مشكلة قضم الأظافر

[ميسم الحكيم]

#مقال_1
#قضم_الأظافر
حوالي 60% من الأطفال بيمارسوا سلوك قضم الأظافر، وهو من اكثر السلوكيات السلبية شيوعاً.
سبب السلوك:
فيه شبه اجماع من الأخصائيين النفسيين ان السبب الأساسي لممارسة السلوك دا هو (( القلق ))
**محدش يقول ان القلق عادي عند الأطفال، ومش تقيسه بمقياسك كشخص كبير، علشان هما أحاسيسهم ومشاعرهم مختلفه جداً عننا**
القلق ممكن يكون ناتج عن توتر العلاقة مع الوالدين، او بينه وبين أقرانه في الروضة او المدرسة.
مثال مثلا:
طفلك بيلعب لعبه وخبطك بيها بدون قصد غالباً، و رد فعلك كان عنيف جدا وكأنه عمل كارثه، دا هيسبب ليه قلق وتوتر في معاملته معاكِ كأم وهيكون قلقان دايما انه هيعمل او بيعمل حاجه غلط وخايف من العقاب او من رد الفعل حتى من حاجه بسيطه.
- امتى تقلقي لما تلاقي طفلك بيقضم أظافره؟
لما توصل معاه لمرحلة انه بيعور نفسه سواء بقصد او بدون قصد، او يفضل كل لما يخاف او يتوتر يصاحبه قضم الأظافر كوسيلة هروب او تفريغ للقلق دا.
- تعالجي مبدئياً السلوك دا ازاي؟
ياريت اول حاجه لو بتتعصبي عليه تبطلي صوتك العالي(اللي غالباً ملوش لازمه وممكن الوضع يتحل بهدوء)، لان كل حاجه تتعوض لكن نفسية طفلك مش هتتعوض...
تاني حاجه دوري عن سبب قلقه وخوفه، زي مثلا:
- لو هو في المدرسة اسألي عن تصرفات اقرانه معاه لو بيتعاملوا معاه بعدوانيه مثلا.
- لو انت بتضربيه ياريت تحاولي تمنعي الضرب.
- لو بيتعرض لأي اسلوب تعنيف نفسي وقفيه.
- بطلي عصبية وزعيق.
- لو بيتعرض لسخرية او تنمر امنعيها فوراً مهما كان مين الشخص المتنمر.
- اغمريه دايما بحبك، واظهري ليه قد ايه انت بتحبيه، وياريت الأب يشارك معاه في علاج طفلك.
- بطلي عصبيه وزعيق.
- كافئيه على فترات متباعده بأنه يحوش ايده وهتعطيه حاجه بيحبها مثلا(مش دايماً ولا متتالي).
- قوليله ان صوابعك جميلة وهتبقى أجمل لو مأكلتهاش.
- دايما حافظي على تقليم أظافر طفلك ومش تسيبيها تبقى طويلة.
- بطلي عصبية وزعيق.
بالنسبة لوقت السلوك لما يحصل:
شتتي انتباهه دايما بلعبة، بطلب، بأمر ينفذه سهل، او اتكلمي معاه وحاولي تفهمي سبب قلقه وتوتره.
طرق تانيه لعلاج السلوك زي انك تلبسي صابعه قفازات، او انك تدهني صوابعه مادة مُره (طريقة بدائية جدا بيستخدمها بعض الأخصائيين والوالدين).
لو الموضوع متحلش خلال مدة متوسطة ياريت تتجهي لأخصائي نفسي فوراً.
#السلسلة_الأولى.
#السلوكيات_السلبية_لدى_الأطفال.
#إسراء_ابوالنور.��منقول طبعا

[شذى ميداني]

مشكلة تربوية كبيرة منتشرة تعالج خطأ غالباً