ليلة الوقفة!!
آه ياامي شو عذبتك
بليلة الوقفة يوم ضيعتك بالحميدية....
قليلي خليك هون محلك..
حستناول غرض من هون وارجعلك...
ورجعت ومالقيتك....
آه ياامي شو زودت همك....
شو رحت وأجيتِ...
نحت وبكيت..يعليي...
شو فورت دمك...
شو فرحت لما شفتك من بعيد...
لما شفتيني...
ورجعت ضيعتك..
ريتني ضليت مكمشة بروبك....
كفي بكفك ورجلي على رجلك...
20 سنة وانا عم دور عليك...
بهالحميدية وماعادت شفتك....
عم تسمعيني؟
*************
بقول لتكون بعدها بهالدكان...
عم تشتري خيطان...
لتكون نسيت ضيعت هالعنوان...
ورجعت لبيتنا الكبير بالقيميرية...
بلكي خطفت رجلها من هون لمادنة الشحم؟
لبيت خال أبي بيت الكسم...
ولا نزلت من هون للعمارة
وعم تعمل زيارة لعمتي درية...
هي هية هي هية نفس الجسم...
نفس الكسم..بعجل بعجل بصير وراك...
بثانية بتلتفتي وحدة تانية!!!!
*************
آه باامي كيف بنساكي...
في شي بهالدنيا بلاكي...
مشتقتلك...مشتاقة لعيونك الخضر...
لضحكتك لطلتك...
وللوش الزهر...
لهالقدر والاكابرية...
آه علي ضاعوا وماعادوا التقوا...
بتحاكيهم مابيردوا...
بتنادي عليهم مابيسمعوا...
آه ياأمي على هالمشوار...
الي ماالو رجعة...
لهالعمر...
على هالقلب..
غصة وراىه غصة..
ودمعة على دمعة..
دخلك من أي دكان بيجيبوا هالصبر..
متل القبر...
***********
آه ياأمي على وحشة البيوت الكبيرة لما بتفضى على وسعها..
لما بتدبل ورودها...
وبيموت بالحواض زرعها...
آه ياأمي على فرحة العيد..
ولمة الجمعة..
نيال الي الو ام..
منورة بهالبيت...عم تستناه
بيشكيلها وتشكيله..
تهدي باله..
وهو حيران..
تكفكف دمعته وهو زعلان..
كفها على جبينه وهو سخنان..
يسمعها عم تصلي..
وتدعيله..
يحملها قلبو..بعيدها هدية...
تقلو يعليي
ليش هيك غلبت حالك...
شوفتكم بعيني هي الهدية...
**************
آه شو بتشبهك هالحميدية...
عطرها بعطر خزانتك...
تطريزة عبايتك...
مروحتك...
محرمتك..
مسبحتك
سجادة صلاتك..
اساورك..
خواتمك
ومبرومة الدهب...
الطاسة والكاسة..
وبرنص الحمام...
وبقجات القصب...
من هون اشتريت لي لعبة..
وأنا صغيرة..
من هون جهزتيني عروس..
وأنا كبيرة...
من هون اشترينا ديارة للأولاد...
كراوية للمباركة..
وسكاكر للعياد...
من هون مرقنا...
من هون فرقنا...
من هون فتنا للجامع الكبير...
دعينا وصلينا...
وقلتيلي يعلينا سرقنا هالوقت...
بدنا نعجل نساوي هالمعمول...
نشترير آس ونكمل الختمة..
بكرا لعندو والدنيا عتمة...
مشتقتلو..
ماشفت يوم أبيض من يوم فارقته...
من يوم ضيعته...
ستي ستي...
ليش عم تبكي...
زعلتك أنا شي؟
هالبنت بنتي...
بتحاكيني..لأ ياحبيبتي مازعلتيني..
عم ببكي من حالي...
حاشتريلك اللعبة الكبيرة...
والبالون والمسكة..
خليك ماسكة ايدي منيح...
لاتضيعيني..
اي هيك هاه..
افرحي ونطي تسلميلي..
تسلم لي هالضحكة..
نائلة الإمام -2015