ديوان تغريدات فى حكم الاخوان بالكامل بقلم امير المنشاوى

[Amir Ahmed Elmenshawy]

ديوان تغريدات فى حكم الاخوان اهداء الى الشعب المصرى العظيم
كتب فترة حكم الاخوان لمصر وهى عام واحد والحمد لله تم نشر بعض القصائد منها للجمهور اثناء فتره حكم الاخوان امثال ( حالو يا حالو - إمعه - رثاء - حرف تسعه - فناكيش - نهضه - براءه - يا مصر ابنى - ياسمك ايه ) والاخر لم يتم نشره وها انا اضعه كامل بين يد القراء لعله يحوز اعجابهم


اخونجى

اخوانجى رابعه إرهاب بينخر
غاغه وشناعه يشتم ف عسكر
قال ايه شجاعه لأ يبقى منكر
إسلامنا يابنى دين إنسانيه
مافهوش شتيمه ولافيه رظيه
ولا فيه وقاحه كله سماحه
ولا فيه عصابه ولا بلطجيه
ولا قذاره ولاسفاله ولا هفيه
دخلتوا دنيا بمدخل عماره
سكانها قالوا همجى وحقاره
رابعه وطفشوا سكانها هجره
ريحه وأباحه وبجاحه نادره
غابه وديابه ماهى دى الحقيقه
تقتل تعذب ف نفوس بريئه
من غيرلا رحمه ولا إنسانيه
وتقول شريعه وهيه ديه
حاتبنى الاماره , الفين تحيه
اطفال وقلتم مشروع شهاده
نسوان حشرتم قدامكوا عاده
ما دى الرجوله شوفتوا يا ساده
قيادات بتفتى بإرهاب زياده
من اجل كرسى فيه السعاده
وأوعى يا خيخه تقولى بياده
انزل يامصرى فوضلوا بكره
واهتف لسيسى عشت ياعتره
شوف يابن بلدى من غيرفضيحه
لملم وإخلى قبل الطريحه
ومش حا يرجع تانى يا صفصف
انسى ياشاطر ده كان فضيحه



أذن فى مالطه

اذن فى مالطه ماهو حكم عايب
سنه واحده شوفنا فيها العجايب
قال مش حا يمشى لزقه وجايب
صناديقه حجه وكلامه عايب
ميلشياته عملت كل المصايب
تهدد حاتسحق شعبك (عجايب)
خربت وبانت سنينك يا خايب
تقتل وتحرق وحماس حبايب
حزبك وحزبه ما هو كله قرايب
خدعتنا كلمة نهضه يا خايب
دا شباب تمرد زلزل كيانه
كشف له ستره ضعفه وهوانه
قالوله أمشى ياوحيد زمانه
ياشعب أخلع دا مش مكانه
زى اللى قبلك أمشى كفايه
قال مش حايمشى عنده حمايه
لسانه تركى وأمريكله كيانه
شعبك حايرفض فرض الوصايه
حاتقوم له ثوره من غير دعايه
تخلع جذوره وتنهى الحكايه
تلاتين يا يونيو هى البدايه
ياشعب أثبت حتى النهايه



السلطانيه

اخص عليك لأ اخص عليه
مش عارف ليه سفرياتك
روح وتعالى كل شويه
تسوق نفسك يا حركاتك
إختارناك وصعبت عليه
مش حا يفيدك غير أعمالك
جوه وبره مبهدل فيه
شعبك مكسوف م اللى جرالك
المانيا وباكستان والسلطانيه
شوف بقى أيه جه ف كلامك
عابوا عليك مش عابوا عليه
ده العالم بزيادة يحترمك
لو تبنى صروح التنميه
والعدل يسود فتره حكمك
من غير دكتور ولا تزكيه
إسمع منى وقول لجماعتك
توقف حسابات التصفيه
لرجال أعمال مش حا تهمك
وضرائب إسافين تشفيه
واللى بيخسر هما ولادك
بطاله وفقر وتعنيه
دى قراراتك من يوم حكمك
لجماعتك تجار أغذيه
تهدم صناعات تخدم وطنك
ما يفيد فيها يوم تعزيه
هات بايدك وناولني وخدلك
تسعين مليون طيشه هفيه
همه دول الشعب فى نظرك
متقوليشى قلبك وعنيه
دول اتسحلوا فتره حكمك
لا يساوى ولا حتى طاقيه
كذبوا عليك قارئين أفكارك
قلوظوهالك لأنجازاتك البهيه
أفتروها وده عيب أغشك
سقسقوها وقطروها جوه عنيه
انجازاتك هزت صورتك
غور ماتجيش وبالف تحيه



