قصيدة عاش الزعيم

[منصور عبد الغفار]

قصيدة عاش الزعيم للشاعر المستشار

منصور عبد الغفار

نظرا لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل هانردها
نستحلفك ……. نسترحمك
نستعطفك …….نستكرمك
ترحمنا من طلعة جنابك حبتين
عايزين نجرب خلقة تانية
ولو يومين

اسمع بقى
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد

بيني وبينك حضرتك
دا شعب فقرى مايستحقش جنتك
أنا عارفُه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد ‘غازه’ لإسرائيل
ويومين كمان ويمد نيل
أهو يعنى

نشرب ميه واحدة
ندوب سوى
ماااااااااااء وماااااااااااء ومااااااااء
ونفض سيرة الانتماء
وبلاها نعرة وطنطنة
تبقى البلاد ‘مستوطنة ‘
متسلطنة بالسرطنة
إيه اللي خدناه م الكرامة والإباء
حبة خطب وكلام…كلام
إحنا راهنا على النظام
ورضينا بخيار السلام
بخيار خيااااااااااار

هانسد عين الشمس بيه

علشان مايطلعش النهار

ويطلع لمين

حبة معارضة مغرضين

وحسب بيان السلطة

شلة مأجورين

ياعم فضك سيرة
وارضى بقسمتك
دا شعب مش فاهم أكيد
يلا اطرده من رحمتك
وإن كنت غاوي الحكم
خليك مطرحك
وانا هاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
تضرب ينفض في السليم
وعلى الصراط المستقيم
كل اللي يقدر ينطقه
عاش الزعيم
يحيا الزعيم

[ريمه الخاني]

مر ور وتحية لك شاعرنا
واراك مباشر جدا في قصائدك
وفقك الله ورعاك

[ظميان غدير]

قصيدة وطنية رائعة
سلمت على هذه القصيدة
تحيتي

[منصور عبد الغفار]

مر ور وتحية لك شاعرنا
واراك مباشر جدا في قصائدك
وفقك الله ورعاك

الأخت الأديبة المحترمة

ريمة الخانى

كنا فى مصر نحاول استنهاض الحماس المكنون فى صدور المصريين

فكان لابد أن نوجه للعامة وليس للنخبة ما يفهمون من اللغة ولكل قوم لسان

ولكل مقام مقال أشكر حضرتك على هذا المرور

لا حرمنى الله رأيك ولا مرورك

دائما فى انتظار الرأى

[منصور عبد الغفار]

قصيدة وطنية رائعة
سلمت على هذه القصيدة
تحيتي

الأخ الفاضل الشاعر

طغيان غدير

بوركت على رأيك ومرورك

أتمنى أن تظل دائما بالقرب