شاميات

[رغد قصاب]

امثال جميلة وحلوة ومعبرة من ستك وستي .........

قالت-ستي
البخيل متل الكديش
بيحمل دهب وبياكل حشيش

قالت-ستي..
خايف هزك يا غربالي
يوقع منك كل عزيز وغالي

قالت ستي..
اللي بيعاتب الرخيص
بيرخص

قالت- ستي
اللي بقلبي علساني
واللي مو عاجبو ينساني

قالت-ستي
مو كل ورد خلق للشم
ولا كل البشر بتنفدى بالدم

قالت -ستي
لا تضرب وتغمق الجرح
مابعد العداوة إلا الصلح

قالت -ستي
نامو عندي ليلة
فكرو حالهم من العيلة

قالت-ستي
بنت الأصل
بتخلي كوخها قصر

قالت-ستي
الله يخلينا بعقولنا
لوقت نصل لقبورنا

قالت- ستي
لما الكلب يشوف اللحمة
مابقا يعبي عينو
الخبز والملح

قالت -ستي
يلي بيفشخ أكبر من فشختو
بيقع وبتنفك رقبتو

قالت-ستي...
حسدونا على ضحكتنا
حتى إجت الأيام وأخدتها

قالت-ستي ...
ماصفي حدا صالح
كل الناس مصالح

قالت-ستي...
ناس من لحمك ودمك باعوك
لا تلوم يلي مبارح عرفوك

قالت-ستي...
مو كل يلي بيحكي فهيم
ولا كل يلي بيسكت بهيم

قالت -ستي...
دروس الحياة مو ببلاش
دافعين تمنها من عمرنا كاش

قالت-ستي..
كله ماشي بألف وش
والقلوب مليانه غش

قالت-ستي...
الله يكفينا شر من رحب فينا وهلا
ومن ورانا حكى علينا وما خلا

قالت-ستي...
اشكي لربك ونام
ولا تشكي لبني آدم وتنهان

قالت-ستي ...
الدنيا بالضيق بتورجيك
مين ببيعك ومين بيشتريك

قالت- ستي
الغربة متل الحمام العمومي ... الي برا حيموت ليدخل، والي جوا موطايق الريحة

قالت-ستي
شيل الريحانه وشمها
وخود البنت على ريحة أمها

قالت -ستي ...
لا تاكل هم حدا
لأن وقت همك الكل عامل ريجيم........

الله يرحمك يا ستي وستي.......

[أبو فراس]

نحنا جيل معرض دمشق القديم !؟


الجيل يللي كان أحلى مشوار عنده مشوار المعرض

نحنا يللي كنا نحمل جواكيت الصوف بإيدينا مشان مانبرد بالليل وقت الرجعة ونحمي حالنا من رذاذ نوافير بردى الملونة

نحنا يللي كنا نفوت عالاجنحة وكل همنا نجمع كتالوجات وكتب وصور عن البلاد وصناعاتها ومالنا فهمانين شي عن المعروضات


نحنا يللي كانوا أهلنا يصورونا ادام النوافير والورود بكاميرات غليظة وكبيرة وورانا اعلام الدول يللي مشاركة بالمعرض


نحنا يللي كانت الفرحة ترتسم على وجوهنا وقت يفوتونا أهلنا على سوق البيع ليشترولنا البسكويت والشوكولا والبرايات الصينية والتحف الصينية من جناح البيع الصيني

نحنا يللي كنا نندهش وقت نفوت على سوق الصناعات اليدوية ونشوف كيف عم ينفخوا الزجاج يللي طالع من الفرن ليصير مزهرية أو زجاجة أركيلة .. ويطير عقلنا وقت يشترولنا أهلنا مزهرية صغيرة هلا انصنعت

نحنا يللي كنا نحب ناكل كنافة اباظة من على سطح سوق البيع مع انه كان غالي بتسعين قرش ونلعب زحيطة على رمبة مدخل المطعم يلي بيطل على السيف الدمشقي


نحنا يللي كنا ناكل من الأكشاك الدائرية كعكة مع قنينة حليب وقت نجوع ونتعب من التفتيلة ونسكرها بالاسكاية أمية على حليب أو شوكولاته

