العصفور والحرية

[عصام ميره]

العصفـــــــــــور


………….


عصفور وطاير م القفص


بعد ماطال حبسه




حقه قصاد عينه


ممنوع عليه لمسه..


نفسه يدوق الهنا


لو مرة من نفسه..


يشقى ويتعب سنة


عمره مايوم حسه..


أكله وشربه عذاب


حتى التراب لحسه ..


هو وصحبه وأنا


نفس البلا نفسه..


يشكى لطوب الأرض


مر الحياه . بؤسه..


لاحد سمع صوته


قلنا انقطع حسه..


علا صوته لفوق


ونسى قوام همسه..


حطم جدار الخوف


ودع خلاص أمسه..


………….


عصفور وطاير م القفص


بعد ماطال حبسه




وقالوا طيب فرح


لما الظالم دهسه..


ويغنوا عن عدله


ماشفنا غير عكسه..


سايبنا فى همنا


ماشبعش من هلسه..


إدينا من حقنا


حتى ولو خمسه..


ياخدنا شمال ويمين


دوخنا من رقصه..


الخلق كله اشتكى


من عضه من رفسه


طار يوم ويوم عام


نستنى يوم غطسه..


………….


عصفور وطاير م القفص


بعد ماطال حبسه




نروح لمين يسمع لنا


ماعدش طايق وشنا


ويوم مانخفى من هنا


دايبقى يوم عرسه..





واللى يكون عبده


ياهناه وياسعده


ويجى لنا من بعده


اسم النبى حارسه..


………….


عصفور وطاير م القفص


بعد ماطال حبسه




مسح اللى فات بدماه


والكل وقفوا معـــاه


مسكوا الغبى برضاه


أصله مريض نقصه..





والقرد مهما تاه


لف ولعب بهواه


ناسى حكم مولاه


نهايته فى قفصه..





واللى كانوا بيرتعوا


ومن دمنا مايشبعوا


لو فاكرين هيرجعوا


ينسوا خلاص ينسوا..




عصفور وطاير م القفص


بعد ماطال حبسه




كلمــــــــــــــــــات


عصـــــــــــــــــــــام ميــــــــــــــــره

[كاظم الفضلي]

قصيدة جميلة بموسيقى عذبة
دمت بعطاء وتواصل ..

كاظم الفضلي

[ريمه الخاني]

ماقصتك مع الحرية شاعرنا عصام؟؟؟
خيرا خيرا وتثبيت

[عصام ميره]

ماقصتك مع الحرية شاعرنا عصام؟؟؟
خيرا خيرا وتثبيت

أستاذة ريمه الخاني ..
القلب لو مش حر يموت ..
شكرا لك مرة أخرى على كلماتك وعلى التثبيت ..
اللهم ثبّتنا عند السؤال ..
عصـــــــــام ميــــــــــره

[عصام ميره]

شكرا لك أخي كاظم على مرورك الكريم ..
تقبّل مني أجمل تحية ..
عصـــــــــــام ميـــــــــــره