بمناسبة فيلم حلاوة روح ..(من انتاج السبكي برضه!!)
سيما أونطة..
ياعم يا عامل سيما
مالهاش قيمة..
فيها بلطجة وفيها شتيمة
وبلدنا مجروحة بتبكي ..!!
ياعم يا عامل أفلام
شبه البرشام..
خليتوا مصر هباب وسُخام
وخلق مسطولة بتشكي !!
أفلام رخيصة ..ببريزة
قاصدة غريزة..
خلاص مفيش حاجة عزيزة
يا سيما .. عمّالة تعُكى
والصورة محشورة بنسوان
لابسين عريان..!!
ما لقيتش حاجة فى الانسان
غير الرخيص عنه بتحكي
مش سيما دى أفلام بورنو
يخرجها مخرجها بقرنُه
وقصة سخنة بنار فُرنه..
ينتجها (قُرني) أو (سُبكي)
والدم ع الشاشة طراطيش
والمعنى مفيش
غير بس مطوة وقرش حشيش
وأغاني حزنانة بتبكي..
يا ابن الأسد(وبلاش حَرَمُه)
الفن لازم تحترمه..
سقف الحيا مين كان خرمه
يا مأكدين ظني وشكى
علاء عبد المنعم