نحنا يللي كان يطير عقلنا وقت نفوت على قهوة الفنانين وقت عملوها بأحد الدورات ونشوف صلاح قصاص ويوسف حنا وهاشم قنوع وَعَبَد اللطيف فتحي ومنى واصف شخصيا ونحكي معهن كأنهن من عالم تاني


نحنا يللي كنا نحضر فيروز مع اهلنا بمسرح المعرض ونّام على رجلين أهلنا وقت تطول الحفلة وكل مايصفق الجمهور نصحى من اربعتنا

نحنا يللي كنا نخاف نضيع لأنه كل شوي نسمع من الهابرلوتات الخضرا المطاولة من إذاعة المعرض انه في ولد ضايع يرجى من أهله الحضور لأخذه


نحنا يللي كانوا اهلنا يوعدونا اذا سمعنا كلمتهن بالمعرض يطعمونا بالرجعة تسقية من المطعم الصحي أو شاورما من طلعة التجهيز أو سندويشة من عند فلافل المعرض


نحنا يللي كنا نتمنفخ وقت يكون معنا بطاقة " عارض " انه مندخل عالمعرض ببلاش مو متل الناس التانيين


نحنا يللي كنا نركب بباص المرسيدس الصغير ونتفاخر انه قاعدين بأول قاطرة ونغار إذا قعدنا بآخر قاطرة


نحنا يللي كنا ننطرب بأغاني فيروز مع انه كنا صغار ولحد هلا منهدس بصوتها وهوه عم يقول طرقت مجدك ...


نحنا يللي كنا ياخدونا اهلنا على مدينة الملاهي ونحضر فرقة عاكف والموتوسيكل بداخل الكرة المعدنية وهوه عم يلف ويدور

نحنا يللي عشنا المعرض القديم بهواه ونوافيره وألوانه ونهره وأكابريته ومسرحياته وجماله وكل شي حلو كان في دمشق ..
شو احلى الشي بيذكرك بمعرض دمشق الدولي .. !!

[أسامه الحموي]

🗒قصة الحيلة والفتيلة

من أكثر المصطلحات الشعبية السورية المتداولة ،
قديما كان على العروس ومنذ وصولها إلى بيت عريسها في المساء
عليها تغيير فتيل سراج بيت زوجها
بفتيل جديد
وتضع مكانها فتيلةجديدة عادة تجلبها مع جهازها
وتشعلها بنفسها رمزاً لنور عهد جديد وحياة مشرقة بالأمل .
وكان على العريس أن يتجالد فلا يقترب من عروسه حتى ينتهي احتراق الفتيلة
و ينطفىء الضوء ،
وكلما كانت الفتيلة طويلة كان على العريس أن ينتظر
ولذلك يُقال عن المرأة إذا كانت تتأخر في تحضير نفسها:
(فتيلتهاطويلة).
وكانت التقاليد توجب على العروس أن تضع دكة من الحرير للسروال الداخلي )"
و تحتال في عقد دكتها
بحيث يصعب على العريس فكها ولا يجوز له قطعها..!!
وكان على العريس أن يستعين بأظافره وأسنانه ليتمكن من حل العقدة التي كانوا يسمونها {{" حيلة "}} .
وكلما تأخر العريس في حل حيلة العروس كان ذلك رمزاً لتعففها،
ولذلك كان يقال عن المرأة المستهترة ؛
(الله يهديها دكتها رخوة)

فالتقاليد وقتها لم تكن تسمح أن تأتي العروس لبيت زوجها من غير
{ الحيلة والفتيلة }!!

