أنا قلبي طفل

[عبد الرحمن سليمان]

أنا قلبي طفل
واخد على خاطره من الدنيا قوي
علشان بتيجي كتير عليه
كده بالقوي
ماعرفش ليه اخواتي الكبار
بيفكّروني زيّهم
ويشيّلوني حمل قاطم ضَهرهم
وبيحسبوني وادخُلاصه وفهلوي
وأنا مش قوي
نِفسي أجمّع بالُّونات كل العيال
وانفُخها انا
على كل بالّونه هادوّن أمنيَات
مش هانسى احط ّفيونكه حمرا
فوق بلالين البنات
وياريت صبي القهوه يسيب لي جردلُه
علشان ارشرش فرحه
من وقت الشروق
ولحد ما الخوف ينطوي
وهاصحّي كل جيراننا من فوق السرير
خالتي سعاد
هابوسها بوسه كبيره خالص
عمو بهاء
يفضل يزغزغني لحد ما افطّ اطير
وهاروح لطنط ام ابتهال
هاعمل شويتين بَكَش زيّ العيال
علشان توافق إني أدّي سميره توكه ملوّنه
أنا آه صغيَّر بس أجدع طفل شاله حيِّنا
وسميرة بنت حتِّتي
وباخاف عليها زي أختي وصاحبتي
واتغاظ إذا هزَّر معاها أي واحد م الكبار
ما انا برضه راجل .. مش هزار
أنا قلبي طفل
بس فاهم زيّهم وسريع بكاه
وده مش عشان لسهْ صُغَيَّر
دا البكا في الخوف وَنَس
والحضن ساعة الموت نجــاه
فسيبوني أبكي -لو بكيت- ساعة ما احبّ
وسيبوني اغنِّي غنوه نونو مدندنه
وسيبوني أدعي ربنا بطريقتي انا
وهموم حياتكم دي .. عيشوها لْوحدكم
أنا عمري راجل زيّكم
لكنّ قلبي طفل حابب دهشته
رافض يعيش خوفه وأشجع منكم

ــ
إيمان الميهي


http://mmaqara2tt.com/index.php/verse/view/61

[غالب الغول]

ما شاء الله , قصيدة شعبية فيها أمل وأماني , أشكرك يا أخي عبدالرحمن , وبارك الله بك .
غالب الغول

[كاظم الفضلي]

هكذا هي براءة الأطفال .. فما أجمل
قلوب الأطفال حين نوظفها شعراً.
شكراً مشاركة رائعة .