الحكاية ياسِيِد لَمَنتى

[عادل صابر]

الحكاية ياسِيِد لمنتى

ــــــــــــــــــــــــــــ

يابلد أيه الحكاية!!!
فيكى ليه مليون حكاية!!
كل شارع فيه حكاية
كل بيت ساكناه حكاية
ع الطريق رامحة الحكاية
فى الغيطان طارحة الحكاية
فى العقول سارحة الحكاية
ناس تفضفض بالحكاية
وناس تكتِّّم ع الحكاية
ناس تفرّحها الحكاية
وناس تزعّلها الحكاية
وناس تلفلف فى الدروب
لجل ماتشوف الحكاية
وناس تبحلق فى العيون
نفسها تجمع حكاية
وناس تبيع العمر كله
تشترى بيه الحكاية
إللى عاش لجل الحكاية
واللى مات لجل الحكاية!!
واللى هاجر من بلاده
بعد ماعرف الحكاية
واللى عاجباه الحكاية
جاب فوقيها 100 حكاية
واللى كاسفاه الحكاية
جاب مبرر للحكاية
واللى تعباه الحكاية
قص منها كام حكاية
والحكاية بسيطة جداً
تافهة جداً..مش حكاية!!
وانتوا عاملينها حكاية
انتوا إللى قعدتوا تحكوا
لما كبرتوا الحكاية
نفسى اقولكوا ع الحكاية
بس خايف م الحكاية
تعملوها100 حكاية
والا يمكن تزرعوها
وتحصدوها100 حكاية
والا يمكن تخبزوها
والبلد تاكل الحكاية
والا جايز حد منكم
تتسرق منه الحكاية
ويتهمونى فى الحكاية
وابقى جُرسة و100حكاية
المهم انا مش حاادارى
نفسى افضفض بالحكاية
نفسى اعلِّّى بعزم صوتى
نفسى اطلع من سكوتى
بس خايف م الحكاية
والا اقولك مش حتفرق
اسمعوا منى الحكاية
صلوا بينا ع النبى
"كنت مرة ف حالى ماشى
مخى فاضى من الحكاية
شفت ناس ع الأرض تنزف
شفت نار فى الناس بتحرق
ناس غلابة بدون حماية!!
رحت سائل ع الحكاية
قالوا كله من الحكاية
أصله قاتلاهم حكاية!!
خت بعضى وتنّى ماشى
قلت عادى مش حكاية!!
شفت شيخ حزنان بيبكى
بالدموع يحكى ويشكى
جنبه حرمة شايلة عيل
بردانين والليل مليل
والزمن زى الرحاية
رحت سائل ع الحكاية
قالوا مش لاقيين حكاية!!
قلت عادى مش حكاية
خت بعضى وتنّى ماشى
بس مخى فيه حكاية
شفت عيل بندقوه
رغم إنه ف صدر ابوه!!
صرخته جرحت حشايا
رحت سائل ع الجناية!!
قالوا خايفين لما يكبر
تتحكى ليِه الحكاية
يبقى فاهم م البداية
قلت عادى مش حكاية
خت بعضى وتنى ماشى
بس مخى فيه حكاية
شفت سجن طويل طويل
من هنا لغاية اسرائيل!!
فيه ولايا وناس برايا
همهم زوّد أسايا
رحت سائل ع الحكاية
قالوا دول رفضوا الحكاية
بعد مافهموا الحكاية
قلت عادى مش حكاية
خت بعضى وتنى ماشى
بس مخى فيه حكاية
شفت خلق على الرصيف
باتوا يحلموا بالرغيف
والرغيف راح السراية!!
رحت سائل ع الحكاية
التقيت ظابط ورايا
يده خبطتنى ف قفايا
قلت عادى مش حكاية
رحت ماشى فى حالى دوغرى
بس مخى فيه حكاية
قصدى عنقى فيه حكاية!!
شفت واحدة مجرجرينها
عرضها معجون بطينها
قالعة توبها وقالعة دينها!!
بس ملفوفة بملاية
قصدى ملفوفة بحكاية
رحت سائل ع الحكاية
قالوا بتبيع الملاية
يعنى بتبيع الرباية!!
قلت عادى مش حكاية
خت بعضى وتنى ماشى
بس مخى فيه حكاية
شفت أطفال فى المزاد
قصدى أطفال فى الرماد
أهلهم نسيوا الوصايا
رحت سائل ع الحكاية
جاوبوا بنفس الحكاية
قلت عادى مش حكاية
كله عادى مش حكاية
خت بعضى وتنى ماشى
بس مخى فيه حكاية
شفت خلق فى ماتش كورة
باالف وش وألف صورة
شفت زيطة وزمبريطة
شفت هيصة وألف عيطة
قلت مالها الناس عبيطة!!
قلت ليه الناس هفايا!!
قالوا لهياهم حكاية
توهوهم بالحكاية
بلدوهم بالحكاية
واتلهوا وعشقوا الحكاية
قلت عادى مش حكاية
خت بعضى وتنى ماشى
بس مخى فيه حكاية
والحكاية بسيطة جداً
تافهة جداً..مش حكاية!!
وانتوا وسعتوا الحكاية
انتوا إللى عملتوا منها
100 حكاية..!!
بس انا عارف حكاية
هى دى أكبر حكاية
صلوا بينا ع النبى
واسمعوا منى الحكاية
"الحكاية انى ابقى ماشى
بس مربوط بالحكاية!!
الحكاية انى ابقى قاعد
بس مشلول بالحكاية
الحكاية انى ابقى نايم
بس مدبوح بالحكاية
الحكاية انى ابقى ضاحك
بس محزون بالحكاية
الحكاية انى ابقى عايش
بس ميت بالحكاية"
هى دى كل الحكاية
شفتوا إنها تافهة جداً
مش حكاية...!!
وانتوا إللى مكبرنها
انتوا إللى عملتوا منها
100حكاية..
والحكاية ياسِِيِِدلَمَنتى ..
مش حكاية..!!!
ـــــــــــــــــــــــــــــــــــ

[ريمه الخاني]

كانت قصيدة جميلة حقا وربما كثرة تكرار كلمة حكاية افقدها بعض رونق
وفقك الله وحماك وبانتظار المزيد المزيد

[عادل صابر]

كانت قصيدة جميلة حقا وربما كثرة تكرار كلمة حكاية افقدها بعض رونق
وفقك الله وحماك وبانتظار المزيد المزيد

الاديبة الكبيرة ريمة الخانى
هذا نوع من الشعر العامى المصرى الساخر الذى يكرر فيه الشاعر الكلمة عن عمد وبسخرية وفكاهة هادفة تثير المتلقى بما فيها من عنصر السسبس او التشويق فهو يكرر نفس الكلمة مع اختلاف السياق والموقف لكى يوضح فكرته بطريقة تهكمية ساخرة ..وهناك كثير من القصائد الشهيرة لكبار الشعراء سارت على نفس النهج ونجحت نجاحا مدهشا مثل قصيدة البتاع للرائع احمد فؤاد نجم وقصيدة حاجة للقديرة ايمان بكرى ...دمت لى ايتها الرائعة ريمة الخانى

[ريمه الخاني]

شكرا لك من جديد وننتظر جديدك دوما/وربما كلفناك ببعض ماذكرت من قصائد.
تحيتي لك