إمعة

أنا لن أكون كما أردت
أن أكون إمعة أو كقطعان البقر
أو ساذج مخبول تابع لقرارات
التخلف والمجون بأسم الوطن
أنا لن أعيش بحضن وطن يحتضر
أنا واحد مما تمنوا أن يناصرنا القدر
أنا حر بالسليقة والبديهة والشعور وبالفكر
أنا مفطور بالعدل معجون بالشهامة والمروة
والاصالة والفتية والكبر
أنا أصل الحضارة والفنون وشموخ
منارات العلوم شاهدة عبر الزمن
أنا المصرى أكون كما أكون فأنا من
يكتب التاريخ ويمحو بدماه المحن
انا لن أعيش عصر الجهالة والمهانة
ودعاة التخلف والفتن
صوتى لمن يصون شعبى يرعى الفقير
ويمسح دموع الحزن
أنا المصرى صبووووووووووووووووور
غضبى حمم



براءة

من بعد براءة للطغيان
الشعب يريد ياكل وينام
ثوره وماتت ياإخوان
هيص يالله يا عم سخام
بكرة حايرجعلك سجان
يعمل فيكو أحلى كلام
دوق وإسلطن من ألوان
طعم الذل بكل لجام
يطلب حكم سابو زمان
بالقانون وبدون أختام
يشرح فيه وبكل لسان
محلى دولى وحقه تمام
وليه دا الحكم ليه يا جبان
أهالى الشهدا مش حتنام
سعد وقالها فى كل أذآن
مفيش ولا فايده بأى نظام
الظلم وعشش فى الميزان
والثوره وداستها الأقدام
والشعب بعد العدل م هان
شاف نفسه لعبه للأقزام
وحاينزل بكره للميدان
وينادى باسقاط النظام
ويعيد ويزيد نفس الأحزان
ياشعب ساعتها أوعى تنام
ليقولوا عليك مخبول خرفان
ويسرقوا منك صفو الأيام

والثورة تموت على كل لسان
وساعتها تقول آكل وأنام
وتسلم أمرك للديان
وتعيش مذلول مهموم
غلبان



بيع

الا أونه الا دو الا تريه
إتفتح المزاد بريال
صلى وسلم عليه
قطرى أوغيره شغال
قبضنى فورى يابيه
بضاعتنا جاهزه فى الحال
إشترى بقى أهرام الجيزه
وحاديلك فوقها القنال
أو خدلك سينا دى لذيذه
حنسكن فيها البغال
راح تغلى وحتبقى عزيزه
وحا يرمح فيها الخيال
شاور زوزه المنبوذه
وإسالها ميت ألف سؤال
أشترى كل المحروسه ؟
ولا كفاية القنال
عشمتنى يابن المحظوظه
وضحكت علينا العيال
أدتنى سكه وصابونه
صكصكتنى وحبست المال
غرقتنا بقروض محسوبه
راح ندفع فيها لأجيال
بيع ما كله فى الأزوزه
راح تمسك فتره وتنشال
وحنلبس احنا فى الحيطه
ونغنى لظلموه موال



حالو يا حالو

دستور بلدنا يشلو
ياشعب أصيل
واكل فى نجيل
شارب من نيل
صابرعلى ذلو
راح أمتى تفوق
وتقول مدعوق
واحد يمسك
والثانى يسوق
طب لزمتة ايه
تصرخ وتموت
وتقول حقى
وتقول مسروق
وتقول فلو
يا شعب اصيل
ساكت بجميل
مستنى تشوف
راح يمشى يمين
راح يمشى شمال
ولا فى ظله
بس الدستور
دة شئ مسطور
يعنى لكله
والناس خايفه
لتروح ما تجيش
يبقى الخفافيش
لعبو فى الفيش
خلوها ظلام
والناس ده نيام
يعنى دهولو
وضحكنا عليه
قالوا نعمين
فوق الستين
منا الاثنين
والشعب ده مين
احنا الحلوين
وبتوع كله
اعلامنا يقول
ويعيد ويزيد
يجمال نظمة
يجمال رسمه
يجمال امه
ده كلام مشموم
اعلام ملاحيس
كله فى الهيس
يسلم فموه
يا شعب اصيل
بعد الدستور
لازم ترحل
وده شئ مقسوم
كله مسموم
فاكر انه
فوق اى قانون
فوق اى لزوم
فوق حتى الشعب
اللى يد له



