وبْـضمير الشعب قــرر .... أحمد مصطفي البري

[ضياء الدين البري]

أحمد مصطفي البري

كتب :

...

وبْـضمير الشعب قرر

...

بالمشيئـه ..

مش هايحصل ..

إني أرجع تاني واغفل

مهما حاولوا يهدّوا حيلي

أو يحاوطوا بيّا ليلي

أو يصرّوا إني أرحل

مش هايحصل

***

بالمشيئه ..

مش هايحصل ..

مش هانتعب

مش هانغلب يوم ونركع

مش هانغضب يوم ونرجع

مهما غولة الويل تدبّـح

مهما بومة الليل تقبّـح

مش هانخضع ..

مهما كان الرعب أبشع

أو ذيول القهر أفظع

بالمشيئه بكره أجمل

***

بالمشيئه ..

مش هايحصل ..

إن ريق الأرض ينشف

أو جسور في النهر تضعف

مش هانسمح ..

إن صوت الحق يهرب

مهما شوفت فْ بكره أصعب

مش هايقدر..

أي حد يهد عزمي

أو يهرّب مني دمي

يمحي نبض القلب مني

أو يخيّـب فيّا ظني

مش هايحصل ..

مهما شوفت الدّبّـه قاسيه

جايّه تنزع مني قلبي

أو ذيول الفوضي عاصيه

ناويه تزرع فيّا رعبي

لجل روحي عني ترحل

يبقي لسّـه الندل أهبل

قص ذيله يبقي أسهل

***

بالمشيئه ..

مش هايحصل ..

إني أسجن فيّا نبضي

وارجع أهمل نبت أرضي

مش هانقبل ..

إني أفضل شيء مضلل

مهما عشت كتير مليّـل

أو عليّ الليل يطوّل

أصل توب العار رميته

ذنب كنت فْ يوم جنيته

ومّـا ربي فْ علمه قدّر

وبضمير الشعب قرر

قام بثوره مش هاتقبل

إلا بالتطهير وأشمل

لجل بكره نعيشه أفضل

ثوره ناجحه الله أكبر

والشهيد في الجنه نوّر

وفْ قلوبنا الفرح هلل

لمّا نصر الحق جلجل

....

[ريمه الخاني]

وأهلا بنبض مصر وروح مصر هنا
رعاكم الله وحماكم لنا
وتثبيت

[ظميان غدير]

قصيدة رائعة وجميلة
اخي الشاعر احمد مصطفى
سرني قراءة القصيدة
واهلا بحرفك الحي
تحيتي

[كاظم الفضلي]

نص جميل .. وثورية عربية وانتماء
أكيد .. أبداع أخي الشاعر أحمد مصطفى
تحيتي اك .

كاظم الفضلي