كتبت هذه القصيدة فى الايام الاولى لتوّلى اوباما حكم امريكا
*********************************************

الفتي لسمر سلامة

قصدي اقول لسمر اوباما
نفسي يا ابو خالو اشتكيلك
من هنا ليوم القيامة
نفسي يا ريس اوباما
***
نفسي اقولك ع اللي حاصل
واللى مدفون ف الحواصل
الحديت تاه منى واصل
والحنك لابس لجامه
نفسي يا ريس اوباما
***
مين يا خال للحق قايل
متهومين واحنا القتايل
محبوسين من غير دلايل
والعدو دق الاقامة
شفت يا ريس اوباما
***
وانت عارف اللي جرالي
ماانت اصلك وِلْد خالي
وانت ابو زيد الهلالي
الفتى الاسمر سلامة
قصدي اقول الاسمر اوباما ***
مش حاقولك تملا جيبي
رغم عارف انك قريبي
بس عايزك تحمي شيبي
لجل احافظ ع الكرامة
نفسي يا ريس اوباما ***
نفسي اقولك ع اللي بيا
واللي عمله ابن الغبية
لسة ناركم قايدة فيا
كاحتة جوا الجوف علامة
شفت يا ريس اوباما
***
اتفلت ف بلادنا بوش
زي تور محبوس في حوش
جاب مدافعه والجيوش
شفنا يا ما وياما ياما
شفنا يا ريس اوباما ***
جه غراب الشوم حدانا
هد على روسنا الخزانة
ع التراب سالت دمانا
والزتون مات والحمامة
شفت يا ريس اوباما ***
دمنا تنْعَر سواقي
شبَّع الارض الشراقى
واسأل النخل العراقي
ليه طرَح ضلمة وقتامة
اسأله يا خال اوباما ***
جانا بوش يا وِلْد خالي
جه قتل ضحكة عيالي
وافترى علينا الضلالي
هو وشوية لمامة
شفت يا ريس اوباما ***
جه علينا بكل قوة
جه وقال عامل فتوة
زي ديب سعران وهو
في الحروب زي النعامة
مش كدا يا خال اوباما ***
جه ضرينا بالكيماوي
لجل قال يلقى النواوي
جه وكان ع الشر ناوي
ويحايلنا باابتسامة
شفت يا ريس اوباما ***
قوَّقوا الغربان وحامو
زلزلوا البرج وحمامه
وف زنازن جونتانامو
بهدلوا الشيخ والعمامة
يرضي مين يا خال اوباما ***
طيارات من غير فرامل
خلّت العربان ارامل
نزلت حمل الحوامل
حجّرت دمع اليتامى
ليه كدة يا خال اوباما ***
العجوز هدموا زمانه
والصبي كسروا حصانه
والعشا خنقوا ادانه
والوطن ياللا السلامة
شفت يا ريس اوباما ***
طفل نايم فوق سريرُه
كيف تشيله ذنب غيرُه
حتى لو غلطان كبيرُه
ليه نضيِّعه بالغشامة
يرضي مين يا خال اوباما
قوللي يا ريس اوباما ***
البلاد عمّال تهاتي
والدبيح شغال يوماتي
حتى واد عمك زناتي
طخُه ولا خافش ملامه
شفت يا ريس اوباما ***
اللي يصرخ ف الشوارع
واللي يبكي ف الجوامع
والخسيس اطرش ما سامع
والشعوب حال الندامة
ليه كدا يا خال اوباما!! ***
ناس تقول الصبر طيِّب
والضلام هيغور قريِّب
والخراب في الكون يشيِّب
والطريق وحَلة وعتامة
شفت يا ريس اوباما ***
دا احنا ياخي ناس فقارة
في الحروب ملناش مرارة
لا ضربنا هني التجارة
او طمعنا ف الزعامة
صُح يا ريس اوباما ***
وانت عارف الظلم فين؟؟
والصاروخ طالع منين
داانت حتى ابوك حسين
يا ما شاف منهم لئامة
صُح يا ريس اوباما ***
نفسنا تنفذ وعودك
دا احنا يا ابن الخال جدودك
مش تموِّتنا ببارودك
لجل ما تقتل اسامه
مش كدا يا خال اوباما_________________