عيش .. حرية .. عدالة اجتماعية
بقلم : أميرة فايد الناحل


يا مصر تحت الكفاف ..
عاش نص أهلك ليه
والباقي بين مستور وبين معسر
هتف شبابك عيش ..
دار الهتاف في الكون
رقت قلوب البشر
والفرد داب في الكل
اتربص المنصر , واترصص العسكر
نفثوا في سماكي غدر
نعتوا النبيل بالند ل
واتمصمصوا في عجب :
ولما يبقى عيش
ها نلهف احنا إيه

يا مصر ياللي حلمها حرية
تهفو لنورها ف كهفها المعتم
صحيو شبابك منذ عام مر
نفضوا العفن , الكهل غار
واستقام الضهر
وغزلوا توبك جديد خيط نور وخيط عنبر
وخيط دم طاهر , ثائر حالف ليمحي الذل

يا مصر ياللي بتحلمي بالعدل
بينك وبينه زور وبطش وجهل
بينك وبينه طريق واعر وضبع وكلب
وايد خراب عششت فتنة وسفك وسلب
ويقولوا يكفي خلاص .. ده هو صوت العقل
زأر الشهيد :يا مصر
خرس لسان العهر
: خطي على جسدي ..عدي
, وحني إيدك دهر
يا حبيبتي آن الخلاص وبكرة ضيه هل
وعلى امتداد الشوف ..
أراضيكي طارحة فل
شايفه بعين البصيرة
بعد البصر ما اعتل
يا حبيبتي لاح الفرج .. ذاق الأمل ناسك
وما يستسيغ اليأس , من بل ريقه بيه
وضوى عزك هلال , وتمامه في خلاصك
ومستحيل يوم نهون , أو نفرط فيه
وحصحص الحق وحشينا رأس الطواغيت ..
والحاشية دورها جاي
مهما ها يحصل إيه
وكل أهلك جنودك
, متأهبين ثوار..
متوضيين بالحلم ,
ها نصلي جمعا بيه