رد على الخاص:

عزيزتي مشكلتك مو بالحجاب وآسفة أنو ممكن يكون كلامي قاسي شوي ..

مشكلتك هي مشكلة معظم الناس ببيئتنا العربية اللي ما تجرؤوا لسه يبحثوا ويشكوا ويفكروا ويبطلوا ينتظروا حدا يقللن شو يعملوا وشو ما يعملوا، لأن ما تعلموا يكونوا أصحاب قرار ولا أحرار، لأنن ببساطة بيخافوا من المسؤولية، ولأن المشي مع القطيع أسهل أدام الناس وحتى أدام الله اللي ما عرفوه لسه لأن ببساطة الله تجربة شخصية وفردية جدا ..

أنا بقترح تقرأي عن موضوع الحجاب من مصادر متنوعة وتقرأي الآيات المذكور فيها عن الحجاب حتى تقدري تشكلي رأيك الخاص وإذا كان رأيك بالأخير أنو الحجاب فرض فما في مشكلة فيكي تخليه وأنت مرتاحة ..
وإذا وصلت لرأي أنو الحجاب مجرد عرف اجتماعي ومالو علاقة بالدين ففيكي تحافظي عليه إذا كنت ببلد ماشيين بعرف الحجاب تجنبا للأذى، على مبدأ "ذلك أدنى أن يُعرَفن فلا يؤذين" ..

وإذا كنت ببلد ما فيه هاد العرف فعندك خيار أنك تخلعيه، ولحتى تقدري تعملي هالشي بدك تخلصي النية لله وتستعيني فيه وتدعيه أنو يطهر قلبك من شرك الخوف من الناس ..
عادة العواقب بتكون مو سهلة وبدها قوة قلب ..

وأنا ما دخلت المعركة اللي فتحوها عليي بجبهات الهجوم اللي شنوها، لأني ببساطة ما رديت على حدا ونذرت للرحمن صوما وطلبت من الله يربط على قلبي وحافظت على سلامي الداخلي وركزت طاقتي على حالي بدل ما شتتها عالناس ..
أنا خلعت الحجاب لله، لأني ما بنافق ولا أشرك مع الله ..

برأيي قضية الحجاب بالنسبة إلك فرصة، مو بس لتعيدي النظر بموضوع الحجاب، وكمان لتعيدي النظر بكل حياتك وأسلوبك بالحياة وبقوة قلبك وإيمانك وعلاقتك مع الله ومع حالك ..
وتسألي حالك: أنا مين؟ وشو بدي من حالي؟
وأدامك عمر كامل لتلاقي الجواب وتعيشيه وتحيي قلبك ..

موفقة ♡
®️