يا روح روحي يا وطن

[فردوس النجار]

يا روح روحي يا وطن
قلبي متل بيت الشَّعْرْ ... منصوب عَالضَّهرَة ... نسمه عليله بتلفحو ...
وُسَهْرِيِّـتُوْ وُهْرَة ... وُالـْمَيْ بالقربة ... وُعْبَايِهْ مْقَصَّبِي ... لا نهر جاري ...
وُجَاحْدِي الصحرى ... وصيفو سَؤول وكل ما لاح الشِّتي ...
بْيِرْحَلْ على مرتَعْ وسيع ... مْبَعَّدْ السَّفرة ...
وُيِرْحَلْ ربيعي ... مَعْ أمل بُكْرَه ...
وُتْكْتَرْ خُدُوْدْ مْسَنَّدِي بْ إِيدَيْنْ ... بْتْعاتب الغصَّات والحَسْرَة ...
وُمْشَرْشَرْة ع َالدَّرْبْ هالإيدين ..خْواطرها مْنكسرة ... وُشْفَافْ نَشْفَانِه وُقَهْرْ وُمْرَارْ ... وُعْيُوْن فيها النار تاكل نار ... وُرْغِيْفْنَا مْنْهارْ ...
وُلَيْلْ انْبَسَطْ عالرِّيح ... وانـْهَزّ النهار ... وُتْقْلِتْ حكايا الحُبّ والسُّمَّارْ ...
وُصَارت تْهز بْراسها الأشجار !... شْفْتْ الشَّبَابْ بْقَلْبْ شيْ ختيار ...
مْضَيَّعْ عَصاتُو ... والمرض جَبَّارْ ...
وُشْفْتْ الضّحْكْ أَسْرَارْ ... بيضحَكْ على الأخبار ... بيصَرِّخ بوجه الظّلم ...
وُيْهَرِّبْ الأَخْيَارْ ...
وُلَكْ آه مْنَّكْ يا وَطَنْ ... شُوْ مَا عْمِلِتْ بْتْغَارْ ... قاعِدْ على كتافي عمر ...
وُبقلبي قَايْد نَارْ ... ناطِرْ على حْدُوِْدْ الدَّفَا ... وبالشَّمْسْ حَافِرْ دَاْرْ ...
وُغْرْبَانْ بْتْروحْ وُتِجْيْ.. سْمَّيْتْها أَطْيَارْ !.
لَكْ شو قْصّتَكْ يا رُوْحْ رُوْحِيْ يَاْ وَطَنْ ... كل ما عْشْقْتَكْ يدعَموا الجزَّار ...!
وكل ما شَهَقْتْ بْيكبر الدولار...وكل ما بْجوع بْيكتروا التجار ... !
**************
الشاعرة فردوس النجار

[ريمه الخاني]

اهلا بجديدك الرائع غاليتي وكما نعرفك وطنية أصيلة
وتثبيت

[كاظم الفضلي]

فردوس النجار .. الشاعرة المتألقة
سوريا معقل الثوار وعاصمة الأحرار
طوبى لفرسانها ورجالاتها العظام .
شكراً لكِ على الصدق في تصوير
محبة سوريا قصيدة جميلة .. وحفظ
الله سوريا وأهلها ودام عطاؤكِ .

كاظم الفضلي