دخيــــــــــــــــــــــــل رب الشـــــــــــــــــــــــــام ^_^

نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
هي هيه الش...ام الشام لويعرفوا شو الشام؟؟؟؟؟

الشام شامة الدني...الشام الربوه وقهوة أبوشفيق وصخرة أذكريني ....
الشام سيران يوم الجمعه ياعند موره ببلودان يا عند أبووحيد بالفيجه ...
الشام الكسدوره عاطريق المطار أو القعده بالهويات بقاسيون ....
الشام الروحه بعد السهره عالميدان العشا بالمحبه أو سندويشة شاورما عالماشي ....الشام التفتيله بالشعلان أو باب توما والأحلى بالشام العتيقه أرجيله بالنوفره وعشا ببيت جبري .الشام......
الشام السهر برمضان للصبح ...
وسهرة راس السنه الغير شكل الشام الجار جار حتى لو جار ...
الشام صوت بياع الغاز وصوت سيارة المازوت وترغلة بياع الخضرا الشام سوق الهال والحميديه وبكداش الشام قلعة دمشق والبوابات السبعه الشام نزار قباني ... ا
لشام بردى ..الشام .. الشام لويعرفوا الشام؟؟؟؟
الشام لمة الشباب بقهوة الروضه الشام بعده حلوه لناكل صباره ....
الشام سيران الشباب يوم الجمعه عالمسبح ولمة الصبايا عاصحن تبوله......الشام فنجان قهوه مع فيروز وكسر سفره بمكدوسة وكاسة شاي وخبزه مقمره عالصوبيا.....الشام الغدا الساعه3صحن حراق أصبعة وكوسا محشي.....الشام تشعل شمعه بدير صيدنايا وتطعمي الحمامات بساحة الجامع الأموي....
الشام ضجة الولاد بالباحه ....الشام معرض دمشق الدولي وفيروز عم تصدح سنرجع يوماً....الشام العرس للصبح ....الشام حديقة تشرين ولقاء العشاق بالسبكي والجاحظ وجنينة الطلائع ....
الشام عربيات الفول النابت....
الشام صح النوم وحمام الهنا وكاسك ياوطن.....
بلدي وبلدك الشام لو يعرفوا شو الشام....
الشام العجقه بطلعة جسر الثوره والقطايف والكنافه من عند نبيل نفيسه والزحمه بسوق الحميديه. الشام غْزل البنات ......
الشام باب شرقي وباب الجابيه. .
الشام العجقه تحت جسر الرئيس بعز الشوب ......
الشام التكسي والعداد ونص عالمشروع الشام فلافل بيسان وبن كنفش وأحلى سوق التنابل والهبي لاند. الشام بسطات الفستق الحلبي بأيلول وطرطشة السيارات بمطرة تشرين وطابات التلج المرصوصه رص بكوانين الشام ...الشام السبع بحرات والمزه والشيخ سعد وكفرسوسه .... الشام البيوت العتيقه المعربش عليها الياسمين الشام سبيل المي اللي مابيخلي حدا عطشان الشام حبنا الأول ونجاحنا الأول وفرحنا الأول الشام قوتنا وقدرتنا . الشام كل شي بيكفي إنها الشام أول الكلام وآخره..... الشام الناس بتسلم عليك بالطريق كأنها بتعرفك من مئة سنه.....
الشام لمة الجيران عالأسطوح للصبح ولعب الشده شغال باصره كونكان طرنيب وعلى كيف كيفك.....
الشام الدفا بعد البرد الأم اللي بتلم .....
اللي عنده أب وأم وماعنده الشام يتيم......
الشام خضره ومي ووجوه حلوه ....الشام أول حرف وآخر كلمه ...
.الشام أمان بالروح قبل المطرح .....
الشام بأهلها وسكانها الشام شامة الدني.....
الشام زفة العروس وعراضة العريس الصبح الشام ام العز والكرامة ...
الشام بالحزن تمسح دمعتك وبالفرح تفرح معك الشام ...أنتي يلي مابيخلص الحكي عنك ....
الله يحميك يا شام

مساكن شامي بامتياز