حرف تسعه

يا حرف تسعه يامتعاجب
فتح عنيك وبقولك اية
متيجى نعمل ديل واجب
تقولى تسعه دى تطلع ايه
يا حرف تسعه إياك تنسى
إن الديابه فى الصحرا كتير
وإن الجنود اللى إتضربوا
ساعة الفطارمن غير تفسير
وحاجات كتير وبنتسا ئل
وناس كتيرملهومش كبير
بس أنت عارف ومخبى
والسربقى من غير تشفير
دول تسعه هما اللى قتلوا
شهداء رفح من غيرتبرير
والكلمه حق وسيف مسلول
والعدل مش حيلة وتدبير
وعايز تخبى المتخبى
والدنيا يسكت فيها كتير
وهجوم على الكلمة الحرة
والصورة وأقلام التعبير
والثورة حا تروح بالمرة
بعمليات قتل وتدمير
وبلدنا المغتصبة أسيرة
لفنون التحرش والتكفير
وحضارة أمة بتتهاوى
لأفكار رهبان التزوير
إرهاب الشعب شئ عادى
إستدعى وقهر وتسخير
والقمع دة دين الأحادى
شاف نفسة فوق التغيير
يا حرف تسعه إزاى قوللى
تلتوميت الف اسم الله عليه
بلطجى برتبة مخابراتى
هو الكلام فيه حكر ده ايه
والقرد لما يموت يبقى
القرداتى حيعمل قرد أوكيه
يا جراب الحاوى يا رفاعى
سرك بديع وبيحكوا عليه
مرة تعبان ينهش لحمى
ومرة يبقى حمامه يا بيه
وأصابع بتلعب فى وطنى
حاولنا نفهم معناها ايه
خلاص فهمنا المتغطى
وفهمنا كمان العريان ليه
بس أنت قوم يالله وخطى
ونقول للناس تاتا تاتا علية



حكومة جنابو

لم أصحابوا بحكومة جنابو
مستشارين فوق السبعين
شعبك فيص من اللى صابو
أخونتوله رموش العين
فرشح أحرق فى اللى جابو
بكره نجوع أحنا الأتنين
وأسئل يالله وقول لهشامو
قرض الصندوق جاى لمين
أزرع تحصد من أخطاءو
الغوا الدعم يا حبة عين
مش حايطبطب على أحبابو
وقرص الجوع بين المصارين
وعيش و ملهلب من اسعارو
طقو وموتو من الجنبين
والحرية إتقلبت طغيانو
والأعلام رأس الفاسدين
أخون حتى نخاع أقلامو
وعيش بالعافية مع العايشين
والعدل المدبوح بقرارو
ودم الشهدا فى الميادين
قال لصحابو( قول ياجنابو)
قال بالعافية أحنا القاعدين
الشعب يموتو لما يعوزو
غيرنا ويهتفوا بالملايين
نسحل نضرب ندبح فيكو
عافيه بعافيه كسبانين
الحكم لغيرنا مش حانسيبو
سنين و سنين وبخلع العين
انسى كلامه اللى فى يوم قالو
انسي الثورة مع الناسين
سلم أمرك للى خلقو
بكره حايرحل مع التانين



حماستنا وحماسينا

حماستنا جماعة حماسينا
حماسينا زيتنا فى دقيقنا
حماستنا تأمر حماسينا
حماسينا حست بخيبتنا
خطفت لنا سبعه بأرضينا
حماسينا أملت بشروطها
فرضت بالخسه كلمتها
حماسينا لعبة حراميه
وقائدها خاف م الدوريه
وفوضنا شيوخ الحريه
حررنا جنود الوطنيه
من غير لادم ولاميه
وسايبين حماسينا ورايتها
مرفوعه لنجاح فكرتها
بتهنى وتعيش فرحتها
وحماستنا نشرت جبروتها
على سينا وطاحت بدروبها
حماستنا وخطفت ضباطنا
رمضان وقتلت فيه جنودنا
حماستنا وحبت حماسينا
وحاتسكن بكره بأرضينا
حماستنا تأمر حماسينا
ليها فضل عليه يا أخينا
هو أنت فاكر حماسينا
يقدر يزعل حماستنا
حماسينا ومعاه حماستنا
بيحلمو يقضوا على جيوشنا
حماستنا تدرب حماسينا
وسلاح حماسينا فى بيوتنا
وجيوش حماستنا فى حماسينا
ضاعت بعدها أرضنا سينا
وحايضيع مننا بعده وطنا
وبكره حانبيع أرضنا بينا
علشان حانسدد بيه ديوننا
يحرق حماستنا وحماسينا



عيد سعيد
عيد سعيد على الخرفان
خرفان يا ناس بنبيع خرفان
ما العيد فرحه بكل أوان
إشترى لبيض أو خدلك بنى
ده متسهوك وده غلبان
لبيض لئيم وماهوش منى
وسيرتو على كل لسان
وقفاه مملى سمين ومفلطح
ياكل حقك زى زمان
وغيره بقرون داير ينطح
أوعى يغشك ماهو سهتان
يسرح بيك وأحلى كلاملم
تفضل بقى مفروس وجعان
خرفان وإتباعت لقصور
أوعى يكون للحيطه ودان
من غير لأحم ولا دستور
سنيده لخروف خرفان
دا بأمر البيه المأمور
لأ يا حقير ماأنتش فاهمان
دول خرفان أصلها من نور
وأنتم طين مالهوش عنوان
أدبح وأسلخ يا مسرور
والحليم حايعيش حيران
ماالساتور هوه الدستور
أحنا خلاص حانعيش بأمان
والعيد عيدنا والفرح يدور
إنسوا كلامنا ليكو زمان
حانزرع فيكو الفرقه بزور
ويطرحلنا مليون فدان
نروى فدان بالدم بحور
ونقطع فيكم كل لسان
ونشق الصف عليه ونجور
يخرص وما ينطقش جبان
ويصرخ من بعدها مذعور
نصدر أى قانون عميان
ونعييشكم من غير نور
نصدر نوركم بالمجان
ونعيشكوا الظلمه عصور
نخاف من نور العدل يبان
والعلم ده نور والجهل يغور
ما احنا يناس بنبيع خرفان
لا نعرف مستور ولا مسحور
ولاحايدوم خاين خسران
بكره حا ينكشف المستور
وعيد وسعيد على الخرفان




