اقتباس المشاركة الأصلية كتبت بواسطة د. جمال مرسي مشاهدة المشاركة

ضتح عطم

" مهداة للصديق الجميل د. أحمد الليثي "

ضتَّح عطَّم
ضم حروف الكلمة و دوّر عن معانيها
تفتح كل عروقي تلاقي .. كل كلامك ساكن فيها
حدد عدد اقعد مدد ، ربك وحدو اللي يسويها
ضتَح عطَّم
علشان خاطر العيش و العشره اللي انت شاريها
طبعاً طبعا .. و الأخلاق اللي بتأنيها
مش راح أفرط في الأحلام أو يوم أمحيها
:
:

جاني جوابك فيه إحساسك
افتح يللا قوام كراسك
و اقرا معايا الدرس الأول
حرف الضاد : ضيعت شبابي
و قدت شموعي عشان أحبابي
و كنت بقول على ربي حسابي
جيت و زرعت الفرحة ف. قلبي
و كنت النور بينور بابي

حرف الته .. تأمر تلقاني
بين دراعاتك جايلك تاني
ننسج غنوه جميلة و حلوة
و اما أشاكسك تستنناني
و حرف الحا .. من ضتّح عطّم
حاسب يللا على المشاريب
و اعزم كل قريب و غريب
و الموساد لو جه نحيتنا
يبقى يا ويله من الكراكيب

عطّم طمطم مطعم عزّم
علّم يللا بعزم و صمم
من كتاباتك انا بتعلم
طعم كلامك حلو و سكر
بس ف . حلق عدوك مرر
مرر مرر
و اكتب يللا معايا و دوّر
ايه معناها ضتّح عطّم
ضربة بإيدك تحت حزامي
اللي لبسته يا دوب بالكاد
عادي يا صاحبي .. رايح اسمحلك
لو بطريقة العم موساد
بس هتلقى العزم جبال زي الأوتاد
واقفه لإيدك بالمرصاد .
ضتّح عطّم
ضتّح عطّم


أخي الحبيب الدكتور جمـال:
إن شاء الله لي عودات وعودات. وها هي أولها:

ضَتَحْ عَطَمْ ضَتَحْ عَطَمْ
ما يهمنـا أكبـر صنـم
حتى ان كان راعـي لغنـم
أو شاف نفسه ف قمة هرم
نفخة وهشَّـة يعود للعـدم.

ضَتَحْ عَطَمْ ضَتَحْ عَطَمْ
آدي تعويذة وجَت بنتيجـة
صنعة إيدي مع خالتي خديجة
عَمَلِتْهـا بمستكـة تحويجـة
والعفـاريت منهـا بتتعلـم.

ضَتَحْ عَطَمْ ضَتَحْ عَطَمْ
يا حلاوة من نام مظلـوم
مش ظالم ينعس ما يقـوم
م المولى تلاقيـه مدعـوم
ولا يمكن مـرة هيستسلم.

ضَتَحْ عَطَمْ ضَتَحْ عَطَمْ
حرف الضاد ضربة ومحسوبة
بالشومة وكمان بالطـوبة
وانتفاضتنا يا ناس مكتـوبة
والنصر حليفنـا بيتكلـم.

ضَتَحْ عَطَمْ ضَتَحْ عَطَمْ
أما التِّه بقى تحت الراية
نجمع كلمة، وربنا غاية
نعلن "ح" والحرب بداية
ع الظالم، والظلم نكمِّم.

ضَتَحْ عَطَمْ ضَتَحْ عَطَمْ
والعين: عيني عليك باردة
لا يهمنا شَدَّة ولا فاردة
ولا حتى شاردة ولا واردة
طول ما القلب لربه مسَلِّم.

ضَتَحْ عَطَمْ ضَتَحْ عَطَمْ
والطَّه طِينـة أراضينـا
وترابها إن يوم يوارينـا
ما نفرط فيها لصهايينا
ومعادنا القدس ونتعمم.

ضَتَحْ عَطَمْ ضَتَحْ عَطَمْ
والميم ما احلاها الجنـة
وشهيدنا فيها بيتحنَّـى
وملايكة ربك تتغنـى
ونهلل، وما عاد نتألـم

ضَتَحْ عَطَمْ ضَتَحْ عَطَمْ