غرقتيني ف شربة ميـة

[دكتور أحمد الليثي]

غرقتيني ف شربة ميـة
سوحتيني ف دين وهموم
بقى بالذمة يا "ضي عينيا"
يرضي الرب نبات ونقوم
والدَّيانة محاوطة شارعنـا
وانا متخبي في البدروم؟

مين يا مدام وسوس ف دماغك
قال يعدل لك كده منخارك
ويبدِّل لك خِلقة ربك
ويشقلب لك كده ف سنانك
شوفي عيونك شطحت فين؟
شوفي حواجبك طايحة شمالك.

بعد ما صرفت كل فلوسها
لفِّت أخدت م المخزون
قرشنا الابيض أيامه سود
كان بيزقطط بقى محزون
واحنا شحتنا ولم يتغير
وش القرد، وحالنا جنون.

خلقة ربنا ما لها يا ناس؟
يعني بقينا احسن م الخالق؟
لو تسألوا حتى النسناس
عمره ما يقبل شكله يفارق
ما في طبيب يا اخْوانَّا يغير
مخ مراتي العقل الخارق؟

[دكتور أحمد الليثي]

كثيراً ما تدَّعي المرأة أن الزوج هو سبب التغيير، ولو لم يكن ينظر لغيرها لما أقدمت على ذاك التغيير ...
ولها هذا الرد:

هو انا بحلقت لغيرك إلا
لما رأيتك أصل العلّـة
عينك رايحة يمين وشمال
وحالتك دايماً أسوأ حال
والتبويزة يا ناس على طول
والشعر كمان مش مغسول
حتى الكلمة الحلوة يا ناس
عجنتها ببصـل الأنفاس
وان جبت لها ف يوم فستان
ألاقيها تركب له ودان
وتقصقص وتقول بلا وكسة
وتطلع فيه القطط الفاطسة
يبقى الحق يا ناس على مين؟
ما تفهِّمـوا أم التفانيـن!

[ريمه الخاني]

ما في طبيب يا اخْوانَّا يغير
مخ مراتي العقل الخارق؟

هو انت خالي هموم؟
ولا انت مافيك سموم؟
يااخي بلا وكسه كل واحد فيه مليوووووووووومممم
حلوووووووة
سلم قلمك

[دكتور أحمد الليثي]

قامت المدام برشوة الشاعر حسني جاد (عاشق الورد) بحلة محشي كي يقف في صفها، فكتب يقول:

وما اراه يادكتور احمد ان تفضل الإنسحاب

يا نهار بُني مخطط ف ازرق
مش عايز ورد، ومش هاعشق
بقى يا أخينا نقول دي حريقة
تيجي تقول ع الست بريئة؟
وتنـادي اني أسلم وابعـد
والمحروسة دي تشمت، تسعد؟

بس! فهمت الفـولة الآن
"محشي الست" صابك بجنان
اعقل صلِّ على العـدنان
دي الرشوة حرام كده ف القرآن
أنا عارف "طبخة" وملعوبة
شغل القرشـانة الكركـوبة
بقى يا اخواتي، يا ناس ع الريق
تِطْعَنِّي ف أجدعها صديق؟
تيجي تلف عليك بالمحشي
تخبطني ف قلبي وف كرشي؟
فين يا اخوانَّا بقى الإخلاص
لما الصـدق كده بينعـاص
بالمحشي، وأصنـاف الطرشي؟
ياللا ابعدوا كلُّكو عن وشي.

أنا عارف حقي ده هاخده ازاي
وشنب ستي أهـوه أنا جـاي
وهاضحضح راسها يا ناس بالشوم
وان شـالله بعدهـا ما تقـوم.
بقى حلِّة محشي يا عاشق الورد
تقـلب ودَّك كـده للضـد؟

[دكتور أحمد الليثي]

طول عمرك وش فضايح
انا وحدي اللي بداري
واناحي، خيبة عمري وزماني

زهرة جميله عودها فرنساوي
تتجوز اقرع ومهتم
طقم اسنانه صناعي!!
وجي تقولي انك بايع!!
يا اخي دِهَ دا
مين سمعك هسبق واجري
واقول يا زماني

من مهري هبدأ من تاني
واتجوز راجل شغل ياباني
وانت هتفضل كده وحداني
لأن عيالي كرهوا عيشتك يا أناني
لحمه فراخ معاها خضار
تاكلهم ولا تسأل وتقول يا عيال
كنبه وكرسي عايزين من تاني جهاز
وانت لكيفك طايح ولا همّك لو بعنا البوتاجاز
عيشه هباب لجل عيالي كنت ولعتك بالجاز
ولجل عيون الغاليين عمري ما هأقول من تاني جواز

أضحك الله سنك يا أختنا عبلة. طيب خدي عندك:

بقى بتعيبـي سنـاني اللولـي
وشعري ده كله دهب وسبايك
يا للا يا ستي عددي قولي
ياللا وبُخِّي بسِم كلامك.

