مسمار جحا .....

[مصطفى الطنطاوى]

مسمــار جحــا

تعبيريات
لو فتحت جريدة وشوفت صورة للرئيس أوباما وأحمس وشارون وقائد الهكسوس بيناقشوا عملية السلام يبقى حاجة من اتنين، يا اما انت بتحلم، او بتقرا جريدة قومية
*******
الحزب
بعد إنتاج التلفزيون المصري مسلسل: الجماعة..
متهيألي المصريين كلهم عندهم استعداد يشاركوا في اكتتاب عام لإنتاج مسلسل ضخم بعنوان: الحـزب
*******
ترشيد الكهرباء
الحكومة قررت ترشيد الكهرباء وتقليل الإضاءة في الشوارع
وقالتلك إيه لازمة التكاليف طالما: مصر منورة بأهلها
*******
قصرية البانجو
صرح مسئول بارز بوزارة الثقافة بأنه سيتم بشكل مؤقت ولحين العثور على لوحة (زهرة الخشخاش) عرض اللوحة النادرة (قصرية البانجو) بدلاً منها
*******
محافظ القليوبية
محافظ القليوبية بيقول ان انقطاع الكهرباء والمياه وارتفاع الاسعار تضاعف من ثواب الصائم.. يااااه
واحنا اللي كنا ظالمين الحكومة وفاهمينها غلط
*******
مين يقدر؟
يبدو انه فى مصر لا توجد محاسبة إلا فى كلية التجارة
*******
استطلاع الوطني
في استطلاع للحزب الوطني: مفيش أي زيادات في الأسعار
والبطالة انخفضت و20% من الأسر مستوي معيشتها أرتفع..
هما امتى هيسيبوا الدول التانية ويتكلموا عن مصر شوية؟؟
*******
اعمل إيه
يا ترى لو مسكوا ولي أمر معاه 5 كتب خارجية..
هيتحبس اتجار ولا تعاطي؟
*******
تعالو نفكر
الصورة المفبركة طلعت صورة تعبيرية
وعقد مدينتي الفاسد اتضح انه خطأ اداري..
تفتكروا انتخابات مجلس الشعب الجاية هيتقال عليها ايه؟
*******
زكاة الفطر
تسهيلا على المواطنين قررت الحكومة نشر قائمة بأسماء المواطنين غير المستحقين لزكاة الفطر حيث بلغ عددهم 187 فرد
*******
الزمالك المسكين
رئيس الزمالك بيطالب محبي النادي بالتبرع
علشان يدي شيكابالا 6 مليون في السنة
وفتح الله 3 وهانى سعيد 3..
أجيب شعر منين تاني عشان أشد فيه؟
*******
شكراً
الحكومة بتقول شكرا لـ 80 مليون مصري
لسه قادرين يعيشوا فى مصر
*******
عيد ميلاد
ملكة بريطانيا لغت حفل عيد ميلادها مراعاة لشعور شعبها
اللي بيعاني من أزمة أقتصادية..
أكيد دي لو في مصر كانت زمانها انتحرت
*******
من اجلك أنت
متر مدينتي بنص جنيه وكيلو الطماطم بعشره جنيه.....
من أجلك أنت
*******
الكتاب الخارجي
اليومين دول، لو عاوز تلبّس حد مصيبة حطّله كتاب خارجي في شنطة العربية وبلّغ عنه
*******
بدر والكتاب
وزير التعليم بيقول
"الكتاب الخارجي يقتل في الطالب روح التعلم والإبتكار"..
طب ما الكتاب المدرسي بيقتل الطالب نفسه
*******
قمر تايه
المفروض يتم نشر صورة القمر المصري المختفي
علشان اللي يلاقيه يتعرف عليه ويرجّعه لأهله
*******
سواقين الميكروباص
خبر سار لكل سواقين الميكروباص والتوك توك..
تقدر دلوقتى تفوّل التنك من النيل مباشرة
بعد تسرب مئات الأطنان من السولار في مياه النيل بأسوان
وده بس بمناسبة العيد..
وكل سنة وانتم طيبين

[رغد قصاب]

ملعوبة ياعم مصطفى
ومرور وتحية