ربـاعيَّــات ليـثـيّــة

[دكتور أحمد الليثي]

فنَّان صحي م النوم كده زعلان
قام على عوده يدندن الألحان
كسر الأوتار وبوَّظ الأوزان
لا نعرف عِقِل والا أصابه جنان.

[دكتور أحمد الليثي]

ليه في الزمن ده النـاس بقت مسعـورة
تظهـر دناءة طبـع وهي مش معـذورة
والخِـل يغـدر، والأحبة كتيـر بتخـون
والحق باطـل، وراية العـدل مكسـورة؟

[دكتور أحمد الليثي]

حتى النعام بيجيله يوم تترفع راسُـه
واحنا دفنَّـا المجد، وقلنا احنا حُرَّاسُـه
وِفْ عالمنـا اعتلى عرش العز أنجاسُـه
منين يجينا الشرف، واحنا مش ناسُـه؟

[دكتور أحمد الليثي]

لولا الأمل في الله ما بتهنـا مشاربنـا
في الجُبن راحت لِحانـا ويَّا شواربنـا
طرحة نِسا ولبسنـا، والذل صاحبـنا
وكل نـدل خسيس آكلنـا وشاربنـا!

[دكتور أحمد الليثي]

عملوا لنا مركز قومي للمواليد
وغيـره إحصـا وبعزقة وتبـديد
وقالـوا نزبط عـددنا بالتحـديد
وسرقوا البلد وعيالنا اهُم مطاريد.

[دكتور أحمد الليثي]

نسمـة هـوا تنعش نفـوس حـرَّانة
بسمة حبيـب تحيي قلـوب حيـرانة
كلمـة طبيـب تشفي جـروح وآلام
وانا اللي عزّ الدوا، والدمعة سهـرانة.

[دكتور أحمد الليثي]

ع الشط قاعد باشاهد صبايا الحور
شايلة زلعتها فِ خطوتها أتوه ف بحور
تمشي تتأنى وتستنى لاجل اعاكسها
ولساني عفّ، وفؤداي ف الهوى مجبور.

[دكتور أحمد الليثي]

واهيه بلطية بتتلوى في بطن هواك
تفكرني بسعدية وخطوتها تقولش شباك
يا سمــك قل لي مين علم التـاني؟
الأصل سعدية؟ ولا دي زفلطة أسماك؟

[دكتور أحمد الليثي]

عجبي على شاعر ما يعرف غير الأكاذيب
يمشي يهلل ورا ناعق بشكل غريب
عدو الحق، في الصنعة بينفخ كير
ما عاد يعرف لو حلفنا له محل الطيب.

[دكتور أحمد الليثي]

من امتى كلام النسا يا خلق خوِّفنـا
الباب يعدي الجمل، وآدينـا قايسنا
ساطور وكيس م الهفق: مرحب، يجالسنا
أحلِف دا كُتْر النسا هو اللي واكسنا.