك و وئت بحللو من غير شر منطالع البسطة ومنشوف رزئتنا.
ـ منيح يللي عمـ تعترف… ما كنت شاطر اللا بالفلسفة كنت تطلع وبئيدك ائبريئ الميّ تسفحو علـ لصريف وتئلي بعدلـ نا البسطة من هون يا حباب … وائف بوشنا وقاطع رزئنا والمحل باب رزء…كنت ازعل عليك لحتالية طلعت براسي وعرضت عليك الشراكة وخلصت من غلاظتك؟
ـ لا تواخذني خيرو والله الئللة بتعمي الئلب
ـ وهلئ شلون الأحوال
ـ ما شي الحال لهلا بعنا عشر سي دي يات منهون تنين بورنو يعني ربحنا شغلة 200 ليرة بنص ساعة زمان.
ـ بركة… كلما بتذكر أحوالك ئبل مشروعنا بزعل على الايام يللي ضوعتها وانت تنطر الزبون مناطرة وطاقق من الأعدة والوحدة.
ـ والله يا خيرو مصلحتنا كان ألها عزّ وكانت رزئتها منيحة ومخفية، لحتى صار الجاهز مغططي السوق وما عاد في خيياطين ولا خيياطات وما عادت الاكسسوارات مطلوبة وتكدست بوشنا الزرار والخيطان والسحابات والأبر والكشاتبين وكل لوازم الخياطة والبضاعة يللي ما بتئلب بتاكول راسمالها… ويا سيدي كنا أبلانين بالمئسوم بس ما بيضل على ما هو اللا هو…لأنو هلئتية صحاب معامل النسيج وشييات التريكو وورشات الخياطة لحئهون البل و عممال يولولوا وباعتراف الدولة فلس 30% منهن وسككروا محلاتون وسرحوا العممال لأنو البضاعة الصينية طحشت عليهون وعمتهون عمي … والبئية عممال يكابرو يللي مكسور عليه رواتب عممال كذا مليون واللخري مكسور عليه فواتير كهرباء برقم بيطلع من أحف راسو و واحد مكسورة عليه ضرايب ما بيغدر يسدد عشرها ولو دء راسو بالسما وعاش ألف سنة.
ـ حط ايدك خيرو… ضبضبت ضبضبت يللي بحب النبي يخلي… شرطة المحافظة
ـ شو جايين بكير اليوم مالون بالعادة ؟
ـ سيدي الغراض صارو بالمحل ونززلنا الغلق وكبسنا القفل ويلي بيطلع بئيدهون يطلع برجلهون تعال نروح علئهوة نعمللنا نفس أركيلة مع كباية شاي اكرك عجم ومنرجع بعد ما يروحوا بحال سبيلون.
ـ المرة الماضية شو طلع منها… نسيت أسألك؟
ـ ناكته وما طلع منها شي … هبش هبشة سيديات وأخدناهون منو وناولنا 100 ليرة وغشنا ابن الحرام …لأنو لو كنت عرفان عددهون كنت بنسخهون وبيوئفوا عليي أرخص… ما كنت عرفان انهون ئلال ومو حرزانين؟
ـ بركداً كانت الئهوة مسكررة
ـ أعوذ بالله مستحيل لأنو هادا بيتناقض مع شعار أفتح قهوة تغلق عشر مدارس… وين رايح انت بهل عجئة…؟؟؟… وجماعتنا اليوم ما عاد بدهون مدارس ولا علم ولا تعليم… بالله المحروسة بنتك شو فاتت بعدين
ـ ما طلعلها شيء وآعدة بالبيت للنائردي وعزا الرئبة عم اتطق حنك مع امها وأخواتها ليل نهار ئللي لئلك ئللي لئلك على خود صد وهات رد… مع أنو وكيلك الله على زماننا كان مجموعها بيدخخلها طب
ـ جبلنا نارة أبو سعيد
ـ هاتولنا نارا علـ 7 وشوفولنا الشباب إذا بدهون ورق أو طاولة وسألوهن إذا كانوا بشربوا شي…
ـ خللصنا خيرو بدنا نروح نتسبب بلا نارة بلا بطيخ
ـ حط ايدك لنطالع العربية… دير بالك ليئوم يوقع الرزء…
ـ جبتللنا مجموعة دريد لحام مشان هادا الشب يلي كان لابس قميص أحمر وعامل سوالفو متل الجزمة؟
ـ جبتها
ـ وكاسك يا وطن من ضمنها
ـ موجودة
ـ لعمى شو هادا دريد لحام يعني من 30 سنة وكان عم ينق ويشتكي … لك يجي يشوف هلق شو صار فينا!
