إفهمْ يا فصيح00!!؟ دعوة للمشاركة

[الشربينى خطاب]

إفهمْ يا فصيح 00!!؟

ليلة إمبارح
سمعت حمار
بيقول للديك
بكلام تلقيح
وحشنا صوتك
يا فصيح
قوم يالله أذن
سمَّعنا وصيح
****
ولاَّ انت
يا صاحبي
مش قادر
تتطلع صوتك
ولاَّ العمدة
أبو مخ طخين
مدَّاش تصريح 00!!؟
****
سهران تتفرج
علي فعل أبيح
عرضاه الوزة
أم التصاييج
في كلب صريح
تيس مع عنزة
في وضع أبيح
****
لك حق تنام
مخمود همدان
للساعة اتنين
من كتر الفرجة
علي الحلوين
بتارين جمعية
جايبه منقيه
فراخ عريانه
بوراك مليانة
نايمه سطيح
***
ما تقوم يا ديك
قبل الضهريه
الله يخليك
أذن ف الخلق
النعسانة
أصرخ صحيِّهم
يالله وصيح
****
أفهم يا حمار
و إتعلم مني
أمتي تتكلم
وامتي تصيح
امتي تجحش
وتبلم
أو حتى تقمَّصْ
وتسلم
بالجوز وترفص
في الريح
****
اعرف يا حمار
أمتي ترد
بكلام في العضم
من غير تجريح
مش كل كلام
علي طول ينقال
كده في الحال
ولا كل حمار
ينفع شيال
دا كل شيء
في أوانه
يبقي مليح
فاهم يا فصيح

[فتى الشام]

اعرف يا حمار
أمتي ترد
بكلام في العضم
من غير تجريح
مش كل كلام
علي طول ينقال
كده في الحال
ولا كل حمار
ينفع شيال
دا كل شيء
في أوانه
يبقي مليح
فاهم يا فصيح

نعم ايمتى؟
تسلم ياكاتبنا ياجميل
كان نفسي اشارك لكني مش شاعر
مرور وتحيه
فتى الشام

[دكتور أحمد الليثي]

افهم يا فصيح
من غير تلميح
شغل العضم ده شغل أبيح
قدرة ومخرومة
بصدى وبارومة
تخر عليك، والخيبة مفهومة.
من غير دوران
مكياج ألوان
حالف لنجيب له يا رب جنان.
هو المفضوح
وده واد سنكوح
ما يعدِّي بدون سلخ ومجروح
جابه لنفسه
يوجع ضرسه
أما فضايحه بصوته وحسُّه.
تصفيق تصفيق
مجرم بفريق
نصه يطبل، والنص نهيق.
اجروا يا غلابة
ده والله عصابة
شغل التهليب والنهَّابة.
قام يتبرع
راح متكرَّع
ع الموقع يجري ويتسربع:
ويقول في كلام
ولا في الأحلام
وجاموس بيصدق دي الأوهام.
خيبة وخيبتين
على جوز الاتنين
صحصح يا عبيط، تضحك على مين؟
مفضوح مفقوع
عيل جربوع
ما بيفلت إلا وأيه موجوع.
مزنوق ف اليَك
في عجن ولك
حطوا في قفاه إبرة وتنشك.
جُـروه وشِدُّوه
عنـز ودبحـوه
إدُّوه شلوت وكمان إتفوه.
أصل الهلافيت
بيقولوا تصويت
على صوبع من أصل الخراتيت.
واللي يخالف
واللي يناكف
يسمع شتم الصوبع التالف
ياللا يا بنات
تلطيم وصوات
أصل المدعوق عنده الأموات
نايمين واقفين
رايحين جايين
نازلين تدعيم ف أبو مخ تخين
ما في عنده كسوف
ولا ذمة، وشوف
أيه اللي بيحصل للملهوف:
بيحطه ف كرش
أكبر م القرش.
قربت خلاص، خطوة و عَ البُرش .
أما اصحابك
ولاّ احبابك
بكره يْحِشُّوا يا واد فِ جْنَابَك.
عامل شبِّيـح؟
ما تجيب سرِّيح!
هاتروح ف أبو نكلة بدون تصريح.

[دكتور أحمد الليثي]