ولذلك كانت تقول عن أثمن ما عندها من أشياء :
{ هذه الحيلة والفتيلة..!! }
حلب يارمز الأصالة ومنبع الحضارات وتوالد المدن

[أسامه الحموي]

فوائد الجلوس عالكرسي المعكوس ورا الشوفير بالميكرو ... "جنب الباب حصراً" :
1- بتحس حالك محاسب مالي للشوفير .. أو بنك مركزي أو أمين خزنة ... شغلتك "تلم المصاري من كل العالم" هالشي بيتطلب منك تشغل ذكائك بالرياضيات .. وبالحساب .. حتى تجمع وتطرح وتعرف شو ترجع للعالم .. وشو تعطي الشوفير .
2- ناطور للباب .. "فتح وغلق" الباب كل 5 دقايق للطالع والنازل وخاصة إذا الراكب اللي طالع أو نازل .. طفل .. امراة أو حجي اختيار .
3- "تركاية" .. يعني الراكب بينسند وبيتركى عليك .. إن كان طالع أو نازل ...
نصيحة .. خلي معك محارم معطرة .. خاصة اذا نزل طفل كان عم ياكل سكاكر ومصاص ملون .. ومعطك بالدبق .
وطالما إنك ناطور حارس للباب ... رح تتوكل بمهمة إضافية .. وهي "مُعقّب هويات" ... بتلم هويات العالم لتسلمها للعسكري اللي عالحاجز .. ليدققها .. والعسكري بيعرف مهمتك تمام .. بيرجعلك إلك الهويات حتى أنت ترجعها للعالم ...
هون بتحس حالك بمنصب وزاري على مستوى ... يعني شي بيشبه رئيس القلم بمخفر الشرطة ...
4- تقوية للحبال الصوتية .. بحيث انه السيد الشوفير مستمع جيد للأغاني الشعبية .. مارح يقدر يسمع صوت الراكب "المدحوش بالأرنة" .. وقت يقول نزلني ... فبتصرخ بإذن معلمك الشوفير وبتقلو .. "نزلو يا معلم" .
5- "وسادة حماية" ... هي الميزة بتتفعل لما معلمنا بيضرب فرام ماكن .. هون شغلتك "تستلئي العالم بالأحضان" ... شب، بنت، ولد .. مو مشكلة .. لا تقولولي حلال وحرام وفسد وضوئي !! ... هالحركة فعل بطولي إنساني لحماية الراكب من الخبطات العشوائية .. فجة .. نبيرة ... كدمات .. كسور لا سمح الله .. يعني شي بيشبه التأمين عالحياة .
6- الوصول بسرعة .. فجأة بتلاقي حالك وصلت .. يعني قاعد بالمقلوب .. ومابتكون شايف الطريق إلا بالعكس .. وخاصة إنك مشغول بالمهام الموكلة إلك ..
هون بتبتسم لحالك .. أنك وصلت بسرعة عالمكان المطلوب .. وبتنزل مبتسم ومبسوط 😁 وهون بيفكروك العالم مجنون ... بس أنت بتكون شايف حالك ومو مصدق ... إنك شغلت منصب مرموق متميز .. وهو "مساعد أول لشوفير ميكرو عالخط" .. يعني الكل بالكل .

هذا مايسمى بالنظرة التفاؤلية الإيجابية لركبة الميكرو بالكرسي المعكوس .

هالكلام مالح يفهمه إلا السوريين 😆

[أبو فراس]

فخر اللهجة الدمشقية ..

( لز ) يعني زيح ليجلس بجانبك ..
( حز ) يعني خط فاصل ..
( مز ) يعني وسط بين الحامض والحلو ..
( عز ) يعني نعيم وسعادة ..
( جز ) يعني اقطع ..
( دز ) يعني ادفع الشيء او أخبر عنه الشرطة ..
(كز ) يعني يضعط على الشيء بقوة ..
(هز ) يعني ارقص او حرك ..
( إز ) بمعنى إذا ..
( نز) بمعنى تسرب سائل اودم من جرح ..
(طز ) يعني بالناقص ..
( فز ) بمعنى قوم قف ..
( وز) بمعنى وشى على الآخر وبلغ عنه ..
(شز) يعني حاد عن الطريق الصواب ..
(غز) يعني اختفى فجأة او راح سلتة او بمعنى شك الدبوس

[رغد قصاب]

