ربـاعيَّــات ليـثـيّــة

[دكتور أحمد الليثي]

في ضلمة عايش، وفِ الضلمة هاموت
مـرة باشا، ومرة م الضنـا هلفـوت
عشت ف نعيم، وياما قاسيت وبكيت
ومرة أعمـل فار، ومرة أعمل حـوت.

[دكتور أحمد الليثي]

الدنيـا دوَّارة ما تِأمنهـاش
ما بتدومشي لحيٍّ عاش
ولو جت لك وزاحفة لك
مافي حاجة يا عم بلاش.

[دكتور أحمد الليثي]

قالوا لي روح اتجوِّز، قلت يا عمي إتنيِّـل
لا فيَّ حيل انعـدل، والحال اهـوه مميِّــل
أجيب لي داهية يا ناس، وشايلة مية عيل؟
دا الشابّ بعد الفرح .. شحـات وبيريِّل!

[دكتور أحمد الليثي]

بمية ورد دا قلبي كده مغسول
بروح المسك متعطر وإبن أصول
ماليش ف القسوة، لكن عقلي
ما يخدعهـوش كلام معسـول.

[دكتور أحمد الليثي]

يا عم سيبك م النســا
بلا لخبطة، بلا لحوسة
في الحب تبقى الواحدة شوكة
وانت فولة مدمسة.

[دكتور أحمد الليثي]

الحب ده ترباس ... ومش مقفول
القلب فيه شلال، والعقل ياااه مشلول
البنت فيه تتهبل، وييجيلها منه ذهـول
ويبقى الجدع تمساح، فجأة يكون دلدول.

[دكتور أحمد الليثي]

في دنيا بمبي كلنـا تايهين
فوق وتحت، وشمال يمين
أصل الأسى على كل لون
وفي الضلمة تتبرجل التلاوين.

[دكتور أحمد الليثي]

النجم عالي وانا إنسان
كما النقطة ومش بتبان
ولما اشكي واقول "يا نجم"
مافيش نجمة وليها ودان.

[دكتور أحمد الليثي]

أصالح العفاريت، أبالسة أو شياطين
وكل خلق الله، العُقًلا أو مجانين
وكل عقرب سام، وأنكد التعابين
ولا احط إيدي في أيد واحدة م النساوين.

[دكتور أحمد الليثي]

فرج الإله نازل بشعلـة نـور
تزيح عنا الضلام وتمسح جور
إذا ما الخل يدبحني بحد السيف
أدعي لُهْ ربي واقول معـذور.