ديوان الشاعر والصحفى إبراهيم خليل إبراهيم

[ابراهيم خليل ابراهيم]

أًحلِفْ

أحلف بحبّات العرقْ

سايلة تغنّى ع الجبينْ

أحلف بإنك دنيتى

واحلف بأيام الحنين

واحلف بإنك زرْعتى

واحلف بفاس الفلاحين

واحلف برعشة دمعتى

لمّا بازورك يا حُسين (1 )

أحلف بترتيل الآدان

وصمود ولادك فى الميدان

إنك يا مصرى فى عبورك

كنت أسطورة الزمان

إنك يا مصرى فى عبورك

كنت أسطورة الزمان
____________
(1) الحسين بن على رضوان الله عليه

[ابراهيم خليل ابراهيم]

العدل نوره انطلق


يا كلمة فيها الحق

يا قايلة للظلم لئة

وألف لأ

هدى جدار المحن

يدخل جرادها الشق

العدل نوره انطلقْ

ليل الضلام انشق

يا كلمة فيها الحق

يا قايلة للظلم لئة

وألف لأ

عدى خيولك للسبق

قومى انصرى المظلوم

وأمحى جدار الخوف

ولا يبقى فيه مهزوم

واللى طريقه سليم

مهما انكسر هـ يقوم

[ابراهيم خليل ابراهيم]

تفديكى أرواحنا

يا بلدنا فى الغُربة

قلبى على بابكْ

سايبه هناك .... عندك

صفحاية فى كتابك

للصُّحبة واللّمة

بينادى ويغنى

ويشد فى الهُمة

بحروف لعُشاقك

يا فاتحة أحضانك

تفديكى أروحنا ..

إحنا فدا ترابك

فى الشدة والمحنة

مجدك بيسعدنا ..

نصرك يفرّحنا

المولى يحميكى

ويهد أعدائك

ويقوّى فـ عزمك

ويشد بُنيانك

يا بلدنا فى الغُربة

قلبى على بابكْ

سايبه هناك .... عندك

صفحاية فى كتابك

[ابراهيم خليل ابراهيم]

دعوتك يا امه


دايما بتدعى لى

دايما تباركى لى

ودعوتك يا امه

قمره فـ ضلام ليلى

ورضاكى فيه بركة

بيشدّلى حيلى

فى الغربة أشوف وشك

بالسعد بيجي لى

فى الضلمة أشوف كفك

دايما بيدعي لى

يا ساكنه فى الننى

يدّوكى من عمرى

ياخدوا السنين منى

يا أمى برضاكى

المولى يرضينى

وحظى فى دعاكى

وربى يهدينى

دايما بتدعى لى

دايما تباركى لى

ودعوتك يا امه

قمره فـ ضلام ليلى

[ابراهيم خليل ابراهيم]

خُد منى يا ابنى

خد منى يا ابنى الحِكَم

علّمها لولادكْ

كل اللى عيشته فــ حياتى

خليته راس مالك

إياك يكون الجنيه

زادك وزّوَادك

وإياك تحس بندم

لو حظك فــ يوم فاتك

خد منى يا ابنى الحِكَم

علّمها لولادكْ

خلى الإيمان قبلتك

والطاعة عنوانك

لايجى يوم تنهزم

ولا يوم يسوء حالك

وتبقى عايش تملّى

رافع كدا راسك

[ابراهيم خليل ابراهيم]

إحكى وقول يا ورق

إحكى وقول يا ورق

عن خيرة الأجناد

فــ أكتوبر الميمون

كانوا رجال أوتاد

بيسجلوا قصتك

يا مصر بالأمجاد

لما عبرنا القنال

وارتاحت الأجداد

بارليف كمان اتحرق

والنصر بيّهم عاد

وسينا رجعت لنا

من تانى بالأعياد

احكى وقول يا ورق

وفرّح الأولاد

ألفين سلام يا جدع

لمحمد المصرى (1 )

ألفين سلام يا جدع

لمحمد العاطى ( 2)

ألفين سلام يا جدع

للمسعد الجواد ( 3)
___________
(1) المصرى : هو البطل محمد إبراهيم عبد المنعم المصرى الشهير بمحمد المصرى .. صاحب الرقم القياسى العالمى فى تدمير الدبابات حيث تمكن خلال معارك أكتوبر 1973 من تدمير 27 دبابة إسرائيلية بثلاثين صاروخاً .
(2) العاطى : هو البطل محمد عبد العاطى (رحمه الله) صاحب الرقم القياسى العالمى الثالث فى تدمير الدبابات حيث تمكن خلال معارك أكتوبر 1973 من تدمير 23 دبابة إسرائيلية .
(3) الجواد : هو البطل عبد الجواد محمد مسعد سويلم بطل معارك الاستنزاف والجندى الأسطورة .

