ربـاعيَّــات ليـثـيّــة

[دكتور أحمد الليثي]

حب الحكومة دا واجب علينا
وخدمة جنابها دي كلّ ما لينا
نبـوس بحرقة إيديها الأمينة
وشوطة رجولها علامة وفينـا.

[دكتور أحمد الليثي]

قومي يا مصـر وقولي لي: ليه معاكي احتـار دليـلي
النهـارده مكشَّـرة، وف الماضي كنتِ بتضحكي لي
مش هو ده وشِّك يا غالية، حتى نيلك مش هو نيـلي
والناس كمان اتغيرت، ولقيت عـدو مكان زميـلي.

[دكتور أحمد الليثي]

الحُـر لما يتغـرَّب يحمـل بلاده معـاه
والضحكة تتبـدِّل وتُصرخ م الألم جُـوَّاه
لا حد يمسح دمعته، ولا يواسيه في أساه
ويحلم بيـوم العـودة لاجـل ما تنسـاه

[دكتور أحمد الليثي]

صرخت يا امَّـايَّ وصوتي م الصراخ انبـحّ
وقلبي ينزف والدموع م العيون تنسـحّ
لا في حد يسمعني ولا طبيب يداويني
ولا دمعة تجف، أنا حيّ ولا ميّت صحّ؟

[دكتور أحمد الليثي]

غربة مرة تعدّي إنما غربة القلب ما تعدِّيش
حتى قلبي خدعني وقال لي "الغربة دي تهويش
والصبر عادة وأسهل م الصبر أيوه مافيش".
وآدي قلبي بيتحسّر، وبين ضلوعي يعيش.

[دكتور أحمد الليثي]

الغش دا طبـع ولاّ يا نـاس مُكْتَسَب؟
وليه الخسيس يترفع وللعُلا يتنسَب؟
وليه دنيتنا دُنيـا والخلق فيها وحوش
يتخانقوا على جيفة بدون حسب أو نسب؟

[دكتور أحمد الليثي]

ناس بتحلم بالورود، وناس حلمها كوابيس
تنكتب فيها الكُتب، وتتملي الكراريس
الورد ف حياتها ألم يتحط ع التوابيت
ويندفن ويَّاها، وحياتها، موتها، فطيـس.

[دكتور أحمد الليثي]

عصفورة كل كلامها زقزقـة وتغريد
ولحن جميل بيتهادي بطعـم العيـد
أسمع نغمها أنسجـم وقلبي سعيـد
وجَه شيطان الحسد، خدها معاه لبعيد.

[دكتور أحمد الليثي]

ياااه ع الحكم ... والكلام موزون
ساعـة تجلـي تفـوَّق المجنــون
حتى الابيض في الظـلام اختفـى
وأصبح كالجميع ... عديم اللون!

[دكتور أحمد الليثي]

نزلت م السمـا نجمـة، خدتني بالأحضـان
بصوت رقيق، ولحن جميـل فكرني بالخـلان
قالت لي ما انتش لوحـدك، وابتسـم يا خيّ
فتحت عيني، ما سمعت صوت، ولا لقيت ألحان.