اغاني ومعاني لكل المناسبات

[يسري راغب شراب]

في انتقاد الاثرياء كتب محمد نجم
غناء الشيخ امام وكلب الست
----------------------------------

كلب الست
ف الزمالك من سنين
و ف حمى النيل القديم
قصر من عصر اليمين
ملك واحدة من الحريم
صيتها أكتر م الأدان
يسمعوه المسلمين
و التتر
و التركمان
و الهنود
و المنبودين
ست فاقت ع الرجال
ف المقام و الاحترام
صيت و شهرة
و تل مال
يعني في غاية التمام
قصره يعني هي كلمة
ليها كلمة ف الحكومة
بس ربك لجل حكمة
قام حرمها م الأمومة
و الأمومة طبع ثابت
جوه حوا من زمان
تعمل ايه الست
جابت فوكس رومي و له ودان
فوكس دا عقبال إملتك
عنده دستة خدامين
يعني مش موجود ف عيلتك
شخص زيه يا اسماعين
و اسماعين دا يبقى واحد
م الجماعة الغلبانين
اللي داخو ف المعاهد
و المدارس من سنين
حب يعمل واد فكاكه
و يمشي حبه ف الزمالك
و الأيامة و الفتاكة
يرموا طبعا ع المهالك
عم سمعه من قيامته
حب يعمل فيها فله
بعد ما ألوظ بيجامته
اشترى حتة مجله
قول مش بيقراف حكاية
من حكايات الغرام
و اندماجه ف القرايه
خلا مشيه مش تمام
ع اليمين يحدف بعيد
خطوتين
و تروح شمال
لمحه فوكس من الحديد
قال دا صيد
سهل و حلال
هب نط ف كرشه دوغري
جاب بيجامته لحد ديلها
اسماعين بدال ما يجري
قال يا رجلي
رجلي مالها
بص شاف الدم سايح
من عاليها و من واطيها
و ياللي جاي
و ياللي رايح
المجلة مش لاقيها
حبه و تلمو الظنايا
اللي هما البوابين
و الهكايه و الروايه
قال لهم دا كلب مين ؟
كلب مين
ما كلب مينشي
سمعه لبخ حبتين
قال له واحد فيهم امشي
اللي جابك انده مين
قال دا شارع يا مواشي
للجميع
راكب و ماشي
كلمة من دا
و كلمة من دا
ظاطو و انقلبت فضيحة
قول نهايته و القصد من دا
اسماعين شرب الطريحة
راحو اسم الشرطة طمعا
و النيابة كفيلة بيهم
و اترموا ف الحجز طبعا
لما ييجي الدور عليهم
شاف بلاوي ما تنحكيش
م الهفايا المحبوسين
قال يا عالم
يا شاويش
يا نيابة .. يا مسؤلين
خلصوه بعد المناهدة
جثه
من جحر الديابه
هي يمكن ساعة واحدة
كان ف مكتب النيابة
قال له ـ مالك يا اسماعين
قال له ـ زي البمب مالي
قال له ـ عضك فوكس فين
قال له ـ سيبني أروح لحالي
انت شوف سي فوكس يمكن
خد تسمم غصب عني
الوكيل قال برضه ممكن
و الشاويش قعد يغني
هييص يا كلب الست هيص
لك مجامك ف البوليس
بكرة تتولف وزارة
للكلاب
ياخدوك رئيس
انت توى ف النيابة
تسعمية من الغلابة
طب يا ريت يا فوكس كنا
و لا تربطنا الجرابة
انت فين و الكلب فين
انت كده يا اسماعين
طب دا كلب الست يا ابني
و انت تطلع ابن مين
بشرى لصاحب الديول
ولــللي له أربع رجول
بشرى لسيادنا البهايم
من جمايس أوعجول
اللي صاحبه يا جماعة
له أغاني ف الاذاعة
راح يدوس فوق الغلابة
و النيابة
بالتباعة
هيص يا كلب الست هيص
هيص يا كلب الست هيص

[يسري راغب شراب]

وفي حب الام لابنتها نغني المعاني
مع صباح

صباح
امورتى الحلوة


امورتى الحلوة بقت طعمه ولها سحر

جديد لها خفة روح لما بتضحك بتروح لبعيد

معذوره ياناس لو خبيتها من العيد للعيد

لو شفتوا جمالها هتحتاورا تحتاروا تحتاروا

والبيض والسمر هيداروا يداروا والحب

هتحصل فيه أزمة وتسعيرته هتزيد

**********

علشان ماهى بنت 17 قال يعنى خلاص

تزعل منى لو ابوسها قدام الناس

وان قولت حبيبة امها وشها يحمر

وان قولت اكلك يابطة تخاصمنى شهر

تطول اد ماتطول تكبر اد ماتكبر

جوه القلب هتفضل زى الاول واكتر

لو شفتوا جمالها هتحتاورا تحتاروا تحتاروا

والبيض والسمر هيداروا يداروا والحب

هتحصل فيه أزمة وتسعيرته هتزيد

**********
دى حبيبتى ومش بس حبيبتى ده احنا اختين

والفرحة الواحدة بنقسمها على ضحكتين

ياما نفسى اشوفها بتتمختر فوق جمب الشمس

واكتب على باب السما يااسطى ممنوع اللمس

تطول اد ماتطول تكبر اد ماتكبر

تطول اد ماتطول تكبر اد ماتكبر

قلب الام هيفضل زى الاول واكتر

لو شفتوا جمالها هتحتاورا تحتاروا تحتاروا

والبيض والسمر هيداروا يداروا والحب

هتحصل فيه أزمة وتسعيرته هتزيد

************