المصدر : لقمان ديركي 04/09/2009
سيشهد الجزء الخامس في العام القادم من مسلسل باب الحارة عودة «أبو عصام» و «العكيد أبو شهاب» و «أبو غالب.. بل والاحدعشري معاً، هذا هو العرض الأكثر إثارة الذي ستتلقَّاه الشركة المنتجة للعمل من مخرج العمل اللي نسيت اسمه، حاكم صار يحطه بالأول مو بالأخير، يعني صار اسمه قدَّام، وبما أني متعود ادوِّر على اسم المخرج بالأخير فلقد نسيته، المهم ما تفكّروا أنو المخرج حاطط اسمه

قدّام لأنو نرجسي وغاوي نجومية، لأ.. بل لأنه بصراحة ما لاقى ولا اسم من الأسماء اللي معه خرج تنحط قدّام، أصلاً ولا واحد منهم طالب بهالشي، عودة العكيد ما بدها كتير شغل بالكتابة وبالتأليف، فالزلمة اختفى وعودته ممكنة بأي لحظة، ذلك أنو المخرج هالمرة حفظ له خط الرجعة، لهلأ ما واجهه مع السيد عزو.. عزرائيل، لكن المعضلة ستكون عند أبي عصام ألف رحمة الله عليه اللي خلَّف لنا معتز البطل وعصام الشجاع، ذلك أنو جنازته طلعت بأول حلقة من الجزء الماضي، بس للأمانة ما حدا شاف وجهه للشهيد أبي عصام، لذلك فأمر عودته حقه جملتين من خليفة الحكيم والعكيد معاً الحكيد أبو حاتم، والحكيد ما عاد عرف مين بدّه يخلِّف ليخلِّف، أما أمر خلافة أبو غالب الخسيس فلقد تنازل عنها للنمس أحسن ممثل في التاريخ حسب تصريح مخرج العمل أللهم صلِّ على النبي.. نسيت اسمه، وأبو غالب شغلته رفع أجر.. بسيطة.. حديد بحديد بتنحمل، يبقى الاحد عشري رقماً صعباً في العودة هنا، فلقد شفناه شوفة عيننا عم يتوفى، وصار بدها شوية براعة في الكتابة بهدف إقناع البهيمة اللي قاعد عم يتفرج، سيدي بنقول ساعتها أنو اللي مات مو هوّ.. شبيهه الدوبلير هو اللي واجه أبا العز على اعتبار أنّ الدوبلير يأخذ دور النجم في اللقطات الخطرة، وهل هناك أخطر من مواجهة عزرائيل؟!!!.. باب الحارة 5 أو صراع الجبابرة للمخرج.. والله نسيت اسمه.. شو كان اسمه.. أللهم صلِّ على النبي