[ سَحَريات ]
قال خطيب الجمعة استوو..!
وقفنا نحنا النسوان قدام بعض مشان نصلي الضهر..؛
والله خطبة يوم الجمعة أنا بحبها كتير..؛
ودومن الدوم بزبط مواعيدي إنو ماتروح عليي..؛
ركعتين ورا الإمام بتسوى الدنيه ومافيها..؛
روحة المسجد عندي من الرضى الرباني على بني آدم..؛
المهم ياحبابي قرأ الإمام الفاتحة وسورة كريمة ثم ركعنا خلفه..؛
في وضعية الركوع لاحظت إنو جرابات جارتي مبخوشين..؛
يوه ليش هيك عم اتطلع على غيري..!!
وبالركوع التاني فكرت يعني ليش مو قاطبة جراباتها..!!
سبحان الله .. من فوائد صلاة الجماعة إنو الإنسان يدرب نفسه يكون موجود ضمن مجموعة كبيرة من الناس بذات الوقت يكون ملتزم بنفسه مو بالتحديق بالآخرين أو التفكير فيهن..؛؛
حاولو ماتنشغلو بالشخص يلي على يمينك ويلي على شمالك أثناء الاصطفاف للصلاة..؛
نحن نضيع لذة التواجد بين يدي الله لدقائق معدودة بالاهتمام بالغير حولنا..؛
يعني وحدة حجابها مو راكز والتانية ما بتعرف تسجد..؛
وهديك عم تصلي ببنطلون ويلي بعدها مدري شو ساوت..؛
صلاة ركعتين تحتاج قنطارين فهم وعلم..؛
على كل ياحبابي يلي صار إنو عشية وقبل مانام بردت قمت إلبس جوز جرابات صوف طلع مفتوق ومبخوش ومالي أنا أحسن من حدا..!!!