حرصاً على صحتك...بقلم آرا سوفاليان

[arasouvalian]

حرصاً على صحتك...بقلم آرا سوفاليان
ـ مرحبا ـ أهلين ـ عندك خبز سكري؟ ـ شلون شايف؟ ـ الكزلوك بالبيت وبالمرّة مو شايف ـ بقديش بدك؟ ـ شغلة كيلو مو أكتر ـ ما في بالوزن ـ كيف لكان؟ شلون بدك تبيعني؟ ـ بالعدد ـ طيب عطينا كيلو بالعدد ـ ما عندي ميزان ـ غريب الميزان هو العدل والعدل من أسماء الله ـ أخي مشان الله خلينا نشوف شغلنا ـ شوف شغلك ماني ماسكك بس بدي أعرف بقديش الخبز ـ أخي البيع بالربطة ـ وكم رغيف بالربطة ـ سبع ترغفة ـ لعمى نقصت الربطة رغيف...ـ سيدي أحسن ما تغلى... ـ وبقديش الربطة ؟ بخمسين ـ بس هدول سبع برشانات ومو سبع ترغفة ـ شو يعني سبع برشانات؟ يعني الرغيف صغير كتير وأصغر من صحن فنجان القهوة ـ هادا أصول رغيف السكري وهادا أصلاً مشان صحتك ـ منيح مشكور والله كفو وكتّر خيرك انك خايف على صحتي لازم حطك على راسي ودور فيك الشام، لأنك الوحيد بسوريا يللي خايف على صحتي، يخرب بيتك بس مو الحق عليك، الحق على يللي ما كسّر ايديك لأنه هاي سرقة وبامتياز...راجعلك بعد يومين بلكي بيصير رغيف السكري بحجم نصف قطر فنجان القهوة وبـ 100 ليرة سورية حرصاً على صحتي...غلق جديد ومحل جديد متر بمتر غير مرخص وشروط نظافة صفر وشروط سلامة صفرين ويدين متسختين... وجرة غاز ونربيش وصاجة سوداء مصدية علـ داير ووسخة، على اساس فرن ومبارح كان محل لبيع الشحاحيط ، شو هل فرن يلي بيخلق بـ 24 ساعة، طحين ابيض مع برادة خشب وملونات والكيلو بخمسميت ليرة وخايف على صحتي؟؟؟، يعني يوميتك عشر تالاف ليرة، تاجر أزمة متلك متل غيرك، ونحنا صرلنا سنة بدون شغل، لأنو ما عنّا مخ جهنمي متل يللي عندك، آل مشان صحتي آل، يخرب بيتك وبيت بيتك، ويفضح عرضك شو سائل عن صحة العالم.
آرا سوفاليان
كاتب انساني وباحث في الشأن الأرمني
دمشق الأثنين 17 12 2012
arasouvalian@gmail.com

[محمد فتحي المقداد]

ده كان زمان..واليوم شلونك؟