مسافرين مالسما للأرض

بترموا الأمل في الغيطان

وعالجدران

وتحت الغطا

وتغيروا طبع الحياه

المُحبطه

وتفّتحوا عيون العيال

عالعيد

وتقّربوا البعيد

وتزرعوا في قلب العجايز

جايز

وممكن

ومين عارف!

وتقّولوا الشفايف

كلام طيب

ترمي السلام

في المنام

يصبح يكّبر للُقي

ويطيب

وتسيبوا للمحتاج

مزاج رايق

يخرج مع دنيته

ويتعايق

وتفًرحوا المتضايق

بالسكويت والكحك

يا موزعين الضحك

في الأعياد

ما تعوقوش

ولو لقيتوا الطريق

زحمه

ماتبعتوش

رسالات !

____
عمرو السعودي

برازيليا - البرازيل

14/06/2018