-كيفك يا حجة ؟- الحمد لله يا ابني ..-أنا جاية مشان خبرك خبر ما حلو ..-بعرف الخبر وحسيت فيه من لما دقيت ع الباب .. -شو هوي ياحجه ؟-ابنى يلي بالغربة مات صح ؟-ايه يا حجة .. الله يعطيكي الصحة والبقية بحياتك ..-تفضل فوت اعملك شاي .. -شاي شو يا حجه ! عم قلك ابنك مات ..-بعرف يا ابني .. ابني ميت من زمان .. بس قلي هوي كيف مات هل المرة ؟-مات هل المرة !! خلص شغل ب الليل وهوي عم يسكر المحل هجموا عليه حرامية بدهم يسرقوه وقاومهم ، قاموا قوصوه .. -كم ملعقة سكر يا ابني ؟-رح تجننيني ياحجه بس !! شو يعني ميت من زمان ما فهمتها ؟ شو هالصبر يلي عندك وطولة البال ؟ -يا ابني .. ما حدا بيهرب من قدرو .. أنا عارفة انو ابني رح يموت .. بس كنت بحاول خليه جنبي اطول فترة .. ابني مات من زمان لما تخرج من الجامعة وما لاقى شغل .. ومات مرة تانية لما راد يتجوز بس ما قدر يأمن قرض سكن ليشتري شقة يعيش فيها لان ما عندو واسطة .. ومات مرة لما أكل كف من واحد ما بيسوى و هو واقف على دور المؤسسة ليستلم المعونة ..ومات كمان مرة لما أبوه مرض وما قدر يفوتو ع مستشفى منيحة .. وبعدها شال همي وهم مرضي وهو ما كان معو حق ربطة خبز .. ومات مرة لما ...-بس يا حجة يرضى عليكي ..-معك خبر يا ابني .. آخر مرة قبل ما يسافر لما ودعتو كنت حاسة انو رح يموت .. سألني شو بك ، قلتلو ما في شي بس ما لحقت اشبع منك يا ابني ، قلي بشهر رمضان رح انزل ومنفطر ومنعيد سوا ... نحنا الفقرا بهالبلد يا ابني ما منفرح ب العيد اكثر شي منروح الصبح ع المقبرة ومنحسد يلي فيها لانن ارتاحوا من هي العيشة ... الفقير يا ابني بيرتاح لما يموت ، الحياة ما حلوة إلنا .. -والله ما بعرف شو بدي قلك ياحجه .. ع كل حال هي ٥٠٠٠$ من صاحب الشركة يلي ابنك كان يشتغل عندو .. -خليهم معك ، بتروح بتفتش ع الشب يلي رح يتغرب بدالو واعطيه ياهن وقلو ما تحرق قلب امك مثل ما انحرق قلبي .!#منقول_بتصرف