مطلوب عريس لبهية

[عصام ميره]

مطلوب عريس لبهية
نفسي أجيب لبهية عريس
دي جوهرة معدنها نفيس
جنبها فين هتروح بلقيس
كل أيامها تبقى خميس
...............
نفسي أجيب لبهية عريس
يحيي الماضي ويبني حديث
يحمي ترابها عليها حريص
راجل ذوق طيب وحسيس
...............
نفسي أجيب لبهية عريس
عارف مينا وعرابي وعويس
أسوان سينا مطروح وسويس
أصله بسيط مش عمره كبيس
...............
نفسي أجيب لبهية عريس
يقبل ياكل عيش وسريس
زينا بقى يركب أتوبيس
مش مكار ولافكره خبيث
...............
نفسي أجيب لبهية عريس
مش منفوخ وف قصره حبيس
يضحك لينا مش وشه عبيس
راجل شهم مش خيخة وتيس
...............

نفسي أجيب لبهية عريس
مش هيخلي الشعب تعيس
مايجبش ابنه عليها وريث
دم ولادنا مارحش رخيص
...............
نفسي أجيب لبهية عريس
مش وش ملاك جواه إبليس
كل كلامه كدب وتدليس
نازل فيها نهب وتفليس
...............
نفسي أجيب لبهية عريس
مش عايزينه جبان وخسيس
عامل فيها علينا عتريس
و وقت الجد يبيعنا فطيس
...............
نفسي أجيب لبهية عريس
مش محتاج غير ربه أنيس
صوت الحق يكون له جليس
ويكون لينا في الوحدة ونيس
...............
نفسي أجيب لبهية عريس
ينور لينا حتى بفوانيس
يظهر وقت الشدة هويس
ويخلينا م الفرحة نهيص
...............
نفسي أجيب لبهية عريس
مش من لندن ولاباريس
هي تنقي وهي تقيس
هي تقول مين يبقى رئيس

كلمات
عصــــــــام ميــــــــره

[ريمه الخاني]

حتجيب لبهية عريس..
زاهي وطبعه خسيس..
أصل الرجال نادرين...
والعصر للمناحيس...
**
وطاب حرفك يا أصيل

[عصام ميره]

حتجيب لبهية عريس..
زاهي وطبعه خسيس..
أصل الرجال نادرين...
والعصر للمناحيس...
**
وطاب حرفك يا أصيل

أ . ريمه الخاني ..
لن نقبل أبدا بعريس سيس ..
وإن طلع يوم من المناحيس ..
ننكّس عمره قوام تنكيس ..
نحن نثق في ذوق بهية ..
دمتِ بكل خير ..

[كاظم الفضلي]

الأخ عصام ميره .. شكراً لمشاركتك
واحاسيسك في بناء نص ممتع .
دمت بخير .

كاظم الفضلي

[عصام ميره]

الأخ عصام ميره .. شكراً لمشاركتك
واحاسيسك في بناء نص ممتع .
دمت بخير .

كاظم الفضلي

الشكر لك أخي كاظم على متابعتك الدائمة وتشجيعك المتواصل ..
تحياتي

[محمد محروس أحمد]

الله عليك يا استاذ عصام جميله جدا
وان شاء الله
الزفه عليا فى الاتوبيس

[عصام ميره]

الله عليك يا استاذ عصام جميله جدا
وان شاء الله
الزفه عليا فى الاتوبيس

قدها وقدود يابو حميد ..
التورتة من عندي في دمياط ..
والأتوبيس عليك ..
والعروسة جاهزة ومتزوقة ..
مش ناقص غير حاجة صغيرة ..
ابن الحلال اللي يسعدها ويهنيها ..
لأنه لو فكر في يوم يؤذيها ..
هنعلقه على راس خازوق ..
شكرا لك يامحمد على مرورك وكلماتك الطيبة ..
تحياتي