كل شيء جواكى مات


--------------------------------------------------------------------------------



الكلام مبقاش يفيد
كل شى جواكى مات
يوم ما ليكى أمْد إيد
إقطعيها
واجمعيها
مع اللى باقى لى ف قُربك
من شتات
وابدرينا ف بحر أمواجه
آهات
تطرح الأمواج دموع
والدموع إنْ تبكى دم
مش مهم
أى دمع بأيه يفيد
الكلام مبقاش يفيد
* * *
كنت بستحمل واخبّى
مهما طال وياكى دربى
م انتى دربى
وارسمك..مركب
وانا...فيه المراكبى
وافرد الإحساس شراع
واستلف م الشمس
ميت مليون شعاع
لجل اجدف بيها
واوصل برّ حبك
بس..ليه يا مركبى وقفت
ورمتنى بره منك
وسط دمعى
والنهارده
جاى تصيد قلبى الغريق
للأسف تهت فـ طريق
مايجوزش فيه إنك تصيد
الكلام مبقاش يفيد
* * *
لما شوفتك
قلت لازم ليكى أوصل
والنهارده بقول: يا ريتنى
ما كنت أوصل
أو أشوفك
أو أكون نقطة فــ حروفك
أو ماكونش
قولى ليا بأيه أزيد
الكلام مبقاش يفيد
كل شئ جواكى مات
* * *

شعر / حسن صلاح حسن