ـ يا سيدي مو بس لحالوا كان معو الماغوط الله يرحمو
ـ ولي ليش مات الماغوط؟؟؟
ـ يا سيدي مات طئيئ
ـ معناها مسحوبة ما بدنا حدا يجي مشان ما يموت طئيئ ونتحمل خطيتو
ـ أبو عدنان بتعطينا بنتك على سنة الله ورسوله… يعني بتكسب فينا ثواب
ـ وشو بدي ئول لأمها بدي جووزها من بسطجي؟
ـ عدم المؤاخذة أبو عدنان ليش جناب أبوها شو بيشغل؟؟؟
ـ كل شي لحال انا عم ساعدك مساعدة بس أنا عندي محل بنص السوء بيلعب فيه الخييال وكنت بزماني شيخ الكار ومعلم المعلمين.
ـ أبو عدنان شوف مين فات علمحل؟
ـ لا تتطلع اللا بطرف عينك ومتل العادة ما دخلنا
ـ بركداً كان زبون
ـ وانت السادئ هادا زبون دكر
ـ وشو عررفك؟
ـ الزبون ما بيجي ومعو سجل حكومي مصنبعو بئيدو وشايلو معو من الدائرة مشان يأرجينا ياه ويبتزنا فيه… كوسيلة… متل يللي بيعلئ صورة على بلور سيارتو مشان يرععب العالم فيها.
ـ وشو بدك تعمل
ـ ولا شيء خليه منئوع هون لحتى يمل
ـ شوف عممال يمد إيدو علـ تلافون
ـ يا سيدي ئيدو وما تعطي الهاتف مفصول مشان الفاتورة وعند الضرورة منحكي عل موبايل ببلاش بالمورس والشيفرة السرية أنا والعيلة مثلاً رنة واحدة وإغلاق الخط لها معنى وللرنتين معنى آخر وللثلاث رنات معنى تالت … وبدون رنة بنوب معناها أنا راجع علـ بيت
ـ فيك تتصل بدون رنة بنوب؟
ـ فيني… بس مو مهم لأنو المهم هو الأخلاق.
ـ شوف عممال ينككش بالدروج
ـ الدروج مافيهون شي خليه ينككش ليشبع
ـ والله يا أبو عدنان رح روح اتعبى فيه
ـ خليك هون خيرو رح روح أنا
ـ السلام عليكم
ـ انت صاحب المحل؟
ـ لاء أنا جارو
ـ و وينو بالسلامة؟
ـ راح علـ حج
ـ بس هادا مو وئت حج
ـ يا سيدي من كتر المصاري يللي هللت عليه … ما عاد يلائي طريئة ليصرفها… فالزلمة ما ألنا معو شيء…وهو حر ووين ما بدو يروح بيروح!!! ومتل ما ئلتلك ما ألنا معو شي.
ـ بس أنا ألي معو
ـ الك معو؟
ـ نعم
ـ ليش حضرتك مين بتكون
ـ أنا آرايبو
ـ ممتاز بس من أنو ناح
ـ من كل النواحي
ـ منيح بس أنا يللي بعرفو انو الرجال مقطوع من شجرة وما لو أب ولا أم ومو متجوز ولا عندو ولاد فمن فين طلعت هل ئرابة … والله اذا عرف ليطير من فرحو يعني بعد كل هل عمر يطلع لو ئرايب وهو مفكر حالو أنو لقيط ومقطوع من شجرة.
ـ وايمتا بيجي
ـ ما رح يجي ومفاتيح المحل معنا… منفوت منئضي حاجة ومنعمل بريئ شاي ومنحط غراضنا وأواعي العري ومنروح على بيوتنا وهوي بجي بالشهر مرة ومالو وقئت محدد.
ـ طيب بس يجي ألو يراجعنا الطابق كذا الغرفة كذا أبو فلان
ـ معناها حضرتكون تبع الضرايب
ـ نعم
ـ يا سيدي والنعم … أنا طالع يوم الخميس علـ بلد ومو راجع لأول الشهر لأنه عئبالك طالع اتجوز … بدي كفي نص ديني… فإذا اجا ئبل ما روح فرح بلغو واذا ما اجا جنابك بدك تكلف خاطرك وتبلغو انت … وانا لو كنت بدالك يا مولانا ما بجي بنوب
ـ ليش؟ … في تكليف جديد … ولازم يتبللغ.