رثاء

عليك السلامة مصر الكنانة
كفانا مذله كفانا مهانه
فلا ثورة قامت ولا أمنيات
ولا دم سال بأرض الطهارة
ليمحو الرذيلة والموبقات
وأم شهيد تطلب عدلا
قصاص لإبن فنى بالعراء
تنوح وتندب روحا تهيم
عويلا مهيبا بأعلى السماء
وتسكن صيحاتها للسكون
فلا من مجيب يجيب الدعاء
فنحن فى أعينهم هوام
نحن قطيع نعاج تساق
ويسكب فينا ذل الهوان
وينسل كهلا بدا بالخفاء
يداعب أحلامنا بالظنون
يلوك أمنياتنا للرخاء
بهتا يحاول يبعث فينا
كذبا يروم لبث الرجاء
ويزعم كيف تقوم الحضارة
ويلقى خطابا بغير احتواء
يبحث عن عرش وإمارة
وعصر النخاسة والأنتماء
ويذكر شهداؤنا بالجسارة
ويسعى ليبحث عن عمولات
سلاح وغاز والف تجارة
وينهل من دمنا بارتواء
يذكرنا دمعنا بالخسارة
وينفل منا ذل انحناء
ونابى الركوع وينهض فينا
نبع الرجولة سر البقاء
ونأبى الدخول لعصرالدعارة
وعصر المزابل عصر البغاء
سرقتم حلمنا والحقيقة
وبعتم ضمائركم للشقاء
ثلاثون عاما قضيتم علينا
أكلتم لحومنا باشتهاء
فكم من ذبيح إمام رثينا
وكم من شباب واراه الفناء
فكل الأساطير ماتت لدينا
ويبقى لدينا أمل البناء
ويذكركم تاريخنا بالحقارة
ونأبى الرجوع لعصر الغوانى
نأبى الركوع لعصر الرياء
عليك السلامة مصر الكنانة
نبض العروبة والأقوياء



سيب وأنا سيب

بنقولك عيب بقى يالله وسيب
جربنا الذل فتره بحكمك
لا تسرعدو ولاترضى حبيب
هو أنت لسه فاكر شعبك
تحكمه بالعافيه وحايستجيب
دول ناس مش تابعين لجماعتك
ليهم فكر ورأى يصيب
ليه تأمرهم ويطيعوا أمرك
والله أنت فى الدنيا غريب
عمر ما شفنا شئ يشبهلك
دا الدنيا مليانه أعاجيب
قارن يالله ومش حا نغشك
ونقول كلام سيكا وألاعيب
بينك وبين اللى كان قبلك
الشعب ضعيف مسكين مغلوب
زاد فقره ومرضه وذله بقهرك
وبعد القرض يعيش ع الطوب
غيرك وسرق عمرنا قبلك
ورصيد كاش نقدى ومنهوب
وأنت ياعينى لايصه حكومتك
حاسبينها غلط بعيار مقلوب
تشحت بتناحه وتتسهوك
وتقولوا عليه كتاب مكتوب
ما تفوق يالله وأشرك شعبك
حايقول دوغرى عل المطلوب
ولا تفضح فينا زى عوايدك
بتعيد لنا زمن المنكوب
طب أسمع ودى حاجه ترجعلك
دستورك غبى مش محبوب
طبخه وسويتوها براحتك
والكل فينا بات محزوب
تستفتى عليه رأى جماعتك
وتقولوا عليه مش معيوب
ها يقره مجلس يحمل أسمك
ويعيد المحذوف مكتوب
والمجلس أيه ماهوه عشيرتك
حا تعيد لنا زمن المخروب
يالله سيب بقى يستر عرضك
الشعب معاك حزين مكروب
مش فاهم ليه وأيه مصلحتك
تهدم مصر بتخطيط محسوب
تفكك دوله وده شئ ضدك
تلعب بيها قمار ياأخى توب
سيبنا خلاص مش طايقين وشك
وحنلعب بقى سيب وأنا سيب



