يالطيف .؟. شو شامي عتيق

[فراس الحكيم]

يلي ماعنده فكره عن اللهجة الشامية العتيقة والاصلية يتابع شوية هاالجمل في اللغة العامية الدمشقية واذا عرفها يبعتلي واذا ماعرف بعض الجمل يبعتلي لحتى فسرها بتمنالكم السرور

اذا ماكنت شامي (قح) لا تحاول تقرأ لأنك ماراح تفهم شي

أول ما جهجه الضو،
اجا يوسف ليشطف البيت،
منشان البق،
سكّر باب الصئاء،
شلح الشحاطة منشان ما يجقجق،
و جرجر الكراسي و شئفة الزريعة،
تكتك شلون بدو يشطف،
بحبش شوي،
دندل و شقل المي من الجب،
سخنا عالنار لبقبقت و بربقت،
و كتا بالحوش الجواني بالطاسة لانو ما عندون لا سطل و لا بربيش،
و دعك الارض منيح من الزفر لانو دبقة، فك الكمر ليترحرح و شلح الشلحة،
منشان ما تتشحور،
و شلفا وراه،
و فشخ فوق المي،
و دقّر شوي،
و بعدين نط بجعزة، تفشكل بكومة دف،
و انطبش جواتا،
طبشة آتولية،
و انجرحت ايدو حشك ولبك،
و قام جعّر آخ يا يامو،
يا يابي،
اجت امو وبإيدا الطواية و قالتلو يي يي،
ليش عمتحوص و تلوص متل الببو،
كنت مسيك الدرابزين،
شو مفشفش، قعود عالبرطوشة،
و تلئح عالزيق، و حاج تفرتّك،
دحتّو دحة،
و جابتلو شقفة شرطوطة و ربطتا بعد ما خسلتا بالمي،
و طرطشت تنورتا،
و قالتلو يلا لشوف قوم تغندر.



مع تحياتي ابو الكيم
منتدى سوريا او نلاين

[سوريه ابن عن جد]

شكرا فراس صحيح انو اذا ما كنت شامي مش رح تفهم شي بس انا موشامية بس فهمت هههه

[ظميان غدير]

هلا يا فراس

سورية ابن عن جد مو شامية وفهمت
وانا اصلا مو سوري وقربت افهم شوي ههههههههه

[جمال الخطيب]

السلام عليكم
كلماتك شامية عتيئة تسلملي
باقة ورد

[رغد قصاب]

ههه اكتر من هيك مافي خيو
وممنونتك يافراس يا شامي انت عتيق هه