حلم دياب

[عادل صابر]

انتشرت فى قريتنا ظاهرة البحث عن الآثار "اللقايا" فى بطن الجبل وفى النهاية لايجدون الا سرابا يحسبه الظمآن ماءوهذه احدى القصص التى عاصرتها بنفسى بأسمائها الحقيقية
********************************************
********************************************
اسمعوا قصة آخرها سراب
من طقطق ولغَلَق الباب
كل بلدنا بتحكى عليها
قصة فاطنة وجوزها دياب
دياب كان راجل غلبان
كان بيجُّرمن الدكان
لاقى يادوب حق الدخان
ولا ليه عزوة ولا أصحاب
كان عايش مخصور وف حاله
ولا فيه حاجة بتشغل باله
همّه فى رزقه ورزق عياله
ولا عامل للدنيا حساب!!
طول عمره ع اللقمة يعافر
مرة يكّن ومرة يسافر
واعرة العيشة والجوع كافر
بينه وبين المال " زرَّاب*"
وفى يوم فاطنة قالت يادياب
ليه العيشة هباب ف هباب؟!
وجبلنا نهبوه لاغراب
واحنا بناكل طوب وتراب!!!
قاللها قفّللى ع الموضوع
طول عمرك كرشك مفجوع
دا ماحدش بيموت م الجوع
رزق الناس خلقه باأسباب!!
فاطنة قالتله يابوى تبّعِنى
بُعدك عنى فى قلبى واجعنى
وقرش الكَروَة*معدشى نافعنى
وانت كبرت وشعرك شاب!!
يادياب نفسى فى يوم نتستروا
فرغ البيت وعيالك كتروا
صرنا كنخل يقع من جدره
لما يهب عليه "طيَّاب"!!
بص وقاللها عندك حَق
دا احنا يادوب ماشيين باالزَق!!
وانا طول عمرى يدَىّ فى الشق
والناس بقيت زى كلاب!!!
لو ع الغردقة نفسى ابقيها
كاره الغردقة واللى بانيها!!
غصبٍ عنى انا قاعد فيها
نفسى الغردقة تبقى خراب!!
لولا الجوع واللهِ مااروح
لولا مصاريف عمرو وجحجوح
قرشها جاى بطلوع الروح
مالحة المية وعيشها عذاب!!
قالت النبى يادياب بزيادة!!
ليَّه نسيت هند وميادة!!
نفسى يعيشوا ف هنا وسعادة
تاجى فرحتهم بعد غياب
قاللها آه م العيشة الخل
مخى خلاص قرَّب يتشَل
قالت أنا عنديّا الحل!!
بكرة حتغنَى ياواد يادياب!!
قالت طرطق ودنك ليّا
الشيخ قاللى ف بيتنا لقيّة
رح اجيب سلفة من الجمعية
لجل مانكْحت بيها تراب!!
قاللها بطّلى شغل جنان
قالت بكرة المخفى يبان!!
تحت الفرن لقيت جعران
هو السر وفتْح الباب
حَنّ دياب قام تبّع مرته
اصل الدنيا بخيلة وهرَته
وزرع غيط الحلم وحَرَته!!
قاللك بكرة تروق يادياب!!
***
تبّع فاطنة دياب وخواتها
قال من بكرة حاروح لخواتها
ويقول كيف الفكرةدى جاتها!!
وَه يادياب!! ياك عقلك غاب!!
يومها دياب لم نام الليل
بايت يحلم باالتماثيل
دوغرى وراح لنسيبه هابيل
سمع القصة مارد جواب!!
م الفجرية اشتغل الكحت
ناس من برة وناس من تحت
والشيخ يقرا فى كتب البخت
ويقول والله غِنيت يادياب!!
ودياب جوا البير عريان
كل مايكحت"ط..زه" تبان!!
ويقول بكرة اشترى فدان
وحاجيب زلمكَّة وقلاب!!
حاابنى عمارة عشر تدوار
وافتح مطعم جنبه بزار!!
وضلام ليلنا حيبقى نهار
وانعل ابوك يازمن كداب
واللة ماتفرج بالملايين
لااعمل" ذكْر"ياشيخ جبرين*
واتبغدد مع بت هابيل
تبقى العيشة فراخ وكباب!!
وافتح شركة ف قلب البندر
والبس شال وعباية واتمنظر
وابقى الحاج دياب ابو بعجَر
والفقر اضربه بالقبقاب!!