على بابا

دخل المغارة يازين
قسم الرعية اتنين
ناس عايشة فوق الهنا
وناس تموت بالدين
على بابا بعد الضنى
قال للثوار سلامات
الفقر ليكم دوى
يا شعب يا حشرات
أنا الريس هنا
افرض رسوم غرمات
أمنع الميه والهوا
أطلب قروض وهبات
الغى القانون واوقفه
وأعينل البهوات
وأحصن اللى أهبشه
بمكبل للحريات
دستورى راح أفبركه
وأضمه على اللى فات
والدعم حانخصخصه
بفتاوى مستشارين
وجنيهنا حا نحمصه
والدولار يبقى سمين
والشعب حا نفهيصه
دول كلهم ملاعين
انقاذ وحزب وجبهه
بيأيدوا حمدين
جبهة بجبهة عنيد
والشرطة تبقى حديد
وطوارئ للمساكين
بالشهر واللتنين
الشعب ده حاندوس
ويتسحل بلبوص
الشعب لازم يتأدب
يدوق الذل ويتعذب
هو أنت غرمان أيه
ما كله فى الصندوق
عقبال ما ييجى يفوق
عدت سنة وأتنين
هوه أنتم مش داريين
أن إحنا بالملايين
مليشياتنا جاهزه يا معلم
وصنديقنا شاطره بتتكلم
وتقول حكاوى وتعلم
شرعية الصندوق
والشعب مش مخنوق
لا طاقق ولا مرهوق
والنهضة جايه فى السكه
حانبيع بلادنا بالحته
مشروع ومركون ع الدكه
وصكوك و طبعناها لسكه
حا تحقق الملايين
بس انتو مش فاهمين
أيوه أحنا ناس ملاعين
الثورة مش معنى الفوضى
الكل لازم يترجى
ويقول مطالبة ويتهجى
عشان احنا مش فاضيين
رايحين يناس جايين
عل القدس بالملايين
يا عم افهم بقه
مش راضى تفهم ليه
الحكم مش جهبذه
هو أنت فاكر آيه
الشعب ده معجزه
علم بلاد حواليه
قال الفساد أنتهه
وأنت تعيدو ليه
عجبى على اللى بكا
من ظلمكم للدين
فتاويكم للبهوقا
والدم فى الميادين
والعمر راح بعزقا
برضه أنت مش مسئول !!
إيه اللى جابه عندنا
هو أحنا بنبيع فول
والكذب طبع فى دمنا
ننسى قوام على طول
ياللى نسيت أصلنا
بياع البطاطا راح
كان طفل عاش وهمنا
ثوره وظلم انزاح
تقدر تقول مسئول
عن اسرة م الأشباح
يشقى ويومه يطول
ورزقه على الفتاح
بس أنت نام وأرتاح
وكله عل المفتاح
وبكره تبيع دمنا
والشعب يهتف يقول
حقك علينا ياعمنا
من بكره حاتبقى رسول
وننسى دين ربنا
ونتبع بهلول
حكم علينا بكفرنا
ما الجهل شرحه يطول
ويتوب علينا ربنا
من هطلة المهطول
على بابا بعد الضنا
لابس حرير فى حرير
خلع الطاقيه والجلابيا
كسر قلتو والزير
داق طعم لقمه هنا
مش جعضيد وجرجير
وفخامته نسى شعبنا
والثوره يا ثوار
ونسى لما هرب
م السجن يا أحرار
من بعد بيعه لناسى
فخامته دخل القصر
سلم سينا لحماسى
من بعد صلاة العصر
قالوا حكاوى القهاوى
واللى إتحجب م النشر
واللى إنكتب فى الغناوى
عن حكم يهدم مصر
أهمس وأقولك كلمتى
بس الزعل مرفوع
جبت ناس مش جبهتى
ناس بدون عنوان
لا يهمهم همى
والأسم قال اخوان
وميشبهوش دمى
قاتل خسيس وجبان
فتشوا لى سترى
خاضوا فى أعراضى
إتحرشوا ببناتى وإخواتى
خطفوا ثورتى وأملى
قتلولى أولادى
وقلتوا أسيادى
والذنب مش ذنبى
أنت اللى بتخبى
ليوم كنت معاى
تعيش لأوجاعى
تكلمنى عن بكرة وأوضاعى
علشان أشوف فجرى
يشرق بأيامى
العمر راح وإنقضى
والحلم لما إبتدى
سرقتوا لى أحلامى
هو إنكتبلى الذل
بأديك يا سيد الكل
طب م أنا اللى مختارك
وصدقت أقوالك
وأنت اللى مش سامع
علشان ليهم خاضع
عشيرتك فوق الكل
وقرراتك زى الفل
وطلعت مش فاهم
ايوه أنت مش فاهم
الشعب مش مسطول
دا باين عليك واهم
أقسم بأجدادى
حاأخلع جذور الظلم
أقسم بشهدائى
حاأزيح جبال الهم
وافخر بأمجادى
وأحكى لأولادى
عن حكم غار كان غم



