"كنكني عليهم"

[راما]

"كنكني عليهم" بكرة بيكبروا بسرعة وبيطيروا
مثل العصافير
على كبر تصيري تفكري
تعملي اللقمة الحلوة حتى تجمعيهم
وبسرعة بسرعة برجع كل واحد لعشه ويتركوك
تفكري تطبخي ثاني يوم
لمين الطبخة ما في داعي
كلنا راسين واي شيء يمشي الحال!
ما في بتك ترجع من المدرسة
وعن الدرج تشمشم طبيخك شمشمة
وعن الباب تقلك ماما حطيلي بسرعة
تقومي تضحكي وتنعجقي
أصلا أنت تدوزني الطبخة على جيتها
اخر العنقود وقلبك عليها!
وابنك الكبير
لو لف كل جامعته
وأكل كل الأكل مع أصحابه
يقوم ينقرش على طبختك
تسمعيه لما يقوم بنص الليل
وانت أصلا عارفة طبعه
وتاركتيله صحن في الفرن
يعبي بطنه وراسه ويرجع ينام
وكل واحد له طبع حافظتيه
وسن طيب تفكري كيف ترضيه
بتعرفي
كل يوم كنت تحتاري من الصبح
ايش أطبخ اليوم؟
أصلا كانت معضلتك
حتى تطلعي بطبخة يتفقوا عليها
وغالبا ما يتفقوا!
أو حتى ترقعي من يوم ليوم
وتعملي صحن الحلو ترضاية للنفوس
عالطبخة البايتة
وكله كان "بالنق وبدونه"
يطير بألف صحة وعافية
واليوم تناطريهم يشتهوا طبخة
حتى تجمعيهم ساعة من أيامهم!
يالله "قديش رح تشتاقيها هالأيام" وستفتقدينها
استمتعي فيها طول ما هي موجودة
وطول ما هم عندك
بكل مناكشاتهم وكراكيبهم الحلوة
قبل ما بيتك يصير مرتب زيادة عن اللزوم وتملي أشيائك
تتمنيها تتكركب مثل زمان!
قومي وانبسطي فيهم
احضنيهم بقدر ما تقدري
عيشي معهم اللحظة وتهني
لأنهم بيكبروا بسرعة
بسرعة أكثر مما تتصوري!
قومي تنفسيهم
ريحتهم حلوة ولمتهم حواليك بتحييك
اليوم كل الساعات الك
وبكرة يا دوب تلحقي معهم ساعة!
عيشيها من قلبك وافرحي فيها
بكل قوة فيك

منقول...

[ميسم الحكيم]

صحيح جدا..إن كل ماتزرعينه سوف تحصدينه لاحقا، فاعتني واحسني لغرسك.
شكرا لك.