تأملات

اليوم ده يوم الملتقي
فيه الأحبه مروقه
ناسيه الهموم ويا الشقي
شايله في حصاله العيون
لمعه ودمعه مشعلقه
فيها الدفا
يمحي الجليد
يتحول الوضع البليد
لهتاف زفاف المعشقه

......
اليوم ده كان فاتح بيبان
سجن المكان الي اتنسي

آدي البراح طعم الحياه
وآدي الوطن مفهوم مداه
جوه عيون إلي لقي
حبه أمل جوه الورود
فوق الخدود الطيبه

..............

حنيتِك يا حضرِتك
خضره تزين جبهِتك
وتلملمِك يا عزِتك
يا بهجِتك وسط الزمن


قلبك بياض لون اللبن
حضنِك رقيق زي الدقيق
وياه مشاعري بتتعجن

غني العيال قلب الرجال
ويا البنات كحل الشجن
والامهات شايله الحاجات
الي ما تتساوا بثمن
...........
اليوم ده يوم الملتقي
فيه الأحبه مروقه
ناسيه الهموم ويا الشقي



طب إيه بقي؟


يا سكرك
من مظهرك
محتاجه عدسه في مجهرك
لتشوفي مين بيمررك
ويمرر العسل الجميل
في نيل طيابه معشرك

يا معشرك
..........

عمرو السعودي