[ابراهيم خليل ابراهيم]

يا زهرة البلد


يا زينة الصبايا

يا زهرة البلد

يا للى حبك دوايا

وفجرى اللى اتولد

شاهده النجوم عليا

ونبضك اللى فيا

أنتِ اللى باقية ليا

يا حلمى اللى اتوجد

حبك هو اللى باقى

بيجدد فى اشتياقى

يا سرّ كبريائى

ماليش غيرك سند

يا زينة الصبايا

يا زهرة البلد

[ابراهيم خليل ابراهيم]

الحروف فرحانة بيك
مهداه إلى الشاعر والناقد الكبير رفعت عبد الوهاب المرصفى


يا للى فاتح لينا قلبك

للصُّغير والكبير

يا للى دارك هىَّ دارنا

والصالون أكبر دليل( 1)

الحروف فرحانة بيك

والشعر والفن الجميل

فــ احتضانك للمواهب

يا ما قدّمت الكتير

وابتسامتك ليها معنى

طرحها زى العبير

يا للى فاتح لينا قلبك

للصُّغير والكبير

أصل دراك هىّ دارنا

هىّ بيتنا من زمان

لما أسّست الصالون

واتفرش فرحة وأمان

وابتدا يبقى لنا دور

فى الثقافة والمكان

يا للى بنحس فـــ لقاك

بالأخوّة والحنان

ألف همسة شكر ليك

نهديها لك بامتنان

. . . . . . . . . . .

فى الشهامة ليك قصور

وفـ صالونك ألف نور

والحروف لو كات بتنطق

كات قالت لك يا أمير

والكرم لو له ملامح

كان فـ يوم منك يغير

يا للى فاتح لينا قلبك

للصُّغير والكبير

الحروف فرحانة بيك

والشعر والفن الجميل

. . . . . . . . . . .

يا للى بيتك بالحفاوة يضمنا

كل شهر فـ ندوتك بتلمنا

فى حوارى مرصفا

بين الحبايب والمنى

القصايد بينا تفرح

والموسيقى والغُنا

والحوارات الجميلة

والفكاهة والهنا

وفـ نهاية الأمسية

صار وداعك للجميع

زى أروع أغنية

وفــ نهاية الأمسية

صار وداعك للجميع كالتوصية

" اللُّقا دَيما هنا "

" اللُّقا دَيما هنا "
_________
(1) صالون الشاعر رفعت المرصفى تم تأسيسه بمنزله بمرصفا منذ شهر يناير لعام 2003 وتعقد فيه الندوات الثقافية ويستضيف كبار الشعراء والأدباء فى الخميس الأول من كل شهر وتصدر عنه سلسلة دورية صدر منها حتى الآن أكثر من أربعين كتاباً .

[ابراهيم خليل ابراهيم]

أمانة عليك...
مهداه للشاعر الكبير فؤاد حجـــــاج


فؤاد حجــــاج

مانيش محتاج

أقول عنك

فؤاد حجــــــاج

كلام الحب

من فنك

حروف العزم قنديلك

سواقى النيل مواويلك

فؤاد حجـــــاج يا مجدافى

يا صوت المسرح الدافى

يا كتف حماسه متعافى

وساند كتفنا فنك

وطول ما أنت ويانا

تروس الورشة عرقانة

وكف إيدينا بينوّر

إذا مسينا أوتارك

يا نبتة حلوة فـ غيطانا

يا وردة فــ ضل بستانِّا

أمانة عليك ما تبعدشى

وخلي الموج ما يحدفشى

سيورنا حالفة ما تدورشى

وبتدّورها أشعارك

سيورنا حالفة ما تدورشى

وبتدّورها أشعارك

[ابراهيم خليل ابراهيم]

إحكىِ يا سطور الغناوى


الحقيقة وباختصار

الشراقوة دول كُّبار

لما من شدة كرمهم

ضيّفوا كل القطار

لما من شدة كرمهم

قدّموا أحسن فطار

والقيادة والأهالى

قدّمولهم كل غالى

فى البلد صبحت حكاية

من حكايات الليالى

إحكى يا سطور الغناوى

القصص ويّا الحكاوى

عـــ الرجولة والشهامة

عن بلد صارت علامة

من علامات النهار

الشراقوة دول كُّبار

لما من شدة كرمهم

ضيّفوا كل القطار

لما من شدة كرمهم

قدّموا أحسن فطار