فرده شمال

طلعتلى برضه الفرده شمال
مديت إديه مغمض عنيه
سميت سألت ستين سؤال
بكره حانبنى مشاريع كبيره
ومحتاجين جهد العمال
علشان ما تبقى بلدنا كريمه
ونكتب تاريخها للأجيال
دول عطشانين سنين طويله
لزعيم يقودهم زى جمال
بناها أمة عزه وشهامه
مش بالدولار ولا بالريال
صندوق ويرفض يديه سيوله
قام بالرجوله وأمم قنال
غرز فى شعبه حب الكرامه
وكان مفيش عنده محال
وجه ياسيدنا ابن اللئيمه
نهب فلوسنا وقال حلال
لعب بشعبه لسنين طويله
بيسوى حكمه لأبنه جمال
الشعب طق وقاله كفايه
وقام بثوره ولا فى الخيال
ضحت علشانا أرواح بريئه
غنوا لبلدنا أطهر موال
وأنتى يا مصر دايما عظيمه
رغم المصاعب والأهوال
ونفسى بكره بفكره جريئه
تكون حقيقة وتبنى الخيال
سامحنى يابنى أنا مش حنافقه
عمرى ماقوله اللى بيتقال
أصل أنا عشت زمن الأصاله
وعاصرت فيها الزعيم جمال
شموخ ورهبه زعيم له هيبه
وجه بعده السادات وقال
لازم يابلدى تعيشى حره
نصرك عزيمه ومش محال
وصف دهاءه لعبور ولاده
من الهزيمه لنصر عال
بلدنا عاشت أيام عصيبه
وشعب واعى يهد جبال
أفحت حانفحت أبنى حانعله
فرده وطاشت منى شمال



فناكيش

فناكيش يا جماعة فناكيش
سرقتوا الثوره ياخفافيش
وشبابنا ضحوا علشان بكره
دفعولكم أعمارهم بقشيش
ماتوا لوطنهم ولفكره
عظيمه يا حبة حرافيش
ولبستم ثوب الوطنيه
ولبستوا الشعب الطرابيش
مثلتوا سجين الحريه
وسحلتوا رموزها يادراويش
وقتلتوا نشطاء سياسيه
وتقولوا تعذيب دا مفيش
اطلقتوا كلاب الفاشيه
صعرانه بتنهش ومهابيش
غنيتوا للنهضة المهديه
قولتولنا حاجة مابتجيش
والعكره بيصطادوا فى الميه
وصكوك طبعوها وتحابيش
هبره هبرتوها علشان سكه
حا تبيعوا اصولها بمفيش
وديون جبتوها حانورثها
وتخلف منكم حانعيش
أفكاركم كلها رجعيه
وشذوذ كبت وتشويش
للمرأه الحره العربيه
ونضالها ضد التهميش
إسلامنا دين الوسطيه
إفهموا ياشوية براطيش




كوكو واوه

كوكوواوه يحلوه يا شجاعه
كلمنجى وعملوله إذاعه
نبى حارسه يقول اللى إتقالوه
مهزوز خرفنجى وسلواعه
وبلدنا عايزة اللى بيبنى
لا حيبنى ولا يسيب شماعه
ولا حقق نهضة وراوشنى
بقرارات للخيبه وفزاعه
ونفسى أشوف بلدى بتعلى
ده خسفها بأ وسخ بلاعه
ياغراب البين ياللى فرسنى
ما تسيبنا وخدلك ولاعه
روح ولع وإياك ترجعلى
سيبك من أم دى جماعه
ضحكت علينا اللى ما يسوى
وشمتت فينا الجرباعه
قول يا جميل ياللى هابلنى
ليه تزرع فينا البداعه
هو أنت شيعى ولا سنى
ولا أنت عايزها مسنشاعه
كلام كتير قوى وإتقاللى
عن مكر شيوخ المرقاعه
راح تهدم لزهر ياحلولى
وتشدو الجام والبرداعه
وتقيموا إماره لتنظيم دولى
لحكم الإرشاد والمنفاعه
قول كمان قول وأطربنى
ما الوحدة الوطنية إشاعه
ما تلم القبطى على السلفى
ولا أنت عايزها مولاعه
قول حبيبى ياللى ساحرنى
كام شبر وعندك بزياده
تدى الجيران منهم أرضى
فاكرنها دى ورث الولاده
طلعتلك فى البخت يا عمرى
ولا بتستهبل ياحماده

ملعونية

يسقط فرسان كل القضا
دمروا حصن المحلفين
بعد ما أصبحوا كبش الفدا
هاتوهم نتغدى جعانين
دول فضحونى وهما العدا
حكوا للناس اللى نايمين
بسجن النطرون واللى جرى
وتسجيلات وعلينا سامعين
الأتصالات مقطوعة هنا
بالأستجواب حيكونوا عارفين
شغل مخابرات ذاعوا سرنا
من بعدها والقضا قافشين
وقبل ما يسيحوا دمنا
حاجة وتدينى مش عايزين
إنزلوا يالله وإهتفوا عنا
لحق الشهدا فى الميادين
وأوعى حد يقول بلاوينا
فى الأتحادية أنتم ناسيين
براءة للكل وده سيم بينا
ما أصل اللعبة بقت تفانين
وأعين بكره اللى يحاميلنا
وأنسى القضا واللى مداينين
وأدبح أطهر وأطرد أسوى
بعد ما يبقوا خلاص دايخين
ملعونية القضا تخدمنا
يالله يا جماعه أنتم جاهزين
تبقى الأحكام باشارة منا
نسيطر نلعب فيها سنين
يحيا جماعتى يحيا عشيرتى
ماالأتنين فى الهوى دايبيين
لأ يا حزومبل حاتبعد عنا
ومش حانسيبك ومش ساكتين
فيه قضا دولى يفصل بينا
والناس دول وعليك شاهدين
وقضيتنا راح تخدمنا
نشتكى منكم مجروحين
يبهدلوا فيكم ويبقى ما بينا
حمايه دوليه وفصل مبين
وفاكر أنك يوم تغلبنا
تهد القضا والناس نايمين
روح يا حبيبى لاعب غيرنا
أحنا خلاص بقى مش لاعبيين



