ميثولوجيات سورية!!!

[أسامه الحموي]

ميثولوجيا السوريين رائعة ??


وهي شوية ميثولوجيات
إذا بيكون عندك ضيف ثقيل و مستوطن عندك فالحل أنك تشيل رشة ملح خشن وتحطلو ياها بكندرتو ..مافي خمس دقايق بيكون ركب جناح وطار من عندك


إذا دخلت عالبيت و ركبت فردة شحاطتك أو كندرتك عالفردة التانية : بيكون عندك طريق و عالأغلب سفر


إذا كنت عمتاكل كبة و أخدت كباية جديدة ولسه قدامك شقفة من الكبة اللي قبلها : بيكون عليك كتب كتاب جديد ( بس لا تعملوها عن قصد ??) لأنو لازم تكون عفوية .


إذا اشتريت بيت جديد فلازم قبل ما تفوت عليه تدخل مقص وزريعة ومصحف : المقص لقص لسان الحساد والزريعة مشان البيت يكون فيو بركة والمصحف للحفظ


إذا دخلت العروس الجديدة على بيت احماها فبمجرد ما يصير بالبيت مشكلة : بتكون هل عروس وشها نحس يالطيف و بتضل مكروهة .


إذا الولد وقّع من إيدو شغلة عالأرض فما بيصير يشيلها : لأنو بيكون لحسها الشيطان








ميثولوجيا اهل سوريه 2


* اذا مر حدا فوق الولد مابقى يطول


* قص الاظافر بالليل مو منيح
(لا تسألو ليش ما بعرف بس مو منيح و خلص )


* رش المي فراق


* اذا زحف الولد او زقزقت العصافير معناها جاينا ضيوف


*اذا طنت ادنك اليمين حدا عم يحكي عنا بالمنيح
و اذا طنت اليسار معناها حدا عم يجيب سيرتنا بالعاطل
(واذا طنوا مع بعض معناتها طرشت عليك العوض )


* اذا رفت عيني اليمين بيكون جاينا خبر طريف
واذا رفت عيني الشمال بيكون جاينا خبر مو منيح
(اما اذا رفوا سوى فأنت احول )


*إذا حكني كفي اليمين معناها بدي أقبض مصاري
و إذا حكني كفي اليسار معناها بدي أدفع مصاري
(اما اذا حكك شي تاني بقى فأنت اكيد جربان روح تحمم )


* و ما بصير الحمام بالليل
(طبعا شي بديهي لأن اكيد المي بتكون مقطوعة )


*واذا شفت مقص مفتوح لازم فورا تسكرو
( لانو المقص الفاتح تمو بيعمل خناق )


*وإذا عمل العصفور تحتو على الأواعي يعني جاييكون رزقة
(وما لازم تغسل ملابسك شي سنة وانت عم تستنى الرزق)


*و دلق القهوة رزقة كمان .......... جخو


*و شرب المي بعد القهوة قلة ذوق
(حتى لو اتشردقت موت ولا تشرب مي )


* كمان يلي حامل بصبي بتتباشع واذا حامل ببنت بتحلا ..........
واللي بتضل على حالا هي وحامل رح تجيب سعدان يعني


* وإذا الطفل قعد بالصينية وهي عالأرض بيرتعبوا لأنه
هاد الولد رح يضيع
(ويمكن يتشرد كمان )


* و كمان إذا حدا صبلك شاي او قهوة وملى الفنجان كتير
بكون قلبوه مليان منك واذا صبها ناقصة هدا دليل
على انو هالشخص ناقص
بقا لاقيلا حل اذا بتلاقيلا


*واذا عندك ضيف اتقيل دم وبدك يروح من عندك على السريع شك دبووس او عدة دبابيس بأيد المقشة او اقرأ سورة الزلزلة
(بس اكيد في عالم اذا بتقرأ القرأن كله بيضلوا لزقة فلا تحاول)


*واذا خايف من عين اتصيبك جيب ورقة واكتب عليها
اسم الشخص الي خايف من عينو وغزها بالدبوس
وانت عم تقراء المعوذات وتقول من عين افلان و تنفخ...
وفي حل تاني انك تروح تشيل عيونه وبلا وجعة هالراس


*والي بيعدّ النجوم بيطلعلو تالولات بايدو
(بس اذا حسن يعدهم ما بيطلع شي )


*وبعد ما نخلص صلاة نطوي السجادة مشان
الشيطان ما يصلي عليها
(على أساس هو بيصلي يعني!!!)ً

[العربي حاج صحراوي]

شكرا لهذا العمل الجميل و الذي لا شك يفيد ...تحية لقلمك . أخي أسامة .

[ريمه الخاني]

وحدات قياس سورية :


آخر ما عَمّر الله:
وتعني أن هذا المكان بعيد جداً جداً


على قد ما الله يعطيك:
وهو مصطلح متكامل يستخدم للتعبير عن قوة الضربات في المعارك التي تستهدف الوجه كمتلقي اساسي للكفوف.


حشك و لبك:
وحدة قياس قوة القتلة للشخص المتلقي,,: فلان اكل قتلة حشك و لبك


حليييييييق:
اي ابتعد عني بمقدار يجعلني لا ارى وجهك


"من هون لهنيك":
وتدل على شي عظيم ومبالغه مبالغه فيها وانو يلي بحكي ضايع من كتر ما بألف بالقصة


بلا طول سيرة:
"بدك تعرف انه لسا بدك ساعتين ثلاثة لتخلص القصة"


قد البلد / قد الايام / هلأد قدو
يعني شي كبير كثير كثير


قد الدب:
يعني شخص كبير كتير او سمين.


خير الله / متل الكشك / متل الرز:
وحدة قياس غنى الشخص: معو مصاري متل الكشك.


خمس دقائق بكون عندك:
ما في حدا بعرف مدتها الزمنية الحقيقة إلى يومنا هذا


بتبكي الدبب :
وحدة قياس سرعة الانترنت


بيشل او بيفلج:
وتعني أفضل من أفضل الموجود


"مشوار الطريق بكون عندك":
بيكون لساته بالبيت عالتخت


"هلأ ":
يعني بعد شوي او اعطيني وقت او برهة من الزمن او دقايق او انتظرني


ابو موزة (مفرد موز):
وتقال عند المبالغة و كثرة الشيء لحد لايوصف,, مثلا : فلان غش في الفحص غش لابو موزة,,


ترا ما في عندي يا أمي ارحميني:
تستخدم للتعبير عن مدى جدية الشخص


ينغل نغل -انبع و زنبع -بروس و بلا روس
دلالة على شدة الزحمة ووجود الكثير من الاشخاص في مكان صغير


فرقت متر
تقال بعد تصحيح معلومة لشخص للدلالة على الفرق بين المعلومة الصحيحة و الخاطئة


فركة كعب -عضة كوساية
للدلالة على قصر المسافة الزمانية او المكانية


يلي في عندو وحدات قياس جديدة يتحفنا فيها