يخرب بيتكم ...قصيدة للدكتور أبو زيد بيومي

[مروة عصام]

يخرب بيتكم
قصيدة للدكتور أبو زيد بيومي
عضو اتحاد كتاب مصر



مش خلصانة ليه حواديتكم
مش بتفضّوا ليه في سيرتكم
اتوضّــيتوا بدمّ بــلادي
ولا فيش ركعة شرّ تفوتكم
يخرب بيتكم

ياللي سرقتوا الكرسي بــ خِفّة
نزلت كَفّة ... وطلعت كَفّة
أعمى بيمسك صاري وْ دفَّة
غرقت أرضنا في جَهَالتكم
يخرب بيتكم

ياللي سجنتوا الشعب فْ هَمُّه
ياللي شربتوا كاسات من دمّه
بَسّ .. كفاية .. يا ريت تِتْلمّوا
يوم ورا يوم بتزيد عداوتكم
يخرب بيتكم

ضيّعتونا جيل ورا جيل
و حَبَسْتونا في التأجيل
و فرشتونا تراب و نَجِيل
فوق روسـنا ترتاح خطوتكم
يخرب بيتكم

كل ماروح ف حتّة ألاقي
ليكم فيها ديول وبواقي
لمّا أدوّر إيه الباقي
دي حِـتّــتكم ... دي حِـتـّـتْكم
يخرب بيتكم

ما تْعبتوش لـَفّ ودوران
ما شبعش الكلب السعران
ياللي ضميركم فيكم هان
مات ماسْــتناش لحظة موتكم
يخرب بيتكم

حِلّوا شويّة وسيبوا سمانا
سيبوا الأرض تحسّ خُطانا
ليه جايّين على بُكرة ورانا
بعد الماضي ما أكله حوتـْـكم
يخرب بيتكم

نعمل إيه .. يعني نْسيبهالكم
نفضل يعني عبيد سلاسلكم
نفضل فوق اكتافنا نشيلكم
نـحبس كل كلامنا فْ صوتكم
يخرب بيتكم

هل جُوّاكم فيه إحساس
انتم ناس ليها قلب وراس
و لاّ أبالسة ولابسين ناس
طب إيه ينفع فِ جبِلّتكم
يخرب بيتكم

لو شياطين ... قُلْنَالْكو أعوذو
لو إنسان ... لوينَالْكم بوزو
إيه يصرفكم ... إيه بِتْــعُوزوا
إيه يفنيكم ويفتّتكم
يخرب بيتكم
يخرب بيتكم

[/size][/center]

[ريمه الخاني]

رغم ان العنوان مسبة...
لكنها مؤلمة غاليتي..والله مؤلمة ونحن نرى بلادنا والشعب المظلوم الاول ...
لك محبتي واهلا بك دوما

[عبد الرحيم محمود]

شاعرنا الرائع
والله يستحقوا يخرب بيتهم
الأمور مختلطة والربيع صار
خريفا ، والأمور لا يسودها
غير التزوير / صدقت تحيتي .

[كاظم الفضلي]

الأخت مروة عصام .. شكراً على هذا الأختيار
وتحيتي للشاعر للدكتور أبو زيد بيومي فقد
اجاد وكشف لنا خفايا التغيير والربيع . قصيدة رائعة


كاظم الفضلي

[فيصل الملوحي]

ذلك هو الانسجام الخلاق!!

مسبّة في لغة العوام،

فشكراً لقائلها وللشاكرين!!

[الهام بدوي]

فعلا رائعة جدا وفعلا يا ريت يخرب بيتكم ضيعونا سنين وسنين ولسة قاعدين مستنيين يضيعوا اللي فضل فينا
ىه يا رب خلصنا منهم ومن شرهم وبيدهم يا رب تنصر مصر وتوحد قلب ولادها على الخير والنور ويا رب هي وكل بلاد المسلمين اللهم ىمين وشكرا على هذا الاختيار الموفق جدا غاليتي وكل عام وانت بخير ويخرب بيتهم !!

[فيصل الملوحي]

لا إله إلا الله.

اللهمّ أرنا الحقّ حقّاً ، وارزقنا اتباعه،

وأرنا الباطل باطلاً، وارزقنا اجتنابه.