موكب سعادتو

سعادتو راح .. سعادتو جه
سعادتو قال قبل كدهوه
مفيش كواكب ولا مواكب
بلا إسراف بلا فنجره
حانزل أصلى بجامع قريب
حرام عليكم دى مسخره
سعادتو بعد الشهر ماغيب
فتح أجنص وبقى فشخره
قال الوريث حلمه روغيب
من غيرتباته ولانقوره
شفوله بكره تعيين قريب
والواد عباطه والواد شباطه
دول من سنين مالهومش نايب
متلطمين وعلى البلاطه
قالوا الحقونا دا شئ عجايب
لميس وخيرى محمود وريمه
من غير سكوت دا شئ رهيب
ووائل بيشكى بقناة دريمه
يلعن ويسخط عل المحاسيب
وأنت يا راسى بأخلاق كريمه
تقول على ايه منا حاأسيب
سعادتو فرض لأبنه حراسه
يشخط وينطر بدون رقيب
كلامه دبشه وبدون كياسه
ليه يابن سيدنا ما تبقاش حبيب
لسان رظيه وأفكار هفيه
ووعود نساها أبوك لأ عيب
كلام بولوتيكا واتقال بنيه
فى لنتخابات كله طبيب
موكب سعادتو مليون سارينه
مليون بهيمه واقفه تعييب
مليون ركوبه من غير حسوبه
تنقل حراسة أجسام تشيب
والشعب يضرب كفه بأديه
ويقول دا بكره فرجو قريب
والثوره قامت على الوسيه
علشان يجلنا وريث حوبيب



نهضه

نهضه دى تطلع ايه ياحموكشه
هو أنا شايف إنجازات
تعالى يا نهضه روحي يانهضه
أنا مش فاهم ليه بالذات
تحبوا تسمموا لينا أفكارنا
بحكاوى غريبة وإفتراءات
تعملوا منها حبه وقبه
تعيدو وتذيدو فى البطولات
حد يقوله أو أروح أقوله
دى خيبه تقيله وإخفاقات
بلدنا الحرة تبقى جميله
بمشروع قومى مش خيالات
تشحذ فيه همة أولادنا
مش مستنى قروض وهبات
شبابنا وبكره حايسخر منا
يلعن فينا كل ما فات
إسمع منهم دول نور عينه
وأنت سايبهم للهتافات
جمع فيهم وإبنى بهمه
دول ملايين مش بالألوفات
حاتحيى النهضه و بنيت أمه
تبقى عظيمه بدون خرافات
وتبقى حبيبنا وتبقى زعيمنا
ونهتف ليك كل الأوقات
عاش المرسى عاش لولادنا
وأنت رئيس كل السنوات



هيلاهوب

القمح يجيب تلاتين أردب
كدبه ومزعه ونخعه سكوب
زفه وهيصه وكله مطرقع
بيلعبوا بينا خمسين هيلاهوب
حصدوا القمح وشالوا البرقع
ولسان بربنط يغيظ ويدب
وفلاحين سامعين حا تفرقع
كل كلامك كدب فى كدب
احلى كلام قول يالله وسمع
سيناريو سفيه تأليف الحزب
قال يا حلاوته دا احنا بنزرع
فدادين لصوامع بالكدب
قمح يكفى لملايين تشبع
حا يفيض ونصدر و نقب
لا حد يشوف ولا حد بيسمع
صرخة فلاح لكيماوى يسب
وسولار وشحيح سعره مولع
وفى الاديان دا حرام الكدب
اوعى تقول ماهو كله بينخع
وقت الجد هايثور ويهب
عرق غلابه ومش راح ينفع
دى انجازات محسوبه للشعب
اكدب افشر ارقع وانخع
إمحى الزمن لو كنت تحب



