قصيدة (يا ام البلاد فين البلد) هشام فتحي
ضهري اللي شايلك من زماااااااااااااااان
ماله اتحنى؟
كل الدروب اتغيرت
ولا حتى انا هو انا
ضهري اللي شايل
همّ نيلك يا بلد
وف يوم ما نيلك يتولد
ليه يا يلد
ما قادرش ادوق طعم الهنا
كفي اللي كان
طول السنين يرفع علم
يرسم علم
ويحن ليه خمسين سنه
ايوه انا
خمسين سنه
ضهري اتحنى
ولا عدت بصرخ
"مين هناااااااااااااااااااااااااااااااك "
ولا مين هنا

من كام شهر
زرت الميدان ورقصت فيه
وطلعت فوق برج الحمام
طليت عليه
ولقيت عروسه بتتولد
ولقيت وطن "الله عليه"
شفت الملامح والعلم
والطفل واقف يرسمه
والفرحه باينه من عينيه
شفت الضفاير
والشعر ملفوف بنيلك يا بلد
بتخبي إيه؟؟؟؟؟؟؟؟؟
من كام شهر
يا ام البلاد زرت الميدان
ولقيت شموع الفرح بتلف المكان
اطفال بتجري ف سكتي
والعم صابر
يحكي ماضينا اللي كان
يوم التلات يا ام البلاد
زرت الميدان
وانا كنت راجع للبلد
ليه الشموع متبعثره
ليه القلوب متحجره
وخيام بتهرب م الوتد
شفت الماسي
يا وطن ما لهاش عدد
نفس المتاهة والضياع
والشيخ ياسين عند الامام
بيقول مدد
آخر كلام
يا ام البلاد
فين الولاد
فين البلد
أبوخلاد هشام فتحي
المنيا - مطاي - الكوادي