بانوراما .. سلاماً ياعراق

[كاظم الفضلي]

بانوراما /

سلاماً ياعراق ..

الأم :
ماظل بعد للخوف بيه وأرتجي الموت
ولا رجفن أظلوعي ويختنك بيه أنه صوت
الحيل شفت الحيل ينخاني أرد أكَوم
من شفت راية هلي .. أذكرت دمعات أمي
وجرح أخوي
وجارنه الجابوه أمس معدوم

الأب :
لاتبجين كل أحنه جسد واحد شبع طكَات
حته الكَاع بينه مجرحه وتنزف معانات
أجينه أنشيل همج نمسح الراح
يابت العراق وأم ..
يامحاه الصبر والتقوه والزينات

الأبن :
ياأم الصدرهه الكَاع يامسجد صلاه وصوم
يالصبرج صبر كل النخل والماي من طبته العدوان والكَوم
للاتبجين ..
عدنه أحنه الجرح نيشان
وعدنه البلفراش إيموت ذل
مو مثل اليموت بساحة الميدان
لجلج والأيام أطوال
من سعف النخيل أنضمد الملجوم
حته أنكَوم ..

الأم :
أظن بيه جرح يابو الجرح ماشالته الناس
وأستحت مني الحياطين ..
وتعذرت أعكَال أبوي المايشيله الراس
أنه البيه بجي بس ماتكًدرله العيون
لأن بصطال الغراة إيدوس كَاعي ومايظل أحساس
ولأن باك المعالم والحضاره ..
وأمتدت عله الحيطان إيده ودنس الجامع
وأنقصفت كنائس كي لا تقرع الأجراس
أشلون أسكت وأنت أبو الناموس ؟؟
واقدام الغزاة أتشوفهه أدوس !!

الأب :
أدوس بيجح وأنه أظل ساكت !!؟
ماأظن الشهامه البيه ترضه بهاي
وأنتي وياي من أول حرف أتعلمه الأنسان
من شاف الفرات العوز
وأعيال الحسين أتحشمه أعله الماي
من داست حوافر خيل جيش الكفر والأنجاس
ماأظن شيمتي أتموت لأن شفت الجفوف مبتره
والكَوم دارت ..
ومو هينه تطيح وتنسلب راية العباس

الأبن :
ماطاحت لحد الأن هي أترفرف بعالي
نجاة ألنه وشفاعه وبالحشر والي
فلاتبجين ..
كلهه أتهون بس أحجاب راسج ماتذبه أجفوف
ولأن أنتي الحقيقه والوطن ينباك
أذا ماربيتي لوليتي وعديتي النشامه ألحاك
أمس جانت مضغتي البارود
ورخصّت النفس حته بوطنه أنذود

الأم :
وأمس كلكم أحشم بيكم أعله الصار
من شفت الغزاة أتبوك حته أثار
رادوا مايضل قانون ..
ومسلة حامورابي أتبيعهه التجار

الأب :
وأمس كَلبوا موازين الحياة وفرهدو داري
لأن كَلت الوطن غالي .. والدستور دستوري
ولأن كَلت العنف مرعب ..
وبحضرة أمير المؤمنين إيفجر الأرهاب
لامذهب يلمه ولاشرع لاخايف من الباري
عندي أخوان راحو بالزياره العام
وبهاي الزياره أنكَتل بن جاري

الأبن :
اصبري ..
تدرين الصبر طيب وأنتي أعله الصبر ربيتي خواني
أبد مايبقه الوطن مهموم لاكَاع التلم عدوانج وعدواني

الأم :
البخت كل ابخت لهل الوطن عالي
وتذل أركَاب وأحنه الننتصر تالي

الاب:
سلاماً ياعراق
الأبن :
سلاماً ياعراق
الأم :
سلاماً ياعراقي
المجموعة :
ياأجمل وطن رغماً على الأرهاب باقي



كاظم الفضلي

[ريمه الخاني]

واهلا بجديدك شاعرنا الكبير ومبارك ديوانك في الفرسان

[كاظم الفضلي]

الأديبة والمبدعة ريمه الخاني .
مروركِ مكسباً تفاعلياً في التواصل
والعطاء ورأيكِ شهادة أعتز بها .
شكراً سيدتي الفاضلة والأخت الكريمة
أم فراس على جهودكم المتميزة والمتفضلين
بها على فرسان المنتدى . سررت بأصدار الديوان
وأكثر سعادة تكريمكم لي . ودي ومحبتي وتقديري
لجميع العاملين على أدارة المنتديات وأخص أخي
الأستاذ ظميان غدير ..

كاظم الفضلي

[ظميان غدير]

الشاعر كاظم الفضلي

قصيدة رائعة وجميلة
ومشاعر وطنية وحس شاعري عالي
شكرا لك
ظميان غدير

[كاظم الفضلي]

أخي الكريم ظميان غدير ..
لك محبتي وتقديري ودوام
التواصل . أقدر لك أهتمامك
ومتابعتك الميدانية في عالم
الأبداع والفن الجميل .

كاظم الفضلي

[علي جاسم]

السلام عليكم

شعر محكي جميل وعذب

يكفي أنه يعبر عن جرح العراق

كما يعبر عن الواقع العراقي المعاصر

لك التقدير أخي

[كاظم الفضلي]

الأستاذ علي جاسم .. العراق
وطن جراحه بعمق الأرض ونزيفه
وجع شعبه وأنين ثكلى ودموع طفلة
اللهم ينصر عراقنا ويضمد جراحه ويمن
عليه بالأمن والأمان .. شكراً لك أخي الكريم
ودمت متفضلاً على متصفحي المتواضع .

كاظم الفضلي