يخليكى يا ماما الصين

[محمد الشلقامى]

يخليكى يا ماما الصين ...............ولا من شئ حرمتينى
ملابس اجهزه بطاطين...............وخيرك بات مغطينى
فلوسى رايحه على جيبك..........وجيبى انضف من الصينى

يخليكى يا ماما الصين

يخليكى يا ماما الصين................يا شوكه ومفرمه وسكين
يا غساله وعصاره......................يا شوايه لجيوب ملايين
وتوهتينى فى الزحمه................لا عارف كايرو من بكين
وضاع منى سمار لونى...............ولونى اصفر من الصينى

يخليكى يا ماما الصين

فى كل ركن او زاويه.................الاقى كل شئ صينى
وزوجه ع الخلف ناويه................تخلفلى عيال صينى
بلاش بلدى بلاش فينو...............ونستورد رغيف صينى

يخليكى يا ماما الصين

طاقيه سبحه سجاده................ولعبه حلوه لحماده
وموتوسيكلات وسياره...............وكرمك زاد عن العاده
عروسه او فانوس رمضان..........يأذن او يقول قرأن
منبه تبعتيه عطلان....................ومش عايزاه يصحينى
وتلهينى ببالونه........................ وقاصده انك تهدينى

يخليكى يا ماما الصين

يخليكى يا ماما الصين..............وياما تقفلى مصانع
وشردتينى من شغلى.............ونيمتينى فى الشارع
وسهمى يندفن فى الطين.......وسهمك فى السما طالع
ولا كفاكى ابيع شغلك..............بعتى بياعين صينى
وداء السارس دمرنى...............ومين م السارس يشفينى
ومن بختى فتحت البخت..........لقيت فى البخت غول صينى
يا يأجوج عصرنا الحالى.............بقت خايفه تنام عينى
لانام والنومه تحلالى................ويخنقنى كابوس صينى

يخليكى يا ماما الصين

يخليكى يا ماما الصين.............وياما منك اتعلم
يا تليفزيون بدون صوره............يا راديو اخرس ما يتكلم
فى كل بيوتنا محشوره...........ومنك ربنا يسلم
وحزمتينى سور الصين...........ورقصتينى ع السلم
وعندى من الكلام ده كتير.......ولا دواوين تكفينى
وقلمى من الزعل قطع..........اتارى ماركته صينى

يخليكى يا ماما الصين


..........من ديوان ( ألام وأحلام ).........................