دمياطـــــــى
م الفجر بصحا .
أبص جنبى .
فى قميص مدندش .
نايمة مراتى

أقوم مكسل .
أفكر أرجع .
عقلى يقولى .
قوم ياأسطى محسن .
حمام بسرعة .
أتوضى أصلى .
أبوس عيالى .
أقول ياعاطى .

ع السلم أنزل .
مراتى تنده.
إوعى يامحسن .
جزمة حمادة .
صندل للوزة .
وخد معاك .
الأسطى سلامة .
الجزاماتى .


طيب يازينب .
مش ممكن أنسى .
وهاأجيب كمان .
شبشب حماتى


فى الشارع أجرى .
ع الباب أخبط .
ياعم منعم .
ياأسطى سيد .
ياواد يابندق .
ياأبو المعاطى .


نقاش وبنا .
نجار موبيليا .
أسترجى أسطر .
أسطى لاكيه .
ومدهباتى .


الست فايزة .
فى الفرن تخبز .
خد لك رغيف .
غير به ريقك .
عيش بلدى طازة .
تنده عليها .
أم اسماعيل .
فيه أيه يافايزة .
دا الأسطى محسن .
هو مسحراتى .

من غير فطار .
قوام بنركب .
ننزل نفرفش .
الشاى يابندق .
لازم يوماتى .
عم منعم .
بالفرشة يرسم .
الأسطى مدحت .
أزميله ينحت .
أوضة نقابل .
فيها ضيوفنا .
وأوضة بننسى
فيها جراحنا .
وتفوت ساعاتى .
الساعة عشرة .
إجرى يابندق .
على عم عبده .
فول وفلافل .
م الطرشى كتر .
حزمة خضار .
أصلى نباتى .
فى الضهر أريح .
ع الحيطة بسند .
ضهرى وأمدد .
أستنى مسعد .
أهو جاى يجرى .
ووراه عليوه .
بيشد رجله .
أصله مدشدش .
طول عمره واقف .
ع السقف يبنى .
يفرد فى طوله .
بالعافية يمشى .
أهو يوم بيصبر .
ويوم يهاتى .



ناكل ونضحك .
وسعيد يقولك .
الأهلى يغلب .
متعب هيلعب .
دمياط هتطلع .
شربات هوزع .
ع اللى ماشى .
وكمان إخواتى .

أسمع ورايا .
الواد مطاوع .
بيقول لأخوه .
رغيف وحاف .
من غير غموس .
مفيش فلوس .
غمس بعرقك .
قرب ودوق .
شوف الطعامة.
ولاأحلى حاتى .

فى المغرب أقلع .
عفريتى وأرجع .
أنفص ترابى .
أجرى يوماتى .

شغلى كتير .
بس بضمير .
حقى وحقك .
إوعى تاكلنى .
أنا مش هطاطى .

أنا أصلى راجل .
شغال بإيدى .
بشقى وبتعب .
علشان عيالى .
تكبر وتعلا .
هما حياتى .

أرجع لدارى .
شايل فى إيدى .
شبشب حماتى .
جزمة حمادة .
صندل للوزة .
بطيخة حمرا .
لفة مشبك .
عشان بناتى .


أحضن ولادى .
آكل لى لقمة .
نامى يالوزة .
عايزين نحلى .
ومراتى تلبس .
قميص مدندش .
يكشف يدارى .
ينده على .
بصوت يسمع .
وعنيها تلمع .
زى حالاتى .

دميــــــاطـــــــى
كلمات
عصام ميره