كلمات شامية قديمة جداً
كانت ولا زالت تقال 🤓

دشّرو : يعني حل عنو ( تركو )
----------
ماني غضران : يعني : تعبان ولست بقادر
----------
يوو الواه الواه : تعبير نسائي قح .. يفيد التمسخر علىٰ شي شغلة
----------
ايدي بزنّارَك : تعبير يستخدم للتعبير عن الرجاء ، والتوسل للشخص الآخر
----------
وضرّاب السخن : وهي مسبة .... مابعرف مسبة وبس !!!
----------
كوكش منيح : يعني : فتش بشكل جيد
----------
بحبش : أيضاً مفردة تعني : البحث مع التمحيص
----------
ينمحء : يعني ينضرب علىٰ قامتو .. أو يصطفل
----------
يتأمّع : كمان هيك شي
----------
عود يأعد رزك : يعني : اجلس ! خيَلتنا .. حاجة تحوص
----------
عألو جوزتين بخرج : يعني عقلو صغير كتير ، أوما بيفهم
----------
شوية لخر : يعني : بعد شوي ، بعد قليل
----------
تعال عود مشئيتي: يعني تعال اقعد بجانبي
----------

انا اتحدى غوغل انه يفهم هالكلمات 🤔🤔😰😰😰
😂

[ريمه الخاني]

مصطلحات سورية تخفي ماخلفها:ركزولي ع5 وع2😂😂

١- الحكي (بيناتنا).
للتشويق، وتُستخدم كمفتاح للدس والنميمة.

٢- (مالك علي يمين)
بداية لكذبة من العيار الثقيل لا تنزل بميزان أو قبان.

٣- (وحياتك عالغالي)
دعوة مبطنة لقصف عمر المتلقي.

٤- (بدك الحق ولا ابن عمه)
اعتراضية تستخدم لتمرير كذبة بالحجم العائلي وبحرفية عالية.

٥- (إلك ولا للديب)
لتحريض النخوة وتهيئة المستمع نفسياً لدفع خوة أو دين أو نصبة.

٦- (يا مرحوم البي)
يجوز استخدامها كموسيقا تصويرية ولزيادة جرعة الإثارة ولاستدرار العواطف..

٧- (مالك بالطويلة)
فاصل منشط محشور ضمن حكاية أطول من سيرة أبي زيد الهلالي وتجهيز المتلقي لكذبة ما.

٨- (محسوبك)
للمنفخة والاستعراض.

٩- (انسى الموضوع)
دعوة سريعة للاستفسار عن الموضوع والالحاح بذلك.

١٠- (الله يستر عليها)
لازمة في نهاية كل وصلة لنشر عرض بنات الحارة وصديقاتهن وقريباتهن

١١- ( سيدي ما علينا)
شارة مُعتمدة في ختام مسلسل نميمة من ثلاثين حلقة وليس بالضرورة ان يكون في رمضان

١٢- (مع احترامي إلك).
و غالباً تعني (يا ...) بطريقة مهذبة

١٣- (آخ لو كنت معنا ).
برغي سن بعزقة فوق (الكم) ..

١٤- (أنت لسه ما بتعرفني)
تستعمل للمداراة على البهدلة وسواد الوجه..

١٥- (ما كذبتلك خبر)
تأكيد على كذبة متوسطة المدى..

١٦- (اعرِف مع مين عم تحكي)
تهديد منتهي الصلاحية

١٧- وهيك شغلات
تستخدم في نهاية كل منشور للتشبيه والتنبيه

[نجاة علي ديب]

