فاضل له ساعة
طبيب و جي تزرني
بعد ما وصل الموت
جابك ولاد عمي
في الوقت
اللي مش مظبوط
لو كنت تحضرني
ساعة طلوع الروح
ساعتها كان الموت
سكراته بتألمني
وأنا ضعيف هلفوت
*****
لو كنت تفضل جنبي
وتمشي ورا الأنات
فين يا طبيب ما تروح
وتطيب بقي الآهات
والقلب اللي بات
مجروح
****
كنت ها تصبَّرني
وتروي أشواقي
تزرع أمل فيَّا
وتقول لي فيه باقي
من عمري وزماني
و دنيتي الفانية
يجي كم دقيقة وثانية
ألحق بقي وأعيشهم
فيبددوا احزاني
***
جابوا كم طبيب قبلك
بالبالطو والزعبوط
كشف ولهف الفزيته
بالفلس والسحتوت
وكتب بسرعة روشتة
سطربن دوا لعلاجي
مافهاش دوا طبي
غير تعليمات و نصايح
لا تجيب ولا تودي
قال إيه بينصح اهلي
لو خايفين م الفضايح
إعدلوه ع القبلة
و أدعوله ما يتعذبش
حضروا له الخرجة
الفدو عجل وكبش
والمعزي يكون فرجه
صيت كبير وصوان
فيه الكهارب سارجة
*****
سألوة عن العلة
وعن الزاد والقوت
قال : يشرب من القلة
وياكل اللي ف نفسة
لو حتي مُربَّة توت
والزاد خضار مسلوق
أوأي أكل في داركم
من غير دهون وزيوت
باين عليه غلِّبكم
من كتر العلاج وخلافة
وأنا ناوي أفرَّحكم
فات الكتير م التعب
والمولي صبَركم
وبعتني ليكم النهاردة
لجل ما ريَّحكم
خدوا الميراث من عبه
هاتوا كفن وحانوت
لجل مقابلة ربه
فاضل له ساعة
و يموت