حدث في مثل هذا اليوم

[روعة السمان]

حدث في مثل هذا اليوم ..
Osama Almradni

15.03.1993 ميلادك اللي جيت فيه عالدنيا ونورت قلبي رحمة ورهبة، ورجفة حب ومسؤولية، لأن أول مرة بصير أمّ ..

15.03.2011 ميلاد ثورة الحرية، اللي اعتبرتها قضيتك بنفس يوم ميلادك ال18، وكأنها إشارة إلك من القدر أنها بتخصّك وشفت فيها كل قيمك الحلوة بكل عنفوان ومثالية ..

15.03.2021 اليوم صار عمرك 28، وصار عمر ثورتك 10 سنين ..

10 سنين شفت فيها الأسوأ والأفظع، بس بالحب والصدق المعبي قلبك الكبير، وبالحرية والمسؤولية وكل القيم الحلوة المليان فيها وجدانك، رسمت بطولات ولونتها، تفاصيل صغيرة تجسدت عظمة وشهامة و رقّة ورهافة مشاعر إنسانية ..

بشعورك العالي بالمسؤولية، ما تركت عيلتك تتغرب لحالها بالجزائر وكنت إلها سند ..
بصدقك، ما رجعت عالبلد لتكمل حلمك بالثورة، لما كنت أول ناقد لأخطاءها وانحراف مسارها، وبقيت عم تحمل قيمك اللي كنت تشوفها فيها وترجمتها بواقعك بالغربة ..
بشهامتك ساعدت كتير شباب سوريين مروا بالجزائر برحلة هجرتن لأوروبا ..
بشجاعتك وجرأتك كنت سبب أنو قدرنا نطلع كلنا ع ألمانيا من 6 سنين ..
بهمتك العالية تعلمت اللغة بسرعة وساعدت كتير شباب وصبايا وعوائل مهاجرة، مع أنك جاية متلك متلن، وساهمت بأنو يصير عنا هون أصدقاء بالغربة أصدقاء متل الوطن، أصدقاء حقيقيين متلك، صاروا عيلتنا الجديدة بالغربة ..

برجولتك كنت أكبر دعم وسند إلي بكل لهفة قلبك بكل القرارات المصيرية المرعبة اللي اتخذتها ..

أسامة الحر اللي بكل مرة اختلفنا فيها بالرأي بأمور مصيرية، وكنت قلك: أنت حر ومسؤول عن قرارك، كنت تترجم حريتك بمسؤولية عالية ما لها مثيل ..

صارت قضيتك اليوم تسعد نفسك وكل اللي حواليك وبتحبن وبيحبوك ..

شفتك كل يوم عم تكبر فيه بالحب، بعد ما مرينا سوا بمواقف كنت رح أفقدك فيها، كان الموت فيها أهون من غير عواقب أسوأ بكتير من الموت نفسه وبيرجف القلب منها ..

أسامة بهاليوم العظيم، وبقلبي اللي بعدو عم يرجف لليوم، بقلبي اللي كبر فيك ولسه عم يكبر، وبروحي المليانة امتنان أنك معنا وبخير وكلنا بخير وسوا هون؛
بقلك:
يتهنّى هالقلب الكبير وتتهنّى بالحب بكل لحظة من عمرك مع حبيبة القلب ®️ بحبك 💜🤍💚

[ريمه الخاني]

ليست السعادة دوماً أن تنصف الأنا..فالآخر عندما تخدمه نشعر بسعادة أيضا