😀😀😀😀😀😀قالت ستي
وقت الكباب سكروا
الباب
ووقت المجدرة نادوا
للمعترة😂😂😂
اي نعم

قالت ستي
ابن آدم نصو خلقة ونصو خرقة
ويلي ما بتزينو عروقو ما بيتزينو خروقو
اي نعم

قالت ستي
البخيل متل الكديش
بيحمل دهب وبياكل حشيش
اي نعم😂😂😂

قالت ستي...
خدي الفارس
ولا تاخدي الدارس😂😂😂
اي نعم

قالت ستي..
خايف هزك يا غربالي
يوقع منك كل عزيز وغالي😂😂
اي نعم

قالت ستي ...
العشرة يلي هانت
ياريتها ما كانت..!
اي نعم

قالت ستي..
اللي بيعاتب الرخيص
بيرخص😏

قالت ستي
الأصيل أصيل ولو حظو على قدو
وإبن النعمة مبين ولو الزمن هدو
اي نعم👌😉

قالت ستي
مو كل ورد خلق للشم
ولا كل البشر بتنفدى بالدم
اي نعم😉

قالت ستي
قالتلا ياجارة سكبيلي .. ردتلا بكفوفي ولا بصحونك الي ع رفوفي😏

قالت ستي
لا تضرب وتغمق الجرح
مابعد العداوة إلا الصلح
اي نعم😁

قالت ستي
ناموا عندي ليلة
فكروا حالهم من العيلة😂😂😂😂
اي نعم

قالت ستي
بنت الأصل
بتخلي كوخها قصر
اي نعم

قالت ستي
خليكي عند أهلك عزيزة وشبعي دلال
صح كتار الشوراب بس قليلين الرجال😎
اي نعم

قالت ستي
قبل ماتركبي لأذانك حلق روحي ركبي لتمك غلق
اي نعم
😂😂😂😂😂

قالت ستي ...
ماصفي حدا صالح
كل الناس مصالح😉
اي نعم

قالت ستي...
الله يكفينا شر من رحب فينا وهلا
ومن ورانا حكى علينا وما خلا😏
اي نعم

قالت ستي
الغربة متل الحمام العمومي ... الي برا حيموت ليدخل، والي جوا موطايق الريحة 😂👍
اي والله

قالت ستي
شيل الريحانه وشمها
وخود البنت على ريحة أمها😍
اي نعم

قالت ستي...
يلي ألو غايب
بضل قلبو دايب
اي نعم

قالت ستي ...
لا تاكل هم حدا
لأن وقت همك الكل عامل ريجيم
اي نعم

قالت ستي...
الست مالها غير صحتها
لارجال بيشفع ولا أولاد بتنفع
اي نعم☺

شو رايكم بكلام ستي😊

[أبو فراس]

قصة مثل (دلق القهوة خير) 😂
هما قصتين :
🔹️الاولانية
كان فيه زمان قصر وكان بيتردد فيه ضيوف كتير
وكان المسؤول عن تقديم المشروبات☕ راجل اسمه خير
واما خير ده بدأ يكبر ف السن👴 بدأت ايديه تترعش وهو بيقدم القهوة ف بتتدلق منه 😰
واما صاحب القصر يسأل الضيوف مين دلق القهوة كان ردهم ( دلق القهوة خير ) 😅

🔹ا️لحكاية التانية :
ودي انا برجحها 😂😂

الشائع ست البيت الشاطرة 🤷‍♀️ بتتعرف من فنجان القهوة انه يكون بوش 👌
فكانت الحموات👵 اما بيروحو يتقدمو لعروسة 👰ويطلبو منها فنجان قهوة☕ علي اساس يبان اذا كانت ست بيت شاطرة او لا🤔
ف العروسة👰 من كسوفها وتوترها😰 وهي بتقدم القهوة تتدلق منها
فكانت بيقولو منعا لاحراج العروسة (دلق القهوة خير )😅

[ريمه الخاني]

صحيح اني لسه عايش بالشام
بس انا بصراحة

اشتقت للوجوه الشامية ..
اشتقت للوجوه يلي كلا رحمانية ..

اشتقت لناس ما بعرفا بتبتسملي و بتسلم علي ..
اشتقت لناس اذا شافتني حأوئع بتقلي الله ..
واذا ما معي فراطة بتئلي يسامحك الله
واذا كنت مهموم بيسألو خير ان شالله
واذا فرحان بيشاركوني الفرحة

اشتقت للوجوه الشامية
أصحاب القلوب الندية
يلي بيخافو الله
و للقرش الحرام بيقولو يبعدو الله

اشتقت للوجوه الشامية
يلي منشوفا بالصالحية و بالحميدية
ويوم الجمعة بعد الصلاة بتجتمع فيا ببلودان والزبداني، بمورة و أبو وحيد.

