ماتخـــافيش يابهيـــــــة
عصــــام ميـــــره
‎‎.........................................
ماتخافيش يابهية يابهية ماتخافيش
وإن قالولك إحنا شعب وهما جيش
ماتصدقيش ...
إحنا هما وهما إحنا
كلنا نفديك بروحنا
مهما جينا مهما رحنا
يوم قاسينا ويوم فرحنا
زى حضنك مانلاقيش
.......................
ماتخافيش يابهية يابهية ماتخافيش
إوعى مرة يخطر فى بالك
عدو يدخل فى يوم مجالك
أو يمس فى لحظة شالك
إحنا أسودك .. إحنا رجالك
حاميين حدودك .. صاينين ترابك
فى جنوبك ..أو .. فى شمالك
من حلايب للعريش
يابهية ماتخافيش
.................................
.................................
يابهية الفجر لاح
وانطفت نار الظلام
وابتدا نور الصباح
يفرد جناحه ع الأنام
لما شبح الظلم راح
الخير ظهر عم السلام
الكل قال خلاص هعيش
يابهية ماتخافيش
.........................
.........................

إحنا جنودك فى الميدان
ونشرفك وقت السلام
يابهية آن الأوان
نعبرها خطوة للأمام
دق الجرس صوت الأدان
بدأ العمل خلص الكلام
من النهاردة الخوف مفيش
يابهية ماتخافيش
.......................
كلمات : عصـــــــام ميــــــــره