هذان البيتان للمجاراه
لا نعرف صاحبهما

حبيت لي ديره على شان مخلوق
ويجوز من حبه أحب القبيله

في ذمتي ما كل مطرود ملحوق
ولا كل من قفى تلاقي بديله

لصاحبها

🌹🌹🌹
وحنا على طاري الوفا غصب بنسوق
نظم القوافي والمعاني الجزيله

وفي ذمتي بعض القصايد تجي فوق
بيتين وتعدل من الشعر ميله

الهاجس العبدلي

بعض الجمال يكمله رقه وذوق
لا شك نسل اللي أصايل أصيله

يهيم فيه العقل والقلب به شوق
والروح يا الأجواد تمسي عليله

مكي الشامي

ماكل صوره تنرسم داخل الموق
ولا كل من هزت خفوقك جليله

بعض البشر يغريك بالحسن والذوق
وودك على داره تحط المخيله

صافي عسل ماخالطه كل ملعوق
يكفيك من عطر المزايين تيله

اشري ذهب لاصرت في لجة السوق
يغنيك عن شور الاوادم قليله
أبو علي

بعض البشر مايشبه كود مخلوق
انا اشهد اِنْ طرياه يسوى قبيله

لامن مشى في مشيته كامل الذوق
ولياهرج يشفي النفوس العليله

ابو اسماعيل

رد ابو ياسر

يسعد مساكم ياهل الشعر والذوق
يا اهل القوافي الطيبات الجزيله

بالهون يامكي على القلب برفوق
ولا شك فيما جبت ما فيك حيله

جلبت منقيه لعاشق ومعشوق
من غير وسم ولا عليها دليله

بيتين ما فيها ولا حرف مسروق
قوية المعنى ولو هي قليه

مانعرف الشاعر ولا صاحب النوق
الي نظم حلو الغزل في خليله

ويا صح ما قلتو لسان ومنطوق
وصحت جسوم من مرضها عليله

لاني بنا السابق ولاني بمسبوق
وخيلي على المضمار بيشد حيله

وكل يجر لحون والطاق مطبوق
وكل على ما قيل ولع فتيله

حبيت اشارك بالشعر وادخل السوق
وإن زادو الشعار بازيد كيله

يا وجد حالي وجد من حب مخلوق
يسعى لكسب رضاه واااعزتي له

لجله تعلق بالوطن سهل وعروق
ومن اجل عينه يكرمن له قبيله

وقام يتهيض يسجع بكل طاروق
ويقول ياهل الصوت منهو يشيله

فيه حنين وبالصدر رعد وبروق
والرجل لا من حب تسمع صهيله

الحب مثل الشهد في الطعم والذوق
ومنهو سكن قلبك لزوم تعنيله

ولا شك بان الناس تمتاز بفروق
والكل له رائيه وهذي الحصيله

وهذي ردودي بالرسن سقتها سوق
والعذر منكم لو ردودي طويله

رد
حسن بن قاسم قحل