كنت يا ناس في شبابي حليوة
والستات طوابير ع الباب
حظي وقعت كده ف دُحْدِيرَة
واهي جات لك كده ع الطبطاب.

خدت الست م العمر راقات
لما بقيت مش داري بحالي
وجابت لي أفظعها آفات
من ضغط لسكر لدوالـي.

والآخـرة اطلع كده غلطـان
وانا أصلا منها انا طفشان
ولَّعي فيَّا، ما انا زهقان
م الدنيا يا وش الأحــزان.

أما عيالنا فكانوا تلاتة
قيمة وسيما وأحلى عيال
بعتتهم للعم شحاتة
سرقوا ونهبوا كتير م المال

رحت حلفت يا خلق عليها
وانا راجل كلمتي بحياتي
لاهاكسَّر رجلها وايديها
لو حصلت منَّها في الآتي.

وما سمعت يا خوانَّا كلامي
رحت مكسَّر عفش البيت
كنبة وكرسي كانوا قدامي
ورحت خابطها بجرة زيت

ومولَّع كده كام ترابيزة
لاجل تفوق وتؤدي واجبها
نحو الجوز* والبت عزيزة،
والشلوت كان كده في نصيبها.

لما مشينا معاها بذوق
كل عملها لقيته بالكيف.
لما بدنها اتكوى بحروق
مشيت زي الألِف السيف.

روحي يا فالحة الباب مفتوح
شوفى بقى هينوبك أيه
وكفاية دحلبة وجروح
وشوفي لك باشا أو بيه.


====
* الجوز: جوز العيال (أصل عندنا توأم، عقبال عندكم) ههههههههههههههههههه

[دكتور أحمد الليثي]

مش قلت لكم هآخذ حقي؟
آدي النتيجــة :

يالّلا يا أهل المنتدى يالّلا
نتجمع والفرحة آهي هالّة
باركوا لي ما انا ليلة امبارح
خدت التانية غيظاً ف العِلَّة.

والصبح لقيتها كمان جايبة لي
إفطار ملكي كمان م الغالي
وقالت لي اتفضل يا حياتي
وبقت قاعدة كده وباصة لي

قلت لها ما تمدي إيديكي
بسم الله ، وما شالله عليكي
قالت تسلم ... عايزة اتملى
في جمالك، قلتلها افديكي.

وبعد ما جيت يا جماعة من برة
جَرْي لقيتها بتسحب جـرة
فيها مية والملح فْ إيديها
ورجولي ارتاحت بالمـرة.

ولقيت حلة محشي يا ناس
ولا أجمل من كده إحساس
واللحمة توابلها عواطف
تسلم لي إيديها وتنباس.

وقعدت اتسـاير ويَّاهـا
كلمتها دي سكر ما احلاها
نسِّتني الدنيـا ومشاكلهـا
والضحكة عرفت انا معناها.

كل الهم خلاص انزاح
والدنيا قدامي براح
فاتحة لي بالشوق دراعاتها
والقلب مزقزق وارتاح.

بس ضميري ان حالها اتغير
مش ممكن هاغلب واتحير
راح اجيب غيرها يا ناس على طول
وامشي ف دنيتي عرض وطول*


* وفي رواية: وامشي ف دنيتي "بدر منـوَّر"
والحدق يفهم.

[أبو فراس]

بس ضميري ان حالها اتغير
مش ممكن هاغلب واتحير
راح اجيب غيرها يا ناس على طول
وامشي ف دنيتي عرض وطول*
* وفي رواية: وامشي ف دنيتي "بدر منـوَّر"
والحدق يفهم.

خليها تتغاااااااااااااظ
هههه
الله عليك دكتووووووووووور

[دكتور أحمد الليثي]

خليها تتغاااااااااااااظ
هههه
الله عليك دكتووووووووووور

تسلم أبو فراس.
عقبى لك. هههههههههههههههههههه