أفكاري صارت كتير مشوّشة
ومابعرف شو صار وين المعرفة
بعدني حامل بقلبي حب كبير
وعند أول هزة دخلك وين صفي!


افرشتلك قلبي ريش وحرير
واقطفتلك قمر عا حضنك غفي
واعملتلك عيوني أحلى من سرير
وقلتلك نامي بهنا ياعمري الوفي


دخلك شو جرى ! وشوّي المصير
الآهات زادت .. وبقلبي مرفرفه
انت دوا للقلب بلسم خطير
كلما ارشفت اللمى بدّي مغرفه


انت بالهوى صرت لقلبي خمير
انت الرياحين والعطور مهفهفه
مشتاق ضمك ضمّة عاشق كبير
نام واصحى على شفاف المترفه


يا عطر البنفسج يا قمر المنير
يا مواسم جنا ويا بيادر وارفه
رح ضل اتغنى بحبك ك أمير
ورح ضل اكتب شعر بعيونك
حتى بحبك تكون أيامي متحفه


شحرور الضيعة
15\9\2009