واحد مايو

قالوا النهاردة دا واحد مايو
ده عيد عمالنا ومش ناسيين
خمسة وعشرين مليون جاعو
سنين وسنين منتوش سائلين
مصانع وقفت وشركات باعو
خصخصوهالو شمال ويمين
محاكم حكمت برجوعها وذاعو
أحكام بيستناها ملايين
وحد أقصى ورجعوا و قالو
لأ حد أدنى ماأنتوش فاهمين
أصحاب مصالح صالو وجالو
قالوا نفوس حاسده وحاقدين
والست تشقى لليوم بحالو
بفلوس قليله ما مكفيين
عايللها أسره مرضى ومالو
قاعدين بحجرة ومش عايشين
حيطانها واقعه واللى جرالو
مية مجارى وبقوا شاربين
وقروض وجايه على خيالو
تقضى علينا ومش ساكتين
اسعاره تغلى ودعمى وشالو
قالولى نهضة ومش فاهمين
وإضرابات منعوها ياخالو
عجلة إنتاج وعليها حريصين
قوانين وطالعه جتلو فى بالو
حايدى فيها حقوقنا لمين
وشباب بيجرى ورا خيالو
ومن البطاله متشحورين
وناس وغرقت بالبحر غابو
هجرو البلد من غير قوانين
غيرهم كتير واسطه وجابو
لتعينات مرصوده للزين
مرتبها سرى سعده وجالو
مش بالكفاءه دول محظوظين
وعامل بسيط يطول عذابو
لو قاله بكره العلاوه فين
وبالعداله نادى شبابو
وثورة قامت عل الفاسدين
وقالوا النهارده واحد مايو
ويونيو جاى خليكو فاكرين



يا مصر ابنى

حلوه يا بلدى يا أم المداين
عبق الكنايس عطر هواكى
عشتى يا حره يا أم المئاذن
منار ومنبر والأزهر بهاكى
دفئك وعشقك سكن قلوبنا
نيلك وشمسك شعبك حلاكى
سجنك أسيرك سنه وإحتقرنا
خطف ولادنا وقال حماكى
قتل جنودنا على حدودنا
خطط ودبر يبيع ثراكى
خانك وأنكر قيمه وجودنا
باعك وفاكر إنه إشتراكى
دعا على اللى جابنا كفر جدودنا
قسم شعوبنا وقال دواكى
يامصر قولى ايه الحكايه
ماكنشى بحلم بكابوس بلاكى
دا كلام بديعه سنى وشيعه
قال ايه شريعه فتوى وفتاكى
يا دنيا شوفى مصر الحضاره
وحدها مينا فرقها مرسى
علشان ما يبنى فيها الأماره
محروم ولازق فى أم كرسى
راح اقوم بثوره همه وجساره
حاكم وخاين اخلع وارمى
ده كلامه عايب بدون اثاره
يا شعب طهر مكانه وابنى
حتبنى بعده احلى حضاره




يا أسمك أيه

يا عم أنت بتعمل ايه
محدش جه وإستولى عليه
هو يغير ولا يتغير
يبلع يسكت أمره يحير
ساعة الجد يقوم ويغير
ويهز العالم حواليه
يا عم أنت بتعمل ايه
فاكر أنك تقدر تخدع
شعب بحالو بفكرو وطبعه
تسرق منة رقه حالو
وحلمو وأمله
بقزازة زيتك وجنيه
فاكر لما يوم ما اتجمع
يرفض فقرو يرفض قهره
يرفض ذلو من حوليه
قام بالثوره سعتها ولكن
ساب لعشرتو تنهش فيه
تركب موجة الحلم تزاحم
يفتح صدرو كأنه دا ايه
فاكر لما يوم ما إختارك
شعبك وصاك قالك ايه
لو يعرف إنك حتغرق
راح تظلم بيينا وتفرق
كان قالك بكرة نتقابل
ياأسمك ايه
يا عم واخدنا ورايح فين
شرطه خصوصى ياحبة عين
دول خارجين ودول ملاعين
أيموا الحد على الكافرين
أمسك أضبط أقتل عذب
جتلنا نيله احنا لتنين
بلدنا وراحت منا وباحت
حرمة دم بغمضة عين
فاكر لما يوم ما إختارك
شعبك وصاك قالك ايه
لو يعرف إنك حتغرق
راح تظلم بيننا وتفرق
كان قالك بكره نتقابل
ياأسمك ايه
اعلامنا يا عم جرئ وشديد
وبيعرف والله يقول ويعيد
أعلامنا مهش بردعة و لجام
حتضحى وتسجن منهم كام
بس أنت يا سيدنا مش حتنام
وتقولوا علية إعلام هدام
وفاكرلما يوم ما أختارك
شعبك وصاك قالك اية
لو يعرف انك حا تغرق
راح تظلم بنا وتفرق
كان قالك بكرة نتقابل
يا اسمك اية
مصر تعالى بحضنى وغنى
بلدى يا حره أنا مستنى
يوم العيد تفكى القيد
و يرقص شعبك ويهنى
بصبح جديد وفجر سعيد
ونقولك بعد العدل ماييجى
فاكرلما يوم ما إختارك
شعبك وصاك قالك ايه
لو يعرف إنك حتغرق
راح تظلم بيننا وتفرق
كان قالك بكره نتقابل
ياأسمك ايه
أسم الله عليه
تم

​