هواجس...

صح عودتني اوياك امشي
ومن امد ايدي
عله اطراف الاصابع
تعبر بلاحد
وصح تزعلني واشوف الناس كله اهموم
بس وجهك لكَيته ادموع
حفرن ابوجهي السنين
اوجهك بلا خد
وصدك ..
اتمايل بلا طول...من شلت الحلم
من بالي وعيوني
ونسيت اخيالك بياليل
فوك اخيالي يتمدد
جذب ماصدكَت الكَاك
كل همك تسجل لحظه بسنيني
لكَيتك ساعه وقتهه الدهر مرتين
مره ابمولدي وبس امي من تصرخ
وعرفتك ساكت ابوجهي
وانه ابين اليحبني ويكره اتفرهد
ومره من كَتلك حبيبي...
طاحت الساعه الجبيره وظل عله
الحايط
فقط
مسمار
اسود
وصار كل طبعي غريب
مره اشوف اعيوني واللساني وأديه
وجرح واحد بالرصيف
نكَعد انشيل الجرح
الكَه الرصيف ابين اديه
والجرح بالكَاع حافرله صليب
طيب...
يالاسمك بطاقه
اومزاد
ويانصيب
طيب...
وذكرت..
جنت اشم بنفسي حجيك
ونفسي كل الليل عالجامه ضباب
اشلع الشباك كله وماأشوفك
أمد أيدي تتجيلي الدفاتر
حسك بكل كتر بيه وجفك بكل غرفه باب
طيب..
يالطبعك غريب
أنه عشت أوياك كل هاي السنين
تحفر ابطن الفرات
تكَلي اصبر نبني بيت من التراب


كاظم الفضلي
لكَيته / وجدته
فوك / فوق
جذب / كذب
صدكَت / صدقت
أتفرهد / أتبعثر
الجبيره / الكبيرة
نكَعد / نجلس
جنت / كنت
حجيك / كلامك
تتجيلي / تعينني ( أي أتكئ عليها )