اشتقت
للوجوه الشامية يلي كلا براءة و بساطة
يلي اذا شافو صبي حلو
بيسألو عندك اخت بتشبهك للخطيبة

اشتقت للوجوه الشامية المتواضعة ويلي كلا أكابرية

هاد بلددددي 😔😔
هاد البيت طابخ ملوخّية ..
وهاد البيت عم يقلي بيتنجان ..
وريحة الخيار يعني سلطة ..
والسمك شارح حالو لحالو ..
ودبح البطيخة فضيحة ..
وبتوصل ريحتها لاخر الدنيا؟

أنا من بلد كان القمر فيه بالصيف
يعني سيران ..
وكل عرس يعني تلبيسة ..
وكتب الكتاب يعني ملبس.

انا من بلد كانت أمي تقول :
يا أبني “
غسل وجهك لأنك ما بتعرف مين بيبوسو
، و كّنس بيتك لأنك ما بتعرف مين بيدوسو”

وأبي يقول : “جارك أخاك ..
إذا ما شاف وجهك بيشوف قفاك”

انا من بلد لما بيندق فيه الباب منتحذر بين بعضنا مين وبنقول: يا ترى مين إجانا؟

هي نقرة الجارة .. سريعة وقصيرة،
هي دقة عمتي .. ناعمة وخفيفة ..
هي خبطة ابن الجيران ببوز صباطو ع الباب ..
وهي خشخشة المفاتيح ..
وبابا عم ينادي: يالله .. ليتغّطوا النسوان

انا من بلد .. الأساور الرفيعة والمبرومة والحيّة.

انا من بلد كاسات الليمون الجامد،
والتمر الهندي، و”الكاظوظة” الأورانج والكولا والقمر دين.

بلد الفول المقّألى بأيام الفول،
والمدّمس كل أيام الجمعة،
والتسقّية والسوس عافطار رمضان.

بلد كل شي بيصير فيه بيستاهل يكون خبريّة ..
ولدت القطة،
فتّحت الفلّة،
نزلت العوجة،
فّتح زهر نيسان.

بلد حتى حبال الغسيل فيه بتحكي قصص، ولقّاطات الغسيل بتنقل رسائل الغرام،
ونشر الغسيل إله أصوله
مشان ما يقوله عن الست شرنه أو عفشه.

بلد كانت الست تقول: “
لو كانت أسوارتي وقيّة
ما لي عن جارتي غنيّة”

بيت الجيران أول باب بيندق لما بيخلص الخبز على غفلة،
ولّما ما بيلتقى ليمونة.

بيت الجيران مصدر قالب البوظ بالصيف
لما بيجوا الضيوف فجأة
والبيت ما فيه بوظ.

بيت الجيران أول بيت بنزوره بالعيد
لناخد أول عيدية

والبيت يلي بيتحمل ولدنتنا
وقت ندق على سقّاطته وبنهرب.
ومنرش عتبته بالمي لما بندير البربيش
لنرش الحارة بالصيف

والبيت يللي بنوقف قدامه
لنوصّله سكبة اليوم ..
كل مغرب برمضان.

ببلدي ما فيه قطّة جوعانة ..
وكلاب الشوارع شبعانة

وبكل أرض ديار ..
بحرة ونافورة وفّلة ودالية وكّبادة ونارنجة وياسمينة عراتلية
بكل مطبخ قطرميز مكدوس وتنكة جبنة ونملّية.

ببلدي .. كانت ايام الشتا ..
ياعيني على أيامها ..
كانت الصوبيا .. ولهبها ..
عم يقمر الخبزات ويشوي الكستنا ..
وكاسة الشاي يلي عم تتنقل من إيد ﻷيد بجلسة فيها طنة ورنة..

ببلدنا الغيرة بتشعل فينا
مو بس اذا حدا اطلع أو لطش اختنا ..
كل بنات الحارة إخواتنا.

نسيت خبركن ..
أنه بعد كل سيران
لازم نتحمم قبل ما نطلع ع التخت
ﻷن الشراشف نظيفة
و وجوه المخدات مغيرين.

وين هديك الايام ..
ياترى رح ترجع المحبة والوئام
ولا رح ترجع الغوطة وريحتها الندية

انا متاكد اننا لو صرنا ايد وحدة
رح نعمرها لسورية ونساويها
الجنه السورية