ـ تكليف جديد ؟… على شو؟…. ومشان شو؟… يعني انت صرلك ساعة آعد بالمحل… فهل يا مولانا فات علـ محل حدا تاني غيرك؟؟؟ الله وكيلك لا هابوب ولا دابوب؟؟؟
ـ المحل بدو رجل مكسورة هوي تارك محلو والله أعلم وينو
ـ والله يا مولانا القط ما بيهروب من العرس … بس الله وكيلك لا بيعة ولا شروة ولا زبائن إلا زبائن الدكر … على كل حال أنا رح بلغو بس متل ما ئلتلك لا تعتمد عليي فإذا طاب النغم رح مدد ئعدتي بالبلد شهر كمان… تعال جابرنا بكم سي دي.
ـ لا بدي روح
ـ عو شاب شاي !!!
ـ مشكور بدي روح
ـ عو شاب شاي !!! والله ما بيصير هيك… عو شاب شاي !!!… عو شاب!!!… لك عو عو عو شاب
حاشية للكاتب:
الصناعات النسيجية السورية تستغيث في مواجهة (بعبع) البضائع الصينية
1 ـ يجب أن نساهم في تطور الصين، وازدياد الدخل الفردي فيها، وتنمية صادراتها، وإغناء شعبها، وضرب صناعتنا الوطنية، وإغراقها، وتسريح عمالنا، وتهريب ما بقي من رؤوس الأموال في بلدنا الى الخارج وقتل العزيمة في قلوب تجارنا وصناعنا، عن طريق ارهاقهم بالضرائب وفواتير الكهرباء السياحية وفواتير المازوت السياحي، وفرمهم بالفرامة علـ طالع وعلـ نازل بدلاً من مؤازرتهم ومساعدتهم وإعفائهم من الضرائب ودعمهم.
قال لي أحد التجار مللت من حمل الناس على ظهري والدوران بهم بثمن العلف الذي أتناوله.
وعاد الرجل من حيث أتى وسبقته أمواله أو ما بقي منها بعد دفع المعلوم بلا رجعة.
2 ـ لي صديق أصيب بحادث سير أدى الى إعاقة بالنسبة له، وشلل زوجته التام فتحول الرجل بين ليلة وضحاها إلى مفلس وممرض لزوجته وهو على هذه الحال منذ أربع سنين وتم إتحافه بضرائب قدرها 2 مليون ليرة وكسور واتهم بأنه متهرب وطلب منهم أي شيء يثبت بأنه كان على رأس عمله أو باشر أي نشاط اقتصادي منذ الحادث وحتى اليوم، وطبعاً لم يهتم أحد له فقال للذي سلمه الانذار: أرجوا ان تبيعونا في المزاد العلني أنا وزوجتي لأننا لم نعد نملك شيء ولا حتى ملابسنا، فلعلنا نساوي شيئاً بعد تطبيق معدلات الاستهلاك والتداعي الزمني فننحقق صفة المواطن الفاضل الذي باع نفسه من أجل وطنه… وهكذا فالتجار والصناعيون عبيد أمام ديكتاتورية الموظف السوري الثوري وتخميناته والعمولة التي يأمل بالحصول عليها وبيده سلاح ماض وهو : اعترضوا على التكليف ليتم ضرب الرقم بـ 4 وتم تنفيذ عامل الضرب بـ 4 حتى صار الاعتراض من المنسيات.
3 ـ تسلط الموظفين على الصناعيين والتجار له أسبابه المبررة تماماً والتي سبق ذكرها، لأنه وكما أشرنا … لهم عمولة على شكل نسبة مئوية في كل ضربة سوط يجلدون فيها التاجر أو الصناعي، وبالتالي فإنهم يفرضون الأتاوات بحد السيف الصدئ دون أن يعرفوا ،هم، والذي وضع لهم هذا الحافز، بأنهم كلاهما أعداء للوطن، ومجرمون يجب محاكمتهم بجرم تخريب البلد اقتصادياً وها نحن نقطف هذه الثمار السوداء ويتحول قسم لا بأس به من شعبنا الى تحت خط الفقر ويضحي الصناعيون بالورشات فيغلقونها ويصرفون العمال الى بيوتهم، ويخرج بين الفترة والأخرى من يقول بأن الأزمة الاقتصادية لن تؤثر بنا، لأننا محصنون بحماية البررة والصديقين وأصحاب الشفاعات، متناسياً أن الأزمة الاقتصادية لوحدها كفيلة بإنهاك البلاد فكيف إذا ترافقت مع هذا الكادر الهمام من الموظفين الأخيار الذين وضعوا جيوبهم في أعلى هرم الاهتمامات.
ويخرج بين الفترة والأخرى موال من الطاحون، لمغني مجنون يغني في الطاحون، لأناس لا يسمعون، متشلهمون متلهفون ومهشلمون ولا يهتمون.
Ara Souvalian
arasouvalian@gmail.com
2010-04-11 13:00:43
