طل .....

مامعذور كل دمعي البجيته اعليك ..
مامعذور لأنك عزيز وعالزعل دلوك
مامعذور ..
خوفي وكل صلاتي انخاك
ياأجمل حلم راودني كل وكتي
ياأحله الأسماء من ارد اصيحلك
غاضوك مني وغيضهم ماكدرو يسموك
دللتك عكس ماجرحتني اهواي
حبيتك رغم كل الغرابه البيك
صورتك نهر وانا العطش للماي
عكس ماذبو حجر غايتهم يسدوك
وصورتك قفل ومضيع المفتاح
وجذبت اعله روحي وصدكَيت البيك
لأن مايرهم القفلك غير مفتاحي
عجيب اشلون فكوك ..
وكتبت اشيائي واشياءك على الحيطان
صوت
ومآذنه
وبيبان
تغفه انت وافز انا ورق من تاكله النيران
خيط بلون وجهك ينعكَد بالطيف
وجنح
وحجايه
واذان
وارسم اعله اشياءك أجمل لوحه للعشاك
تشبه اصوات العصافير الغروب ..
وعله اشيائي تلكَه دمعه ..
وتلكَه أسف
وتلكَه كل الناس عين
منين ماردتك خذوك ...
وشفت أكَدر اصيرلك ورقة الصفصاف
وأنت الطل ..
من أبرد أحس بيك الندى
والغيره عند الناس من طبع الفضول
وانا شدهة بال تاخذني وخذوك
وانا كلي انشده من تلكَاني وانا الكَاك
وما عندي صبر ..
كلي احترك لوشفت غيري يحاجوك
وارجوك ..
ارجوك ظل انت طل
كل غبشه مر بي برد اتحملك
ارجوك ..
بس مالي صبر اتحمل ايحاجوك ..

كاظم الفضلي