وسط النجع حااعدّى طريق
وانسى الكتمة وعيشة الضيق
واركب عمدة على "الصداديق"*
بكرة تقولوا ياعمدة دياب!!
***
كل دياب مايفوق م الحلم
يرجع تانى لنفس الفيلم
ويقول حلم ياناس ولاعلم!!
والله وجاتلنا ع الطُبطَاب!!
والشيخ يفنس جوا البورة
ويقول نفسى تفوت مستورة
نص بلدكم ناس مسعورة
مش بيحبوا الخير لدياب!!
عدَّى اسبوع ووراه اسبوع
تعبوا وقلب دياب موجوع
يقْضْوا عياله اليوم بالجوع
ياجى الليل والنوم غلاَّب
طول اليوم الباب مردود
والشباك بالطوب مسدود
والناس تغلى زى الدود
فرشوا حصيرهم خشم الباب
اللى يقَضّى الليل ماينامش
واللى قعد للفجر ماقامش
واللى فى كوم البوص راح كامش
كل بلدنا شيوخ وشباب!!
اللى يقول طلعِت فى الفجر
واللى يقول رح يحصل غدر
والناس كنَّها ليلة القدر
والموعود بالسعد دياب
شوقى يقول عبّوها فى شكارة
هجاّن قال واللهِ حجارة!!
بقت الناس تايهة ومحتارة
والصداديق يقرطوا ع الناب!!
واللى يقولك باقى يومين
واللى يقول تاخد شهرين
واحمد قاعد جنب حسين
سهروا لحد النجم ماغاب
سعدين يحلف لآخد النص
وحميد جنب الباب بيبص
وعلى مولع جوزة ويرص
ويقول بيمين شيخ نصاب!!
ع التنور قعدت أسعاد
جسمها خس وهمها زاد
خايفة دياب ليخون حدَّاد
تطلع كل احلامها سراب!!
عبد رحيم متْكى غلى الشوبة
ويقول ديّة حكاية ملعوبة
وانا حالف ماحافوُت ولاطوبة
وقت الجد مفيشى عتاب
***
قصدى نصيبة وجات للناس
وبلدنا ركبها الوسواس
وحكاية كدب ماليها اساس
واللى عشقها اتلّت وخاب
قاعدة الناس بالجوع سهرانة
ناس فرحانة وناس حزنانة
وناس النوم خدها على خوانة
والليل غول ملهوش أحباب
إلاّ وفجأة سمعنا نفير
عربيات والناس بتطير
حملة وطبّت فوق البير
والشيخ هجّ وقبضوا دياب!!
والناس واقفة على التنانير
وبلدنا اتعبّت دبابير!!
خيبة قوية وهم كبير
والله خسارة ياحاج دياب!!
كل بلدنا كانت ملمومة
والظباط واقفين وحكومة
تصرخ فاطنة تقول مظلومة
راحت السُلفة وطبّوا دياب!!
ودياب شاف البوكس وتاه
بقى يزْعَق عوضى على الله
ضيَّع مال الناس وشقاه
ويقول والله غِنِيت يادياب
والله وجاتلك ع الطبطاب
والله وجاتلك ع الطبطاب!!!
*********************************
***********************************
هوامش:-------
*الزراب....سور من الطين من فوقه سعف النخيل
*الكروَة....اجرة العامل الارزقى
*الصداديق.....عائلة دياب
*ذكر......حضرة لذكر الله
*الشيخ جبرين...اجد الاولياء المشاهير فى قريتنا.

[كاظم الفضلي]

الشاعر عادل صابر .. قصيدة لاذعة لقصة
من عمق الواقع . ومااكثر الشواهد والمشاهد
والصور المؤلمة لشعب أتعبه العوز وعاش
اعزل بترف حلم معاق ..

نقلت حقيقة حلم دياب بالونات ملونة تملأها

تملأها حسرات فاطنه

شكراً لصياغتك النص بهذا اللون الممتع

تحيتي لك .

كاظم الفضلي

[ريمه الخاني]

انا على يقين ان ماتتلقفه الصحافة نذر يسير من الحقيقة
تحيتي لك وتثبيت

[راما]

مايحز بالنفس سرقتها أو بيعها.....فأين حب الوطن واين الإخلاص؟وأين الرقابة؟
ننتظر جديدك أيها العربي الأبي.
راما